ސަންސްކްރީން އަކީ ކަޅުވެދާނެތީ ބޭނުންކުރާ އެއްޗެއް ކަމަށް ހީވެފައި އޮންނަ ޒަމާން ހިނގައްޖެއެވެ. ދިވެހިން ވެސް ކަންކަމަށް ލޯ ހުޅުވި، މަޢުލޫމާތު މުއްސަނދިވެފައި ވާއިރު، ސަންސްކްރީން އަކީ ކޮން ބޭނުމަކު އުނގުޅާ އެއްޗެއް ކަން ނޭނގޭ މީހަކު މިހާރު ވަރަށް މަދުވާނެއެވެ. ސަންސްކްރީންގެ މައިގަނޑު ބޭނުމަކީ އިރުގެ ދޯދިތަކުން ފޮނުވާ ވިހަ މާއްދާތަކުން (ޔޫވީ ރޭސް) ހަންގަނޑު ރައްކާތެރި ކުރުމެވެ. ސަންސްކްރީން ނުއުނގުޅާ ނަމަ ހަންގަނޑަށް ލިބޭ ގެއްލުންތައް ގިނައެވެ. އެގޮތުން:

ހަމުގެ ކެންސަރު: އިރުގެ އަވިން ދޫކުރާ ވިހަ މާއްދާއިން ރައްކާތެރިވުމަށް އެއްވެސް ފިޔަވަޅެއް ނާޅާ އަބަދާއި އަބަދު އަތްވަށް ނުކުމެ އުޅޭނަމަ، ހަމުގެ ކެންސަރު ޖެހުމުގެ ފުރުސަތު ބޮޑެވެ. މިއީ ޔޫވީ ރޭސް އިން ހަންގަނޑަށް ކުރާ އެންމެ ނުރައްކާ އަސަރެވެ. 

އުމުރުން ދުވަސްވުމުގެ އަލާމާތްތައް: މުސްކުޅި އުމުރަށް ދިޔުމުގެ ކުރިން، ހަންގަނޑުން މާ ކުރިން އޭގެ އަލާމާތްތައް ފެންނަން ބޭނުން ހެއްޔެވެ؟ ހަމަ ގައިމުވެސް، އެއްވެސް މީހަކު މިގޮތެއް ނޭދޭނެއެވެ. ނަމަވެސް ސަންސްކްރީން އާ ނުލައި އަތްވަށް ގިނައިން ނުކުމެ އުޅޭ މީހުންގެ ހަންގަނޑު ރޫ ޖެހި، އުމުރުން ދުވަސްވުމުގެ އަލާމާތްތައް ފެންނަން ފަށާ ކަމަށް ދިރާސާއިން ދައްކައެވެ. 

ހަންގަނޑު އެނދުން: އަވީގެ ހޫނުން ފިހި، ހަންގަނޑު އެނދުމަކީ އަނެއް ގެއްލުމެވެ. ޚާއްސަކޮށް، އަތްވަށް އެލާޖިކު ވާ މީހުންނަށް މިކަމުން ކުރާ އުނދަގޫ ވަރަށް ބޮޑު ވާނެއެވެ. ބައެއް މީހުންގެ ހަންގަނޑު ރަތްވެ، ދިލަ ނަގާ ގޮތް މެދުވެރިވެއެވެ.

ހަންގަނޑު ކުރަކިވުން: ކިތައްމެ ވަރަކަށް ލޯޝަން އުނގުޅި ކަމުގައި ވިޔަސް، ހަންގަނޑުގެ ބައެއް ތަންތަންކޮޅު ހިކި، ކުރަކި ވެފައި ހުރޭ ހެއްޔެވެ؟ އެއީ ސަންސްކްރީން ނުއުނގުޅޭތީ ވާ ގޮތެއް ކަމުގައި ވެދާނެއެވެ. ޔޫވީ ރޭސް، ހަމުގެ ސްކިން ސެލްސް އަށް ވާސިލުވުމުން ހަށިގަނޑުގެ ޓިޝޫ އުފެދޭ މިންވަރު ދަށްކޮށްދެއެވެ. އަދި މިކަން ގިނަ ދުވަހަށް ތަކުރާރުވަމުން ދާ ނަމަ، ހަމުގެ އިލާސްޓިސިޓީ ދަށްވެއެވެ. ނަތީޖާއެއްގެ ގޮތުން، ކުރިން އޮމާންކޮށް ހުރި ހަންގަނޑު ހަރުވެ ކުރަކި ވެއެވެ.

ދިފާއީ ނިޒާމަށް އަސަރުކުރުން: ދިރާސާތަކުން ދައްކާ ގޮތުގައި، މީހާގެ ހަންގަނޑު ޔޫވީ ރޭސް އަށް ހުށަހެޅުމަކީ ދިފާއީ ނިޒާމަށް ވެސް އަސަރުކުރާ ކަމެކެވެ. 

މަތީގައިވާ ނުކުތާތަކުގެ އިތުރުންވެސް، ޔޫވީ ރޭސް އިން ހަންގަނޑު ރައްކާތެރި ނުކުރާ ނަމަ ލިބޭ ބައިވަރު ގެއްލުން ހުރެއެވެ. ދެން އޮތް ސުވާލަކީ، ސަންސްކްރީން ބޭނުންކުރަންޖެހޭ ގޮތަކީ ކޮބައިތޯއެވެ؟

އެންމެ ފުރަތަމަ ކަމަކަށް، ރަނގަޅު ސަންސްކްރީން އެއް ގަތުން ވަރަށް މުޙިއްމެވެ. ސަންސްކްރީން ގަންނައިރު ބަލަންވީ މައިގަނޑު ކަންތައްތަކަކީ، އެއީ ބްރޯޑް-ސެޕްކްޓްރަމް ސަންސްކްރީނެއް ތޯއެވެ. ބްރޯޑް-ސްޕެކްޓްރަމް ސަންސްކްރީން ގެ މާނައަކީ، ޔޫވީއޭ އާއި ޔޫވީބީ ރޭސް އިން ރައްކާތެރި ކޮށްދިނުމެވެ. އަދި އެސްޕީއެފް ހުންނަން ވާނީ 30 ނުވަތަ އެއަށްވުރެ މަތީގައެވެ. ދެން އޮތް ކަމަކީ، ފުޅީގެ ބޭރުގައި ހުރި އިންގްރީޑިއެންޓްސް ކިޔާލުމެވެ. އަދި ނުރައްކާތެރި ކެމިކަލް އެއް ނެތްކަން ޔަޤީން ކުރުމެވެ. މިކަން ޔަޤީން ކުރަން އިންޓަނެޓުގެ ބޭނުން ކުރެވިދާނެއެވެ. އެމީހެއްގެ ހަމާ އެންމެ ގުޅޭ ސަންސްކްރީނެއް ހޯދުމަށް ޑޮކްޓަރެއްގެ ލަފާ ވެސް ހޯދިދާނެއެވެ.

ދުވާލު ގަޑީގައި ބޭރަށް ނުކުންނަ ކޮންމެ ފަހަރަކު ސަންސްކްރީން ހާކަން ޖެހޭނެއެވެ. މިއީ ވަކި އުމުރަކަށް، ނުވަތަ ވަކި ޖިންސަކަށް އޮންނަ ކަމެއް ނޫނެވެ. ކުޑަކުދިންނާއި ފިރިހެނުން ވެސް ސަންސްކްރީން ބޭނުންކުރަން ޖެހޭނެއެވެ. އެގޮތުން ކުޑަކުދިންގެ ގައިގައި އުނގުޅަން ވާނީ ސީދާ އެކުދިންގެ އުމުރުފުރައަށް ޚާއްސަ ސަންސްކްރީން އެވެ. ނަމަވެސް 6 މަސް ނުވާ ތުއްތު ކުދިންގެ ގައިގައި ސަންސްކްރީން އުނގުޅުން އެހާ ރަނގަޅެއް ނޫނެވެ. އެވަރުގެ ކުދިން އަތްވަށް ނެރޭ އިރު، ކޮންމެވެސް ކަހަލަ އެއްޗަކުން ހަށިގަނޑު ނިވާކޮށްލާށެވެ.

ހަށިގަނޑުގެ ބޭރުފުށުގެ ހުރިހާ ތަނެއްގައި ސަންސްކްރީން އުނގުޅަން ޖެހޭއިރު، ލައިގެން ހުންނަ ހެދުމުން ނިވާ ނުވާ ތަންތަނަށް ޚާއްސަ އިސްކަމެއް ދޭންވާނެއެވެ. އެގޮތުން މޫނާއިި، ހަތަރެސްފައި އެއީ ވަރަށް މުޙިއްމު ތަންތަނެވެ. އޭގެތެރެއިން ވެސް ލޮލުގެ މަތީގައާއި ދަށުގައި، ކަންފަތް، ކަރު، މިއީ ގިނަ މީހުން ހަނދާން ނައްތާލާ ހިސާބުތަކެވެ. ސަންސްކްރީން އެއްފަހަރު އުނގުޅުމުން އެ ނިމުނީކީ ނޫނެވެ. ކޮންމެ ދެގަޑިއިރަކުން އަލުން އުނގުޅަން ޖެހޭނެއެވެ. މޭކަޕް ކުރާ މީހުން ސަންސްކްރީން އުނގުޅާ މޭކަޕްގެ މަތިންނެވެ. 

ސަންސްކްރީން އުނގުޅުމުގެ މުޙިއްމު ކަމަކީ ހަމައެކަނި ބިއުޓީ އިންފްލުއެންސަރުން ދައްކާލާ ވާހަކައެއް ނޫނެވެ. އެއީ ގިނަ މީހުން ހީކުރާ ވަރަށް ވުރެ މާ މުޙިއްމު ކަމެކެވެ.