އުމުރުން 21 އަހަރަށްވުރެ މަތިވުމުން، ފައިގެ ދަށްފުށް ފެޅުން (ކްރެކްޑް ހީލް) އަކީ އެއްބައި މީހުންނަށް އާއްމު ކަމެކެވެ. އެންމެފުރަތަމަ އެއީ މާ ބޮޑު މައްސަލައެއް ހެން ހީ ނުވިޔަސް، އެކަމަށް ފަރުވާ ނުލިބި ގިނަދުވަސް ވާނަމަ މާ ފުންކޮށް ފެޅި، ލޭ އަންނަ ގޮތް ވެސް މެދުވެރިވެއެވެ. އަދި މިއީ ވަރަށް ވޭންހުރި ކަމެކެވެ.

މިގޮތަށް ދިމާވުމުގެ މައިގަނޑު ސަބަބަކީ، ފައިގެ ދަށްފުށުގެ ހަންގަނޑު މާ ބޮޑަށް ހިކުމެވެ. ޤުދުރަތީ ގޮތުން ފައިގައި އޮއިލް ގްލޭންޑްސް ނުހުރުމުގެ ސަބަބުން، ހިކިގެން ގޮސް ހަންގަނޑު ފެޅެން މެދުވެރިވެއެވެ. އެހެންކަމުން، ފައި ފެޅުމުގެ ނިޝާނެއް ފެންނަން ފަށައިފިނަމަ، ލަސްނުކޮށް އެކަމަށް ފަރުވާ ކުރާށެވެ. މިގޮތުން ގިނަ މީހުން އެންމެ އާއްމުކޮށް ފައިގެ ދަށްފުށުގައި އުނގުޅާ އެކައްޗަކީ ޕެޓްރޯލިއަމް ޖެލްއެވެ. ނުވަތަ، ބޭސް ފިހާރައިން ގަނެގެން އެކިއެކި ކްރީމް ވެސް އުނގުޅައެވެ. އެހެންނަމަވެސް މިފަހަރު މި ލިޔެލަނީ، ފައި ފެޅުމަށް ފަރުވާއެއްގެ ގޮތުން ގޭގައި ހަދައިލެވިދާނެ ތަފާތު ދެ "ފުޓް މާސްކު" ތަކެކެވެ.

އެވޮކާޑޯއާއި ދޮންކެޔޮ

ދޮންކޭލަކީ މޮއިސްޗަރައިޒާއެއްގެ ގޮތުގައި ބޭނުންކުރަން ވަރަށް ރަނގަޅު އެއްޗެކެވެ. އަދި އެވޮކާޑޯގައި އެކުލެވޭ ވިޓަމިން އޭ އާއި ފެޓީ އެސިޑްސްގެ ސަބަބުން ފެޅިފައި ހުންނަ ހަންގަނޑު ރަނގަޅު ކޮށްދިނުމަށް އެހީވެދެއެވެ. ވީމާ، ރަނގަޅަށް ދޮންވެފައި ހުރި ދޮންކޭލަކާއި، އެވޮކާޑޯއެއްގެ އެއްފަޅި މިކްސަރަށް އަޅާފައި އެއްކޮށްލާށެވެ. އޭގެން އުފެދޭ ޕޭސްޓު ފައިގެ ދަށްފުށުގައި މަސާޖު ކުރާހެން އުނގުޅާށެވެ. އަދި 20 މިނެޓު ވަންދެން ބެހެއްޓުމަށްފަހު ފައި ދޮވެލާށެވެ. ފައިގެ ދަށްފުށް އެއްކޮށް ރަނގަޅު ވަންދެން މި ޕޭސްޓު ކޮންމެ ދެދުވަހުން އެއްދުވަހު ފައިގައި އުނގުޅަންވާނެއެވެ. އަދި އެއްދުވަހު ހަދާ ޕޭސްޓުގަނޑު ދެތިން ދުވަސް ވަންދެން އައިސްއަލަމާރިއަށް ލައިގެން ބޭނުންކުރެވޭނެއެވެ.

އޯޓްމީލް މާސްކު

އޯޓްމީލްއަކީ މަރުވެފައި ހުންނަ ހަންތައް ނައްތައިލުމަށް އެހީވުމުގެ އިތުރުން، މޮއިސްޗަރައިޒާއެއްގެ ސިފަތައް ވެސް ލިބިފައިވާ އެއްޗެކެވެ. މީގައި ހަދަންޖެހޭ ގޮތަކީ ދެތިން ސަމުސާ އޯޓްމީލް، މިކްސަރުން މުގުރައި ހިމުންކޮށްލާނީއެވެ. އެއަށްފަހު ތަށްޓަކަށް އަޅާފައި، އޭގެތެރެއަށް ކާށިތެޔޮ ނުވަތަ އޮލިވްއޮއިލް ގެ ފަސް ތިކި އަޅާނީއެވެ. ދެން އޮލަވުމުން، ފައިގެ ދަށްފުށުގައި ރީތިކޮށް ހާކާނީއެވެ. ފަޅައިގެން ގޮސްފައި ހުންނަ ތަންތަނަށް ޙާއްސަ ސަމާލުކަމެއް ދޭންވާނެއެވެ. އެއަށްފަހު 30 މިނެޓު ވަންދެން ބެހެއްޓުމަށްފަހު ފިނިފެނުން ފައި ދޮވެލާށެވެ. މި ޕޭސްޓުވެސް ކޮންމެ ދެދުވަހަކުން އެއްދުވަހު އުނގުޅުމުން ނަތީޖާ ފެންނާނެއެވެ.