ނިޔަފަތި ކެއުމަކީ ނުރަނގަޅު އާދައެއްކަން އެންމެން ވެސް ކިޔާ އަޑު އަހާނެއެވެ. ނަމަވެސް ނިޔަފަތި ކެއުމުން ދިމާވާ ކަންކަން ތަފްސީލުކޮށް އެނގެނީ ކިތައް މީހުންނަށް ހެއްޔެވެ؟

ނިޔަފަތި އަނގަޔަށްލައި ހަފާ އުޅޭ މީހުންނަށް ދިމާވާ މައްސަލަތަކުގެ ތެރޭގައި:

  • ނިޔަފަތިތަކުގެ އަޑީގައި ހުންނަ ޖަރާސީމުތައް އަނގަޔަށް ވަދެ، އޭގެ ސަބަބުން ފާޑުފާޑުގެ ރޯގާއާއި ބަލިތަކަށް މަގުފަހިވުން.
  • ނިޔަފަތި ހަފާ ކުޑަކުދިންގެ ދަތްތައް އުފެދުމުގައި އައިބުކަމަށް ދެއްކުން. މިސާލަކަށް ދަތްތައް އެކި ވަރުވަރަށް ފެޅުން ފާހަގަކޮށްލެވޭ.
  • ނިޔަފަތި ފަޅާފައި ހުންނަ އިނގިލީގެ "ނެއިލް ބެޑް" ގައި ފަންގަލް އިންފެކްޝަން އުފެދުން.
  • އަނގަޔަށް ދިމާވާ އެކިއެކި މައްސަލަތައް. މިސާލަކަށް، ކަތުރުކަށިގަނޑުގައި ރިހުން، އަނގައިގެ ސޮފްޓު ޓިޝޫތަކަށް ގެއްލުންވުން. 
  • ހަމަށް ޖެހޭ އިންފެކްޝަންތައް.
  • ނިޔަފަތިގަނޑު ބަލިކަށިވެ، ކަންވަނުން ފަދަ މައްސަލަތައް ދިމާވުން.

މި ކަމަކީ ކުޑައިރުން ފެށިގެން އާދަވެފައިވާ ކަމެއް ނަމަ، ބޮޑުވެގެން އެކަން ހުއްޓައިލަން ފަސޭހައެއް ނުވާނެއެވެ. އަދި އެއީ ގަސްތުގައި ކުރާ ކަމަކަށް ނުވާއިރު، ކަންތައްތަކާ ހާސްވެގެން އުޅޭ ވަގުތުގައި ނިޔަފަތި ކެވޭލެއް ގިނަވާނެއެވެ. އެއްބައި މީހުން ފޫހި ވެގެން އުޅޭއިރު ވެސް ނިޔަފަތިތައް އަނގައަށް ލައިގެން ހަފާލަ ހަފާލައި ހުރެދާނެއެވެ. ނުވަތަ ކަމަކާ ވިސްނަމުން ދާ ވަގުތެއްގައި ނިޔަފަތި ކެއުމުން ވިސްނޭލެއް މާ ރަނގަޅު ކަމަށް ހީވެދާނެއެވެ. ނަމަވެސް އެއީ ހުސް ކުށްހީ އެވެ. 

ދިރާސާތަކުން ދައްކާ ގޮތުގައި، ކުޑަކުދިންނާއި ފުރާވަރުގެ ކުދިންގެ ދެބައި ކުޅައި އެއްބައި ކުދިންނަކީ ނިޔަފަތި ކެއުމުގެ އާދަ ހިފާފައިވާ ކުދިންނެވެ. އަދި އޭގެތެރެއިން ގިނަކުދިން ބޮޑުވެގެން އަންނައިރު ވެސް އެ އާދައާ ދުރެއް ނުވެވެއެވެ. ވީމާ، ނިޔަފަތި ކާ ކުއްޖެއް، ނުވަތަ މީހެއް އެނގޭ ނަމަ މިގޮތަށް ކަން ކުރުމަށް ލަފާ ދޭށެވެ. ނުވަތަ ތިބާއަކީ ނިޔަފަތި ކެވޭ މީހެއް ނަމަ މިގޮތަށް ކަންތައް ކޮށްގެން ހުއްޓޭތޯ ބަލައިލާށެވެ. މިއީ ނިޔަފަތި ކެއުމުގެ އާދައާ މަޑުމަޑުން ދުރުކޮށްދޭނެ ބައެއް ކަންތައްތަކެވެ.

1. ޤަވާއިދުން ނިޔަފަތި ކެނޑުން

ނިޔަފަތި ކިރިޔާވެސް ދިގު ވެލާއިރަށް ނިޔަފަތި ކަނޑާ ދަތްޗަކުން ކަނޑާލާށެވެ. އޭރުން ނިޔަފަތިތައް އަނގައަށް ލައިގެން އުޅޭއިރު، ހަފާނެ ނިޔަފައްޗެއް ނުހުންނާނެއެވެ. 

2. ހިތި އެއްޗެއް ނިޔަފަތީގައި އުނގުޅާފައި ބެހެއްޓުން

މިއީ މޮޔަ ކަމެއް ކަމަށް އެންމެ ފުރަތަމަ ހީވިޔަސް، މިކަމުގެ ސަބަބުން ނިޔަފަތި ކެއުން ހުއްޓުމަށް މަގުފަހިކޮށްދޭނެއެވެ. ސަބަބަކީ، ނިޔަފަތިތައް އަނގައަށް ލެވޭ ކޮންމެ ފަހަރަކު ހިތި ރަހަ ލަންޏާ، އެކަން ކުރަން ފަސްޖެހޭނެތީއެވެ. މި އުކުޅަކީ، ކުޑަކުދިންނަށް ގާތުދިނުން ހުއްޓައިލުމަށް ވެސް ބޭނުންކުރާ ޒާތުގެ އުކުޅެކެވެ. 

3. އަންގި ލައްވާފައި ބެހެއްޓުން

މިއީ ވެސް މޮޔަ ކަމެކޭ ހީވެދާނެއެވެ. އެހެންނަމަވެސް، އަތަށް އަންގި އަރުވާފައި ބެހެއްޓުމަށް، ނިޔަފަތި ކެއުމަށް އެޅޭ ހުރަހަކަށް ވާނެއެވެ. 

4. އަނގައާއި އަތް ބިޒީކޮށް ބެހެއްޓުން

ނިޔަފަތި ކެވެން އުޅޭހެން ހީވާނަމަ، އަތުން ކޮންމެވެސް އެހެން ކަމެއް ކޮށްލާށެވެ. މިސާލަކަށް، އެއްޗެއް ލިޔުން، ނުވަތަ ވިޔުން ފަދަ މަސައްކަތެއް ހޮބީއެއްގެ ގޮތުގައި ކުރެވިދާނެއެވެ. މުހިއްމު ކަމަކީ، ނިޔަފަތިތައް އަނގައަށް ލުމަށް ވަގުތު ނުދިނުމެވެ. ހަމަ އެގޮތަށް، އަނގަޔަށް ޗުވިންގ ގަމެއް ލައިގެން ހަފާލަ ހަފާލައި ހުރުމުން، ނިޔަފަތި ހެފުމާ ދުރުކޮށްދޭނެއެވެ.

މި ކަންތައްތަކަކީ ދުވަސްކޮޅެއް ވަންދެން ތަކުރާރުކޮށް ކޮށްފިނަމަ، ނިޔަފަތި ކެއުމުގެ އާދައާ ދުރުކޮށްދޭނެ ކަންތައްތަކެވެ.