ބައެއް ފަހަރު ފެންވަރައިގެން ނުކުންނަ ގޮތަށް އިސްތަށިގަނޑު ރަނގަޅަށް ނުހިކެނީސް ނިދޭ ގޮތްވެއެވެ. ނަމަވެސް، މިއީ އިސްތަށިގަނޑަށް ގެއްލުންވާ ކަމެކެވެ.

ފުރަތަމަ ކަމަކަށް، އިސްތަށިގަނޑު ރަނގަޅަށް ނުހިއްކައި ނިދުމުން ބޯތެރެ ހިރުވާ ގޮތްވެއެވެ. އަދި ބައެއް އިސްތަށިތައް މެދުން ބިނދި، އިސްތަށި ފޭބުމަށްވެސް މަގުފަހިވެއެވެ. މީގެ އިތުރުން:

1. ގޮށްޖެހުން

އިސްތަށިގަނޑު ތެތްކޮށް އޮންނައިރު ވަރަށް ނާޒުކު ވާނެއެވެ. އަދި އެހެން އޮންނަ އިރު މާ ފަސޭހައިން ބޮލުގައި ގޮށް ޖެހޭކަން ވެސް ފާހަގަކުރެވޭނެއެވެ. ދެން އެހެން ހުއްޓައި ނިދުމުން، ގޮށްޖެހުމުގެ ފުރުސަތު އިތުރަށް ބޮޑުވެގެންދެއެވެ. އަދި ނިދައި ހޭލާއިރު، ފިލުވަން އުނދަގޫ ވާ ވަރަށް ބޮލުގައި ގޮށްޖެހިފައި ހުންނަކަން ފާހަގަކުރެވޭނެއެވެ.  

2. ކިފުޅިވުން

ބޮލުގެ އިސްތަށިތައް ތެތްކޮށް އޮއްވައި ނިދަން އޮށޯތުމުން، އިސްތަށިތަކާއި ބާލީހާއި ދެމެދު އުފެދޭ ފްރިކްޝަން މާ ބާރުގަދަ ވާނެއެވެ. ނަތީޖާއެއްގެ ގޮތުން، އިސްތަށިގަނޑު ހިކިގެން ގޮސް ކިފުޅިވުން ދިމާވެއެވެ.

3. ބޮލުގައި ރިއްސުން

ތަޖުރިބާކާރުން ބުނާ ގޮތުގައި، އިސްތަށިގަނޑު ތެތްކޮށް އޮއްވައި ނިދުމުން، ހަށިގަނޑުގެ ފިނިހޫނުމިން ދަށްވެއެވެ. މިކަމުގެ ސަބަބުން ދަށްވި ފިނިހޫނުމިން ރަނގަޅު ވަރެއްގައި ހިފެހެއްޓުމަށް ހަށިގަނޑު ގަދަޔަށް މަސައްކަތް ކުރާނެއެވެ. މިއީ ބޮލުގައި ރިއްސަން މެދުވެރިވާ ކަމެއް ކަމަށް ތަޖުރިބާކާރުން ބުނެއެވެ. ހަމައެހެންމެ، ބޮލުގައި ތުވާލި އޮޅައިގެން ނިދުމުން ވެސް ތަދު އިޙުސާސްވެ ނިދަން އުނދަގޫ ވާނެއެވެ.

4. މޫނުގެ ހަންގަނޑަށް ވެސް ގެއްލުންވޭ

ނިދާފައި އޮންނަ އިރު ތެތްކޮށް ހުންނަ އިސްތަށިތައް މޫނުގައި ޖެހި، ކޮޓަރީގެ ފިނިހޫނުމިނާ އެކުވެގެން ހަންގަނޑުގައި ބެކްޓީރިއާ އުފެދުމަށް މަގުފަހިވެއެވެ. މިކަމުގެ ސަބަބުން މޫނުގެ ހަންގަނޑަށް ވެސް ބައެއް މައްސަލަތަކާ ކުރިމަތިލާން ޖެހެއެވެ.

ވީމާ، ނިދުމުގެ ކުރިން ރަނގަޅަށް ބޯ ހިއްކުމަށް ސަމާލުކަން ދޭންވާނެއެވެ