ކުޑަކުދިންނަކީ މާހައުލު ފަޅުފިލުވައިދީ، ތަނަށް ދިރުން ގެނެސްދޭ ބައެކެވެ. ބޮޑެތި މީހުންހެން ހުރިހާ ކަމެއްގައި "ސީރިއަސް" ވެ ތިބުމަށްވުރެ ބޮޑަށް އެކުދިން ބަލާނީ ކުޅެ މަޖާ ކުރެވޭތޯއެވެ. އަދި ބޮޑެތި މީހުން ވެސް ގިނަ ފަހަރަށް ކުޑަކުދިންނާ ސަމާސާކުރާ ހިތްވެއެވެ. އެހެންނަމަވެސް، އެގޮތަށް ކުރާ ސަމާސާގައި ގިރާ ކުރަން ނުޖެހޭ މައުޞޫތަކެއް ވެއެވެ.

ތިރީގައި މި އަލިއަޅުވައިލަނީ، މަޖަލަކަށް ނަމަވެސް ކުދިންނާ ސަމާސާކޮށް ނުވަތަ މަލާމަތްކޮށްގެން ނުވާނެ ކަންތައްތަކެވެ.

ކުއްޖާގެ ސިފަ:

ކޮންމެ ކުއްޖަކު ވެސް އުފެދިފައި ހުންނާނީ ތަފާތު ކޮށެވެ. ކުއްޖާ ހުންނަ ގޮތަކާ ގުޅުވައިގެން މަޖަލަކަށް ވިޔަސް މަލާމަތް ކޮށްގެން ނުވާނެއެވެ. މިސާލަކަށް "ކަޅު،" ،"ފަލަ"، "ހިކި" މިފަދަ ބަސްތައް ބޭނުންކޮށްގެން ކުއްޖާއަށް ފާޑުކިޔައިފި ނަމަ، އެކަމުން އެކުއްޖެއްގެ އަމިއްލަ ނަފްސަށް އޮންނަ އިތުބާރު ވަރަށް ބޮޑުތަނުން ކުޑަވެގެން ދާނެއެވެ. އަދި އަމިއްލަ މީހާއާމެދު ދެކޭގޮތް ބަދަލުވެ، އެހެން ކުދިންނާ އަޅާކިޔެން ފަށާނެއެވެ. ހަމަ އެގޮތަށް، ކުއްޖާގެ ހުންނަ އައިބަކާ ގުޅުވައިގެން ވެސް ސަމާސާ ކޮށްގެން ނުވާނެއެވެ. 

ސޯޝަލް ސްކިލްސް:

ސޯޝަލް ސްކިލްސް ގެ މާނައަކީ، އިޖުތިމާޢީ ގުޅުން ބަދަހިކުރަން ކުއްޖާ ކުރާ ކަންތައްތަކެވެ. އެއްބައި ކުދިންނަކީ ވަރަށް ފަސޭހައިން ރައްޓެހިން ހޯދައި، ވާހަކަ ދައްކައި އެކުވެރިކޮށް އުޅޭ ކުދިންނެވެ. ނަމަވެސް، އެއާ ޚިލާފަށް ލަދުރަކި، ބަސްމަދު ކުދިން ވެސް އުޅެއެވެ. އެކުދިންގެ ހުންނަ ލަދުރަކި ކަމަށް ޖޯކު ޖަހައި ސަމާސާއަކަށް ހަދައިފި ނަމަ، ބޮޑުވެގެން އަންނަ އިރު މުޖުތަމަޢުއާ ކުރިމަތިލާން އިތުރަށް އުނދަގޫ ވެގެން ދާނެއެވެ. އެގޮތުން އެކުދިންގެ ކިބައިގައި ސޯޝަލް އެންޒައިޓީ އުފެދުމުގެ ފުރުސަތު އޮންނަ ކަމަށް އެމެރިކަން ސައިިކޮލިޖިލަކް އެސޯސިއޭޝަނުން ހެދި ދިރާސާއަކުން ދައްކައެވެ.

ކިޔެވުމާ ގުޅުވައިގެން:

ކުއްޖާއަށް ޓެސްޓުން ލިބޭ ނަތީޖާއާ ގުޅުވައިގެން މަލާމާތްކޮށް ނުހަދާށެވެ. އެކި ކުދިންނަށް އެއްޗެހި ފަހުމްވެ، ދަސްވާ މިންވަރު ހުންނާނީ އެކި ވަރުގައެވެ. އެހެންކަމުން، ކިޔެވުމަށް "ދަށް" ކުއްޖާއަށް ވެސް ރަނގަޅު ގޮތުގައި ހިތްވަރުދީގެން މޮޅުކުރަން މަސައްކަތް ކުރާށެވެ. އޭގެ ބަދަލުގައި މަލާމާތްކޮށް ޖޯކު ޖަހައި ހަދާނަމަ، ނަފްސާނީ ގޮތުން ބައިވަރު އަސަރުތައް ކުރެއެވެ. އަދި ކިޔެވުމަށް ހުންނަ ޝައުގު ކެނޑި، ކިޔެވުމާ ދުރުވާ ތަން ވެސް އާދެއެވެ.

ކުއްޖާ ޝައުގު ހުންނަ ކަންކަން:

ކުޑައިރަކީ ކުއްޖާގެ ޝައުގުވެރިކަން އެކި ކަންކަމަށް ދާ ދުވަސްވަރެވެ. ކުޑައިރު އެންމެ ބޮޑަށް ޝައުގުވެރިކަން ހުންނަ ކަމަކީ، ބޮޑު ވެގެން އެކުއްޖާ ވާން ބޭނުންވާ މީހާ، ނުވަތަ ކުރިއަށް ދާން ބޭނުންވާ ދާއިރާ އަންގައިދޭ ކަމަކަށް ވެސް ބައެއް ފަހަރު ވެދާނެއެވެ. މިސާލަކަށް، ދިރޭ އެއްޗެހި ދެކެ ގަޔާވާ ކުއްޖާ އަކީ ބޮޑުވެގެން ޑޮކްޓަރަކަށް ވާ މީހާ އަށް ވެދާނެއެވެ. ނުވަތަ، މާ ގިނައިން ބޯޅަ ކުޅެ، ކުޅިވަރު ޕްރޮގްރާމްތައް ބަލަން ޝައުގުވެރިވާ ކުއްޖާ ބޮޑުވެގެން މޮޅު ކުޅިވަރު ކުޅުންތެރިޔަކަށް ވެސް ވެދާނެއެވެ. އެހެންކަމުން، ކުދިންގެ ޝައުގު ހުންނަ ކަންކަމާ ގުޅުވައިގެން މަލާމާތް ކުރުމުގެ ބަދަލުގައި، އެއީ ރަނގަޅު ކަމެއް ނަމަ އެކަމަކަށް ބާރުއަޅާށެވެ. 

އިޙުސާސްތައް:

ކުޑަކުއްޖަކު އެކުއްޖެއްގެ އިޙުސާސްތައް އެކްސްޕްރެސް ކުރާ ގޮތާ ގުޅުވައިގެން ސަމާސާކޮށް ހީނ ނުހަދާށެވެ. މިސާލަކަށް ކުއްޖަކު ރޯން ހުއްޓައި ހީނ މަލާމާތް ކުރާނަމަ، ދެން ފަހަރަކުން ކަމަކާ ދެރަވެގެން ރޯން ޖެހިލުންވެދާނެއެވެ. އަދި އިހުސާސްތައް ބޭރުކުރަން ނުކެރި، އެތެރޭގައި ބަހައްޓައިގެން ހުންނަން ފަށާފާނެއެވެ. މިއީ ނަފްސާނީ ގޮތުން އެތައް މައްސަލަތަކެއް ކުރިމަތިކުރުވާނެ ކަމެކެވެ. 

ބިރު ގަންނަ ކަންކަން:

އެކި މީހުން ބިރު ގަންނަ އެކި ކަންކަން ހުރެއެވެ. އަނދިރި ދެކެ ބިރު ގަންނަ މީހުންނާއި، އުސް ތަންތަން ދެކެ ބިރު ގަންނަ މީހުންނާއި، ބުޅާ ފަދަ ޖަނަވާރުދެކެ ބިރު ގަންނަ މީހުން ވެސް އުޅެއެވެ. ކުޑަކުދިންގެ މެދުގައި ވެސް މިކަން އޮންނަނީ މިހެންނެވެ. ކުއްޖަކު ބިރު ގަންނަ ކަމަކާ ގުޅުވައިގެން މަލާމާތް ކުރާނަމަ، ކްރޮނިކް އެންޒައިޓީ ގެ މައްސަލަތަކަށް މަގުފަހިވާ ކަމަށް ދިރާސާއިން ދައްކައެވެ.