އެއްބައި މީހުންނަކީ ރައްޓެހިންގެ ސިފައިގައި ތިބޭ ދުޝްމަނުންނެވެ. އެފަދަ މީހުން ތިބާއަށް ކާމިޔާބީއެއް ލިބޭކަށް ނޭދޭނެއެވެ.

އެހެންނަމަވެސް މޫނުމަތިން މާ ހެޔޮއެދޭ ބަޔަކަށް ވެގެން ތިބޭ އިރު، އެމީހުން ވަކި ކުރަން އުނދަގޫ ވާނެއެވެ. ޙަޤީޤަތުގައި އެއީ ތިބާއާ މެދު ހަސަދަވެރިވާ މީހުންނެވެ. އަދި އަޑި އަޑިން ވަރަށް ނުބައި ކަންތައްތައް ވެސް ކޮށްލާނެއެވެ. މިފަހަރު މި ހިމަނައިލަނީ، އެފަދަ "ފޭކު" އެކުވެރިންގެ ކިބައިގައި ހިމެނޭ ބައެއް ސިފަތަކެވެ.

1. ތިބާގެ ކުރިމަތީގައި މާ ރަނގަޅުވެގެން އުޅެފައި، ހަމަ ފަސްއެނބުރިލާ އިރަށް ތިބާގެ ގޯސް ވާހަކަ އެހެން މީހުން ކައިރީގައި ދައްކަން ފެށުން. މިފަދަ ކަންކަން ގިނަ ފަހަރަށް އެނގޭނީ އެހެން މީހުންގެ ފަރާތުން.

2. އަބަދުވެސް ތިބާގެ ގޯސް ސިފައެއް ދައްކައި، ރަނގަޅު ސިފަތައް ބަލައިގަންނަން ދެކޮޅު ހެދުން. އެފަދަ މީހުން ތިބޭނީ ކުށެއް ފެނޭތޯ ބަލަބަލާ. 

3. ތިބާއަށް މޮޅެއް ލިބުމުން ޤަބޫލުކުރަން ދަތިވާ ވަރަށް އުފާވެރިކަން ދައްކަން މަސައްކަތް ކުރުން. ޙަޤީޤަތުގައި އެމީހުން ތިބޭނީ ހަސަދައިން އަނދަ އަނދާ، އެކަމަކު މަސްނޫޢީ ޖަޒުބާތު ދައްކަން މަސައްކަތް ކުރާނެ 

4. އަބަދުވެސް ތިބާގެ ބޭނުން ކުރުން. އެމީހުން ގުޅާލައިގެން އުޅޭނީ ކަމަކު ޖެހުނީމަ އެކަނި.

5. އެހެން މީހުންގެ ކުރިމަތީގަ ތިބާއަށް ޖޯކު ޖެހުން. ސަމާސާއަކަށް ހަދާފައި ޙަޤީޤަތުގައި އެމީހުން އުޅޭނީ ތިބާގެ އަގު ވައްޓާލަން.

6. ކުޑަ ކަމެއް ވެސް ބޮޑު ކޮށްލައިގެން، މައްސަލައަކަށް ހަދައިގެން އުޅުން. އެކުވެރިކަން މާ އޮމާންކޮށް ދާނަމަ، ކޮންމެވެސް މައްސަލައެއް އުފައްދަން އެފަދަ މީހުން މަސައްކަތް ކުރާނެ. އެމީހުންނަކީ ޑްރާމާއަށް ލޯބިކުރާ މީހުން. 

7. ގިނައިން ދޮގު ހަދައި، އޮޅުވައިލުން. އެއީ ތިބާ ކިތަންމެ ދެރަވާ ކަމެއްގައި ވި ނަމަވެސް، އެމީހުން ބަލާނީ އެމީހުންގެ ކުށް ފޮރުވޭތޯ.

މީގެ ތެރެއިން ސިފައެއް ފެންނަ ނަމަ އެއީ ޙަޤީޤީ އެކުވެރިއެއް ނޫނެވެ. އެމީހަކާ އެންމެ ރަނގަޅު ވާނީ ދުރުވުމެވެ. ނޫންނަމަ ތިބާގެ ދިރިއުޅުން ހަލާކު ކޮށްލަން ވެސް އެފަދަ "އެކުވެރިން" ފަހަތަކަށް ނުޖެހޭނެއެވެ