ޒާތީ ދިރިއުޅުމުގައި ދިމާވާ ކަންކަން މީސްމީޑިއާގައި ހިއްސާކުރުމަކީ އެއް ބަޔަކަށް ހިތްހަމަޖެހުން ލިބޭ ކަމެކެވެ. އަހަރެމެން ދިވެހިންގެ ތެރޭގައި މިކަން ވަރަށް ބޮޑަށް އާންމުވެފައި ވާއިރު، މިކަމުން ލިބޭ ގެއްލުންތަކަށް ވިސްނައިލަނީ ކިތައް މީހުން ބާއެވެ؟

ހާއްސަކޮށް ޓިކްޓޮކް ޕްލެޓްފޯމު ވުޖޫދަށް އައި ފަހުން، ދެމަފިރިން ދޭތެރޭގައި ޖެހޭ މައްސަލަތައް ހިފައިގެން ދާން ހުރި "ކޯޓަކީ"ވެސް މިހާރު އެޔޭ ހީވެއެވެ. އެހެން ޤައުމުތަކުގެ މީހުން ޓިކްޓޮކް ބޭނުންކޮށްގެން އެމީހުންގެ ހުނަރުތައް ދައްކައި ބެލުންތެރިންގެ ލޯބި ހޯދަމުން ދާއިރު، ބައެއް ދިވެހިންނަށް ޓިކްޓޮކަކީ ޒުވާބު ކުރާ މައިދާނެކެވެ. އެގޮތުން ބޮޑެތި ލައިވްތައް ހުޅުވައި، އެކަކު އަނެކަކަށް ހަޑިހުތުރު ބަހުން މުއާމަލާތްކުރާއިރު، މިއީ ކިހާ ދަށުދަރަޖައިގެ ކަމެއް ކަން ރޭކާނުލައެވެ. 

ޓިކްޓޮކް ނޫނަސް، އެހެނިހެން މީސްމީޑިއާ ޕްލެޓްފޯމުތަކުގައި ވެސް މީހާގެ ޒާތީ ކަންކަން ހިއްސާކުރުމަކީ ވަރަށް އާދައިގެ، ކުޑަ ކަމެއް ކަމަށް ގިނަ ބަޔަކަށް އޮންނަނީ ހީވެފައެވެ. އެހެންނަމަވެސް، ޒާތީ ދިރިއުޅުމުގެ ކަންކަން އެނގެން ނުޖެހޭ މީހުންނަށް އަންގައިގެން އޭގެން ނޭދެވޭ ނަތީޖާއެއް ނުކުތުން ވަރަށް ގާތެވެ. މިފަހަރު މި އަލިއަޅުވައިލަނީ، ޒާތީ ދިރިއުޅުން މީސްމީޑިއާގައި ހިއްސާ ނުކުރަން ޖެހޭ ބައެއް ސަބަބުތަކަށެވެ.

1. އެންމެންނަކީ ތިބާގެ ރައްޓެހިންނެއް ނޫން

ހާހުން ދެހާހުން ފޮލޯވަރުން ތިއްބަސް، އެ އެންމެންނަކީ ތިބާގެ ރައްޓެހިންނަށް ނުވެދާނެއެވެ. އެހެންކަމުން، އެއްވެސް ގޮތަކަށް ދެކެފަރިތި ނޫން މީހުންނަށް އެނގެން ނުޖެހޭ ކަންކަން މީސްމީޑިއާގައި ހިއްސާކުރުމުން، ތިބާއާމެދު މުޖުތަމަޢު ދެކޭ ގޮތަށް އަސަރު ކުރެއެވެ. 

2. އެއްވެސް މީހަކަށް ކިޔައިދޭން މަޖުބޫރު އެއްޗެއް ނޯންނާނެ

ޒާތީ ދިރިއުޅުމުގެ އެއް ކަންތައް ހިއްސާކޮށްފިއްޔާ، އެއާ ގުޅޭ އަނެއް ކަންތައް ވެސް އޮންނަނީ ހިއްސާކުރަން ޖެހިފައެވެ. މިސާލަކަށް ދެމަފިރިން ވަރިވެގެން އެވާހަކަ މީސްމީޑިއާގައި ހިއްސާކޮށްފިނަމަ، ވަރިވި ސަބަބު އެނގެން މީހުން ބޭނުންވެއެވެ. އެ ސަބަބު ކިޔައިނުދޭން އުޅޭނަމަ، އެމީހެކޭ ކިޔައިގެން ދޮގު ވާހަކަ ފަތުރައިގެން، އެންމެފަހުން އެމީހަކަށް ކެތްނުވެގެން، ހަގީގީ ސަބަބު ކިޔައިދޭން މަޖުބޫރުވާ ތަން އެބަ އާދެއެވެ. ނަމަވެސް މިފަދަ ޒާތީ ކަންކަން ހިއްސާނުކުރާނަމަ، އެއްވެސް މީހަކަށް ދޭން ޖެހޭ "އެކްސްޕްލެނޭޝަނެއް" ނޯންނާނެއެވެ. އޭރުން މާ ބޮލަށް ފަސޭހަވެސް ވާނެއެވެ. 

3. ސިކުނޑިއަށް ލުއި ވާނެ

ޒާތީ ކަންކަން މީސްމީޑިއާގައި ހިއްސާކުރާ މީހާއަށްވުރެ، ނުކުރާ މީހާގެ ސިކުނޑިއަށް ލިބޭ ލުއި ބޮޑުވާނެ ކަމަށް ސައިކޮލޮޖީ އިން އަންގައެވެ. އެއީ، ގިނަ ބަޔަކަށް އަބަދު ޒާތީ ކަންކަމުގެ ވާހަކަ ހިއްސާކުރާ މީހާގެ ސިކުނޑީގައި އަބަދުވެސް އޮންނާނީ އެކަންތަކެވެ. އެއްގޮތަކުން އެއީ ދެވިހިފާ ކަމެއް ވެސް މެއެވެ. ނަމަވެސް އެކަން އެގޮތަށް ނުކުރާ މީހާއަށް، އަމިއްލަ ނަފްސުގެ ކޮންޓްރޯލު އޮތް ކަމުގެ އިހުސާސް ކުރެވޭނެއެވެ. 

 

4. ރައްކާތެރިކަން

ޒާތީ ދިރިއުޅުމުގެ ކަންކަން ނުދަންނަ ބަޔަކާ ހިއްސާކޮށްގެން ލަނޑު ލިބޭތަން ވެސް އާދެއެވެ. ހަސަދަވެރިކަމާއި، އެސްފީނާއަކީ ހަގީގީ ކަންކަމެވެ. އެހެންކަމުން، ދެރަ ކަމެއް މެދުވެރި ނުވަނީސް، ޒާތީ ކަންކަން މީސްމީޑިއާގައި ހިއްސާކުރާ ވަރު މަދުކުރަން އެބަޖެހެއެވެ. 

 

5. ގުޅުންތައް ރަނގަޅުވޭ

ތިބާގެ ޒާތީ ކަންކަން އެނގޭ މީހުން "ލިމިޓް"ކޮށްގެން ގެންގުޅުމުން، ހަގީގީ ރައްޓެހިންނަކީ ކޮން ބައެއްކަން އެނގެން ފަސޭހަވެއެވެ. އަދި މީހުންނާމެދު އޮންނަ އިތުބާރު ބޮޑުވެ، އެމީހުންވެސް ތިބާއަށް އިތުބާރުކުރާވަރު ބޮޑުވާނެއެވެ. ނަތީޖާއެއްގެ ގޮތުން، އާއިލާ އާއި ރައްޓެހިންނާ ދޭތެރޭ ތިބާގެ އޮންނަ ގުޅުން ރަނގަޅުވެގެންދެއެވެ.