ބުލީ ނުވަތަ ހަނގާ ކުރުމަކީ ސްކޫލުތަކުގައި ވަރަށް އާންމުކޮށް ހިނގާ ކަމެކެވެ. ބައެއް ފަހަރު ބޮޑެތި މީހުންގެ ލޮލުގައި އަޅައިނުގަންނަހާ ސިއްރުންނެވެ. ނަމަވެސް، ދަރިފުޅު ބުލީގެ ޝިކާރައަކަށް ވުމަކީ އެއްވެސް ބެލެނިވެރިޔަކަށް ގަބޫލުކުރެވޭނެ ކަމެއް ނޫނެވެ. އެކަން އެގޮތަށް ވާނަމަ އެކަން ހުއްޓުވަން ކުރެވެން ހުރި ކަމެއް ކުރާނެއެވެ.

އެކަމަކު ދަރިފުޅު ސްކޫލުގައި ބުލީގެ ޝިކާރައަކަށް ވާކަން ބައެއް ފަހަރު މައިންބަފައިންނަށް ސިއްރުކުރާ ހާލަތްތައް ވެސް އާދެއެވެ. މިފަދަ ހާލަތެއްގައި މައިންބަފައިން ޖެހޭނީ ވަރަށް ސަމާލުވެގެން އެކަން ދެނެގަންނާށެވެ. ތިރީގައި މި ކިޔައިދެނީ، ބުލީގެ ޝިކާރައަކަށްވާ ކުއްޖެއްގެ ކިބައިން އާންމުކޮށް ފެންނަ ބައެއް ސިފަތަކެވެ.

ނަފްސާނީ ބަދަލުތައް

ދަރިފުޅުގެ މިޒާޖަށް ވަރަށް ކުއްލި ބަދަލުތަކެއް އައިސްފި ނަމަ، އެކަމުގައި ކޮންމެވެސް ސިއްރެއް ވާނެއެވެ. މިސާލަކަށް ކަމަކާ ބިރުން ހުންނަހެން ހީވުމާއި (އެންޒައިޓީ)، އަބަދު ދެރަވެ މަޑުނެގިފައި ހުންނަތަން (ޑިޕްރެޝަން) ފާހަގަވާ ނަމަ ލަސްނުކޮށް ސުވާލުކުރާށެވެ. ބައެއް ފަހަރު، ބުލީގެ ސަބަބުން އެކަމާ ދޭތެރޭ ވިސްނަން ހަދައިގެން އަވަސް އަވަހަށް ބަލި ވެސް ވެދާނެއެވެ. އެގޮތުން މާ ގިނައިން ބޮލުގައި ރިއްސައި، ނުވަތަ ބަނޑެއްގައި ރިއްސާތީ އުޅޭނަމަ އެއީ ނުބައި ފާލެކެވެ. 

 

ކިޔެވުމަށް ސަމާލުކަން ނުދިނުން

މޮޅަށް ކިޔަވަމުން އައި ކުއްޖަކު ކުއްލިއަކަށް ކިޔެވުމަށް ސަމާލުކަން ދިނުން މަދުވާތަން ފެނުމަކީ އަނެއް އަލާމާތެވެ. މިކަން މިހެން ވުމުގައި އެކި ކަހަލަ ސަބަބުތައް ވެއެވެ. ބުލީ އަކީ ވެސް ބައެއް ފަހަރު އޭގެތެރެއިން ސަބަބަކަށް ވެދާނެއެވެ. މިސާލަކަށް، ކުރިން ޓެސްޓުތަކުން ރަނގަޅު މާކްސް ހޯދާ ކުއްޖާ، ކުއްލިއަކަށް ބޮޑުތަނުން އެ މާކްސް ދަށްވުމަކީ ބެލެނިވެރިން ސަމާލުކަން ދޭންޖެހޭ ކަމެކެވެ. އާންމުކޮށް ބުލީގެ ޝިކާރައަށްވާ ކުދިން ކިޔެވުމުން ދަށް ވާން ފަށަނީ، ކިޔެވުން މަތިން ފޫހިވާ ވަރަށް އެހެން ކުދިން ބުލީ ކުރާތީއެވެ.

 

ސްކޫލަށް ނުދާން އުޅުން

ކުއްލިއަކަށް ދަރިފުޅު ސްކޫލަށް ނުދާން ބަހަނާ ދައްކަން ފަށާނަމަ، އެއީ އެތާނގައި ކޮންމެވެސް ހިތް ނޭދޭ ކަމެއް ވާތީ ކަމުގައި ވެދާނެއެވެ. އަދި ޙާއްސަކޮށް، ކުރިން ވަރަށް ދާހިތުން ސްކޫލަށް ދާ ކުއްޖަކު މިގޮތަށް އުޅެން ފަށައިފި ނަމަ ލަސްނުކޮށް ވެގެން އުޅޭ ގޮތް އޮޅުންފިލުވަން ވާނެއެވެ.

ބުލީގެ ޝިކާރައަކަށް ވާކަން ދަރިފުޅު ސިއްރު ކުރާނީ ވެސް ކޮންމެވެސް ސަބަބެއް އޮވެގެންނެވެ. އެހެންކަމުން، މައިންބަފައިން ވާންޖެހޭނީ ދަރިފުޅު އެންމެ އިތުބާރުކުރާ މީހުންނަށެވެ. އަދި ދަރިފުޅު ބޭނުން ކޮންމެ ވާހަކައެއް ވެސް މަންމަ ނުވަތަ ބައްޕައާ ހިއްސާކުރެވޭނެ ކަމުގެ އިހުސާސް އަބަދުވެސް ދަރިފުޅަށް ކޮށްދޭން ވާނެއެވެ. 

ދަރިފުޅަށް އެހެން ކުދިން ބުލީކުރާކަން ޔަގީންވާ ހިސާބުން، ލަސްނުކޮށް ފިޔަވަޅު އަޅަންވާނެއެވެ. އެންމެ ފުރަތަމަ ފިޔަވަޅަކީ އެކަމާ ބެހޭގޮތުން ސްކޫލްގެ މެނޭޖްމެންޓާ ވާހަކަދެއްކުމެވެ. އަދި ބުލީ ކުރަނީ ކޮން ކުދިންނެއްކަން ހޯދައި، އެކުދިންގެ މައިންބަފައިންނާ ބައްދަލުކޮށްގެން ވެސް އެކަމަށް ހައްލެއް ގެންނަން ވާނެއެވެ.