އީ-ސިނގިރޭޓް ނުވަތަ ވޭޕް އަހަރެމެން ތެރޭގައި އާންމުވެފައި އޮތް މިންވަރަކީ، ދަރިން މައިންބަފައިންގެ ކުރިމަތީގައި، އަދި ދަރިވަރުން ސްކޫލުތަކުގައި އެއްވެސް ޖެހިލުމެއް ނެތި މިކަން ކުރަމުން ދިޔުމެވެ. މިއީ އެންމެންގެ ސަމާލުކަމަށް ގެނެސް، ހަރުކަށި ފިޔަވަޅުތަކެއް އަޅަންޖެހޭ ނުރައްކާ މައްސަލައެކެވެ.

ވޭޕްގެ އެކިއެކި ފްލޭވާތައް ވިއްކަން ހުންނައިރު، އޭގެން ދުވަނީ މީރު ވަހެކެވެ. މިއީ މީގެ ނުރައްކާ ގިނަ ބެލެނިވެރިންނަށް މާ ސީރިއަސް ކަމެއްގެ ގޮތުގައި ނުނެގޭ އެއް ސަބަބެވެ. އަދި މި ވިއްކާ ބައެއް މީހުން މީތި އިސްތިހާރުކޮށްފައި ހުންނަނީ، ސިނގިރޭޓާ ދުރުވާން އޮތް "އަލްޓަނޭޓިވް" ނުވަތަ ބަދަލެއްގެ ގޮތުގައެވެ. ސިނގިރޭޓުން ދުވާ ނުބައި ވަސް ނުދުވިއެއް ކަމަކު، ވޭޕަކީ ސިނގިރޭޓަށްވުރެ ސިއްޙަތަށް ގެއްލުންހުރި އެއްޗެއް ކަމަށް ދިރާސާތަކުން ވަނީ ދައްކައިފައެވެ. 

އެގޮތުން، މިފަހުން އެމެރިކަން ކޮލެޖް އޮފް ކާޑިއޮލޮޖީ އިން ކުރި ދިރާސާއަކުން ހާމަވީ، ވޭޕް ބޯ މީހުންގެ ހިތް ފެއިލް ވުމުގެ ފުރުސަތު، އެ ނުބޯ މީހުންނަށްވުރެ 20% މަތީގައި އުޅޭ ކަމެވެ. މިއީ އަދުގެ ޒުވާނުން ވިސްނާލަންޖެހޭ އިންޒާރެކެވެ. 

ރަނގަޅު ސިއްޙަތުގައި ތިބޭ ޒުވާނުން ކުއްލިއަކަށް މަރުވާ ވާހަކަ އިވޭ މިންވަރު އިތުރުވެފައި އޮތް އިރު، އެއީ ކީއްވެގެން ވާ ކަމެއްތޯ ބަލަން އެބަޖެހެއެވެ. 

ކަންކަންމަތީގައި ތިބެގެން ވޭޕުން ދުން އެރުވުން ކުޑަކުދިންގެ މެދުގައި ވެސް "ކޫލް" ކަމަކަށް ވަމުން ދާއިރު، މިއީ ބެލެނިވެރިން އިތުރަށް ސަމާލުވާންވީ ކަމެކެވެ. ވޭޕަކީ އޭގެ ޒާތުގައި އިންތިހާއަށް ނުރައްކާ އެއްޗަކަށް ވާއިރު، އޭގެ މައްޗަށް ވޭޕްގެ ފްލޭވާތަކުގެ ތެރޭގައި މަސްތުވާ ފްލޭވާ ވިއްކަން ވެސް މި ވަނީ ފަށައިފައެވެ. އެގޮތުން ރާއްޖެ އަށް އެތެރެކޮށްގެން އެންމެ ގަދަ އަށް ވިއްކަމުން ދަނީ ކެނަބިޑިއޯލް (ސީބީޑީ) އާއި ޓެޓްރަހައިޑްރޯ ކެނަބިނޯލް (ޓީއެޗްސީ) ގެ ވޭޕް ފްލޭވާ ކަން ވަނީ ހާމަވެފައެވެ. 

މަސްތުވާ ވޭޕް ފްލޭވާ ވިއްކާ މާކެޓުތައް ގަދަޔަށް ހިންގަނީ ޓެލެގްރާމު މެދުވެރިކޮށެވެ. މިކަން ފުޅާވެފައި އޮތީ ތި ހީކުރާ ވަރަށްވުރެ ބޮޑަށެވެ. ފަޅު ގޭގޭ ތަކުގައާއި، އެޕާޓުމެންޓުތަކުގައި ސިއްރުން ތިބެ މަސްތުވާ ތަކެތި ބޭނުން ކުރި ޒަމާން މިހާރު މި ދަނީ މަޑުމަޑުން ބަދަލުވަމުންނެވެ. މިހާރު އެއްވެސް ލަދެއް ނެތި މަސްތުވާ އެެއްޗެހި ހިފައިގެން ނުކުންނަނީ އާންމުންގެ ތެރެއަށެވެ. މިކަމުގައި ބޮޑެއް ކުޑައެއް ކިޔާނެ ކަމެއް ނެތެވެ. 

ވަގުތީ އުފަލަކަށް ވިޔަސް، ނުވަތަ "ކޫލް" ވުމުގެ ނިޔަތުގައި ވިޔަސް، ވޭޕުން ތި އަރުވާ ދުމާހެދި ފަހުން ހިތާމަކުރަން ޖެހޭނެއެވެ. ވޭޕަކީ ދެވިހިފާ އެއްޗެކެވެ. އޭގެ ތެރެއަށް މަސްތުވާ އެއްޗެހި ވަނުމުން ވާނެ ގޮތް ދެން ވިސްނާލާށެވެ. ވޭޕާ ދެކޮޅަށް ބެލެނިވެރިންނާއި ސްކޫލުތަކުން ވެސް ހޭލާ ތިބެންވީ މިހެންވެގެންނެވެ. މިކަމަށް އެޅެން އޮތް އެންމެ ހަރުކަށި ފިޔަވަޅު އެޅުން ލަސް ވެސް ވެއްޖެއެވެ. ވޭޕުގެ ދުމުގައި ޖެހިގެން ޖީލެއް ހަލާކުވެގެން ދާ ތަން ބަލަން ދެން ވެސް ހަމަ ތިބެންވީ ހެއްޔެވެ؟