ބަދިގޭގައި ހުންނަ އުނދުނާއި މައިކްރޯވޭވަކީ ކޮންމެ ދުވަހަކު ފޮހެ ސާފުކުރާ އެއްޗިއްސަށް ވެދާނެއެވެ. އެއީ އެ އެއްޗެހި ހަޑިވުމުން ނިކަން ފަސޭހައިން ލޮލުގައި އަޅައިގަންނާތީއެވެ. އެކަމަކު ހަމަ އެފަދައިން، ކޮންމެ ދުވަހަކު ނޫނަސް، ސާފުކުރަން ޖެހޭ އެހެން އެއްޗެއް ބަދިގޭގައި ވާކަން އެނގޭ ހެއްޔެވެ؟

އެއީ ކާ އެއްޗެހި ރައްކާކޮށްފައި ބަހައްޓާ އައިސް އަލަމާރިއެވެ. އައިސް އަލަމާރީގެ އެތެރެ ފެންނާނީ ދޮރު ހުޅުވައިގެން ބެލީމައެވެ. އެހެންކަމުން، އަބަދު ލޯ ކުރިމަތިން ފެންނަން ހުންނަ އެއްޗަކަށް ނުވާތީ، ގިނަ ފަހަރަށް އޭގެ ސާފުތާހިރުކަމާމެދު ފަރުވާކުޑަ ކޮށްލެވޭ ގޮތް ވެއެވެ. އެހެންނަމަވެސް، ކާބޯތަކެތި ރައްކާ ކޮށްފައި ބަހައްޓާ އެއްޗަކީ، ސާފުތާހިރު އެއްޗަކަށް ވުން ވަރަށް މުޙިއްމެވެ. މިފަހަރު ކިޔައިދޭން މި އުޅެނީ، އައިސް އަލަމާރި ސާފުކޮށް ބެހެއްޓުމަށްޓަކައި ސަމާލުކަންދޭންވީ ބައެއް ކަންތައްތަކެވެ.

އެންމެ ފުރަތަމަ ކަމަކަށް، އައިސް އަލަމާރީގެ އަތްގަނޑާއި ގޮބުތައް ކޮންމެ ދުވަހަކު ސާފުކުރަން ވާނެއެވެ. މިކަމަށް ޚާއްސަ އެންޓި-ބެކްޓީރިއަލް ވައިޕް އެއް (ކާބޯތަކެއްޗަށް ރައްކާތެރި) ގެންގުޅުމުން ފަސޭހަ ވާނެއެވެ. މީގެ އެއް ސަބަބަކީ، ބައެއް ފަހަރު ކާ އެއްޗެއް ތައްޔާރުކުރަން ހުރެފައި އަތުގައި އެއްޗެއް ހޭކިފައި ހުރިކަން ނޭނގި އައިސް އަލަމާރި ހުޅުވޭ ތަން އަންނާތީއެވެ. 

ދެވަނަ ކަމަކަށް، އައިސް އަލަމާރީގެ ތެރެއަށް އެއްޗެއް ބަންޑުންވާ ހިސާބުން ވަގުތުން ވަގުތަށް އެތަނެއް ސާފުކުރަން ވާނެއެވެ. އެއީ ކިތަންމެ ކުޑަކުޑަ އެތިކޮޅެއް ކަމުގައި ވިޔަސް ވެހެވެ. ފަހުން ސާފުކުރަން ބަހައްޓައިގެން ހަނދާން ނެތި، އެ ބަންޑުންވި އެއްޗެއްގެ އަސަރު ދެން ހުރި ކާބޯތަކެއްޗަށް ފޯރަފާނެއެވެ. އަދި އެއީ އައިސް އަލަމާރީގެ އެތެރޭގައި ޖަރާސީމު އުފެދުމަށް މަގުފަހިވާ ކަމެއް ވެސް މެއެވެ. ކާބޯތަކެތި އަބަދުވެސް ރައްކާކުރަން ވާނީ ބޭރަށް ބަންޑުން ނުވާނޭހެން ބާރަށް މަތިޖެހޭ (އެއާ ޓައިޓް ކޮންޓެއިނާ) އެއްގައެވެ. 

ހަފްތާއަކު އެއްފަހަރު، އައިސް އަލަމާރީގެ ތެރޭގައި ހުރި ފުޅިތަކާއި ދަޅުތައް ނަގައިގެން، މުއްދަތު ހަމަވާން ކައިރިވެފައި ހުރި އެއްޗެހި ނައްތާލަން ވާނެއެވެ. އަދި ކައްކާފައި ހުންނަ އެއްޗެހި އައިސް އަލަމާރީގައި ރައްކާކުރާއިރު، އެ އެއްޗެއްގެ ބާވަތަށް ބަލާފައި މާ ގިނަ ދުވަސް ވަންދެން ބަހައްޓައިގެން ނުވާނެއެވެ. މިސާލަކަށް ބަތް، ސްޕެގެޓީ، ޕިއްޒާ ފަދަ ތަކެތި ދެދުވަހަށް ވުރެ ގިނައިން ބެހެއްޓުމަކީ ބުއްދިވެރި ކަމެއް ނޫނެވެ. 

ކޮންމެ ތިން މަހަކުން އެއްފަހަރު، އައިސް އަލަމާރި އެއްކޮށް ރީތިކޮށް ސާފުކުރަން ވާނެއެވެ. މިއަށް ކިޔަނީ ޑީޕް-ކްލީން ކުރުމެވެ. މިގޮތަށް ސާފުކުރާ އިރު، އެ ގެއެއްގައި ހުންނަ އައިސް އަލަމާރީގެ މެނުއަލް ފޮތުގައި އޮންނަ އެންމެ ރައްކާތެރި ގޮތް އިޚުރިޔާރުކުރުން އެދެވިގެން ވެއެވެ. އާންމު ގޮތެއްގައި އައިސް އަލަމާރި ޑީޕް-ކްލީން ކުރާނީ، ސްވިޗު ނިއްވާލައިގެންނެވެ. އޭގެ ފަހުގައި، އެތެރޭގައި ހުރި ހުރިހާ އެއްޗެއް (ރައްކާކޮށްފައި ހުރި ކާބޯތަކެތި) ނަގައި ދުރުގައި ބެހެއްޓުމަށްފަހު، ހުރިހާ ވަތްގަނޑެއް ވަކިން ވަކިން ނަގައިގެން، ސައިބޯނި ފެނުން (އެދެވިގެން ވަނީ ހޫނުފެން) ދޮވެލާނީއެވެ. 

އައިސް އަލަމާރި އަކީ ސާފުނުކޮށް ދޫކޮށްލައިފި ނަމަ، ޖަރާސީމުގެ ހާއްޔަކަށް ވެގެންދާ އެއްޗެކެވެ. އެހެންކަމުން ކޮންމެ މީހަކު ވެސް މިކަމަށް ހާއްސަ ސަމާލުކަމެއް ދިނުން މުޙިއްމެވެ.