ރުޅި އަކީ ކަމަކާމެދު ހިތްހަމަނުޖެހުނީމައި، ނުވަތަ ބިރުގަތީމައި، ނުވަތަ ހިތާމައިގެ ވަގުތު ވެސް ފެންނަ ސިފައެކެވެ. މިއީ ހަމައެކަނި ބޮޑެތި މީހުންގެ ހުންނަ ސިފައެއް ނޫނެވެ. ކުޑަކުދިންނަކީ ވެސް، އެކުދިން ބޭނުންވާ ކަމެއް ޙާސިލް ނުވުމުން ރުޅި ގަދަވެ، ބޮޑާ ހާކާ ކުދިންނެވެ. މީގެތެރެއިން ވެސް އިންތިހާއަށް ރުޅިގަދަ ކުދިންނަކީ ރުޅި އަންނަ ވަގުތު އެއްޗެހި އުކައި، ޖެހިގެން ހުންނަ ކުއްޖާގެ ގައިގައި އަތްލާ ހިސާބަށް ދާ ކުދިންނެވެ. މިފަދަ ކުދިންނަކީ ކުދި ކުދި ކަންކަމާ ރުޅި އައިސް ބޮޑާހާކާ ކުދިންނެވެ. މިއީ ގެންގުޅެން ކިތައްމެ އުނދަގޫ ކުދިންނަށް ވިޔަސް، އެކުދިންގެ އުޅުން އިސްލާޙު ވާނީ، ބެލެނިވެރިން ކެތްތެރިކަމާއެކު އަމަލު ކުރުމުންނެވެ. އެހެންކަމުން، ރުޅިގަދަ ކުއްޖަކާ މެދު ކަންތައް ކުރާނީ ކިހިނެއް ހެއްޔެވެ؟

ތިރީގައި މި ކިޔައިލަދެނީ، ރުޅިގަދަ ކުއްޖަކާ ޑީލް ކުރާއިރު ހަނދާނުގައި ބަހައްޓަންވީ ބައެއް ކަންކަމެވެ.

 

 1. ދަރިފުޅު ރުޅިގަދަ ވެގެން އުޅޭއިރު ހަމަޖެހިގެން ހުރުން

ދަރިފުޅު ކިތައްމެ ގަދަޔަށް ރުޅި އައިސް، ހަޅޭއްލައްވައި ބޮޑާހޭކިޔަސް ބެލެނިވެރިން ރުޅި އިސް ނުކުރާށެވެ. ނޫންނަމަ، ބެލެނިވެރިންގެ ކިބައިންވެސް ދަރިފުޅަށް ފެންނާނީ ރުޅިގަދަ ކަމުގެ ސިފައެވެ. އަދި ރުޅި އައުމަކީ އާދައިގެ ކަމެއް ކަމަށް ހީވެ، އެކަމަށް ދަރިފުޅު ހޭނެން ފަށާނެއެވެ. އޭގެ ބަދަލުގައި ހަމަޖެހިލައިގެން ދަރިފުޅާ ކުރިމަތި ލައިފި ނަމަ، އޭނާއަށް ތި ދެއްކެނީ ރަނގަޅު ނަމޫނާއެކެވެ

 

2. ވާހަކަ ދެއްކުން

ދަރިފުޅުގެ ރުޅި މަޑުވެ، އޭނާ ހަމައަކަށް އެޅުނީމައި އެކަމާ ބެހޭގޮތުން ވާހަކަ ދައްކާށެވެ. އަދި އެގޮތަށް ރުޅި އިސްކުރުމަކީ ގޯސް ކަމެއް ކަން، އޭނާއަށް ވިސްނޭނެހެން އޯގާތެރިކަމާއެކު ކިޔައިދޭށެވެ. މިފަދައިން ވިސްނައިދޭ އިރު، އެއްވެސް ހާލެއްގައި ހަރުކަށިކަން ނުދައްކައި ވޭތޯ ބަލަން ސަމާލުވާން ވާނެއެވެ.

 

3. އަތް އިސް ނުކުރުން

ކުޑަކުދިންގެ ގައިގައި ތަޅައިގެން އެކުދިންނަކަށް އެއްވެސް އެއްޗެއް ނުވިސްނޭނެއެވެ. އޭގެ ބަދަލުގައި އެކުދިންނަށް ދަސްވާނީ، އަނިޔާވެރިކަމަކީ ހައްލެއް ކަމަށެވެ. އަދި ބައެއް ފަހަރު އަނިޔާކޮށްގެން ބޮޑު ކުރާ ކުދިންނަށް ނަފްސާނީ ގޮތުން އަސަރުކޮށް، ނުބައި މަގުން ދިޔުމަށް މަގުފަހިކޮށްދެއެވެ. ވީމާ އަތް އިސްކުރުމަކީ އެއްވެސް ހައްލެއް ނޫނެވެ.

 

4. އަނގަބަހުން މައްސަލަ ހައްލުކުރަން ދަސްކޮށްދިނުން

ހިތްހަމަނުޖެހޭ ކަންތައްތައް އަނގަބަހުން ކިޔައިދީ، އެކަމެއް ހައްލުކުރަން ދަރިފުޅަށް ބާރު އަޅާށެވެ. އަދި އޭނާ ނޭދޭ ކަމަކަށް ރީތިކޮށް ސީދަލަށް "ނޫނެކޭ" ބުނުމަކީ ހައްލެއް ކަން ކިޔައިދޭށެވެ. އޭގެ ބަދަލުގައި، އެއްޗެހި އުކައި ހެދުމަކީ ގެއްލުން ހުރި ކަމެއްކަން ވެސް ކިޔައިދޭން ވާނެއެވެ. މިގޮތަށް ކިޔައިދޭ އިރު، ކުއްޖާގެ އުމުރާ ގުޅޭގޮތަށް ބަސްމަގު ބެހެއްޓުމަށް ސަމާލުކަން ދޭންވާނެއެވެ.

 

5. ރަނގަޅު ކަމެއް ކޮށްފިނަމަ ތަޢުރީފު ކުރުން

ކުރިން ކިޔައިދިން ހެން އަނގަބަހުން ކަންތައްތައް ހައްލު ކުރަން މަސައްކަތް ކުރާކަން ދަރިފުޅުގެ ކިބައިން ފެންނަ ނަމަ، އެކަމަށް ތަޢުރީފު ކޮށް ހިތްވަރު ދޭން ވާނެއެވެ. އޭރުން އެކަން ދެވަނަ ފަހަރަށް ތަކުރާރު ކުރުމަށް މަގުފަހިވާނެއެވެ.