ތުއްތު ދަރިފުޅު ފެންވެރުވުމަކީ، ކުރަން އެންމެ އުނދަގޫ އެއް މަސައްކަތެވެ. ހަމަ ކިރިޔާވެސް ފެންކޮޅެއްގައި ޖެހޭއިރަށް ރޯ ކުދިން އުޅެއެވެ. ނަމަވެސް ތުއްތުދަރިފުޅު ފެންނުވަރުވައި ވާކަށް ވެސް ނޯވެއެވެ. ސާފުތާހިރު ކަމަށް ބެލިޔަސް، އަދި އެހެން ގޮތްތަކުން ބެލިޔަސް، މިއީ ނުކޮށް ދޫކޮށްލުމުގެ އިޙްތިޔާރު ލިބިފައިވާ ކަމެއް ނޫނެވެ. ފެންވެރުވުމަކީ ތުއްތު ދަރިފުޅު ނިދަން ފަސޭހަ ކޮށްދޭ ކަމެއްވެސް މެއެވެ.

ވުމާއެކު، ފެންވަރުވާއިރު ކުޑަކުދިން ރޯ ސަބަބާއި، އެކަމުގެ ހައްލު ހޯދޭނެ ގޮތްތަކަށް މިފަހަރު އަލިއަޅުވައިލާނަމެވެ.

1. ފެނުގެ ފިނި ހޫނުމިން

ފެންވަރުވާއިރު ކުޑަކުދިން ރޯ އެންމެ އާއްމު ސަބަބަކީ، ފެން މާބޮޑަށް ފިނިވުމެވެ. ސަބަބަކީ، ތުއްތު ކުދިންނަކީ ފިންޏާއި ހޫނަށް މާ ނާޒުކު ބަޔަކަށް ވާތީއެވެ. އެހެންކަމުން، ފިނިފެން އެކުއްޖާގެ ހަށިގަނޑުގައި ޖެހޭއިރަށް ސިއްސައިގެން ގޮސް ރޯން ފަށައެވެ. މިކަމަށް އޮތް ހައްލަކީ، އެންމެ ރަނގަޅު ވަރުގެ ފިނިހޫނުމިނެއް ހުރި ފެނަކުން ދަރިފުޅު ފެންވެރުވުމެވެ. އެގޮތުން، ކުޑަކޮށް ހޫނުކޮށް ހުރި ތާފަނާ ފެނުން ފެންވެރުވުން ރަނގަޅު ވާނެއެވެ.

2. ފެނުގެ ޕްރެޝާ

މާ ބާރަށް ފެން އަންނަ މާގަނޑަކުން ފެންވަރުވާނަމަ ކުޑަކުދިން ރޯނެއެވެ. ނުވަތަ، ޖަގަކުން އެކުއްޖާގެ ބޮލަށް ފެން އަޅާއިރު، މާ އަވަސްއަވަހަށް އަޅަންޏާވެސް ރޯނެއެވެ. އެއީ ހަމަޖެހިލުމެއް ވަގުތުކޮޅެއް ނުލިބޭތީ ކަމަށް ވެދާނެއެވެ. އޭގެ ބަދަލުގައި ލަސްލަހުން ދަރިފުޅުގެ ގަޔަށް ފެން އަޅާށެވެ. އޭރުން އޭނާ ހަމަޖެހި، މަޑުމައިތިރިކަމާއެކު އިންނާނެއެވެ. 

3. ތަނެއް ހަލާކުވެފައި ހުރުން

ދަރިފުޅުގެ ހަށިގަނޑުގެ ތަނެއް ހަލާކުވެ، ނުވަތަ ރަތްވެފައި ހުންނައިރު ފެންވެރުވުމުން ރޯނެއެވެ. އެހެންކަމުން، ފެންވަރަން ގެންދިޔުމުގެ ކުރިން ތަނެއް ހަލާކުވެފައި ހުރިތޯ ރަނގަޅަށް ބަލާށެވެ. ހުރިނަމަ، އެތަނެއްގައި އުނގުޅަންޖެހޭ ބޭސް އުނގުޅަން ވާނެއެވެ. އަދި ފެންވަރުވާއިރު އެތަންކޮޅުގައި ސައިބޯނި ނުޖެހޭ ގޮތަށް ބަލައިގެން ފެންވަރުވާށެވެ. 

4. ބަނޑުހައިވުން ނުވަތަ ނިދި ހަމަނުވުން

ތުއްތުދަރިފުޅުގެ ކެއުމުގެ ކަންކަމަށް ވަރަށް ބޮޑަށް ސަމާލުވާން ޖެހޭނެއެވެ. ނުކައި ހުއްޓައި ފެންވަރުވަން ވެއްދުމުން، ބަނޑުހައިވެގެން ރޯނެއެވެ. އަބަދުވެސް ފެންވަރުވަން ވާނީ ދަރިފުޅު ކައި ނިމުމުން، 30 ނުވަތަ 45 މިނެޓު ފަހުންނެވެ. ހަމައެހެންމެ، ފެންވަރަށް ގެންދިޔުމުގެ ކުރިން ދަރިފުޅުގެ ނިދި ހަމަވެފައިވޭތޯ ބަލަންވާނެއެވެ. ނިދި އައިސް ވަރުބަލިވެފައި ހުންނަ އިރު ތުއްތުކުދިންނަށް މާ ފަސޭހައިން ރޮވޭގޮތް ވެއެވެ.

5. އެކި ވަގުތުތަކުގައި ފެންވެރުވުން

ކޮންމެ ދުވަހަކު އެއް ގަޑިއަކަށް ފެންވެރުވޭތޯ ބަލާށެވެ. އޭރުން ތުއްތު ދަރިފުޅަށް ލިބޭ ސިހުން ކުޑަވެ، އެގަޑީގައި ފެންވަރަން އާދަވާނެއެވެ. މިސާލަކަށް، ވަކި ގަޑިއެއްގައި ނިންދަވާ ނަމަ، ކޮންމެ ދުވަހަކުވެސް އެގަޑިއަކަށް ދަރިފުޅު ނިދި އާދެއެވެ. ފެންވެރުވުމުގައި ވެސް އޮންނަނީ އެ އުސޫލެވެ.