މުޅި ދުނިޔޭގެ ކުރިމަތީ ފަލަސްތީނުގެ ނަސްލުތައް ނައްތާލުމަށް ކުރަމުން އަންނަ ލާއިންސާނީ ޢަމަލުތައް ފެނި، ހިތުގެ އެންމެ ހިމަ ނާރަށް އަސަރެއް ނުކުރޭ ހެއްޔެވެ؟ އެ މުޤައްދަސް ބިމުގައި ލޭގެ ކޯރުތައް ދެމޭތާ ކޮން ޒަމާނެއް ހެއްޔެވެ؟ އަނިޔާވެރި ޞަހްޔޫނީންގެ ރަޙުމެއްނެތް ޙަމަލާތަކުން ފަނާވަމުން އަންނަ މުސްލިމު އަޚުންނާއި އުޚުތުންނެވެ. ތުއްތު ކުދިންނާއި، ގައިބާރު ދޫވެފައިވާ މާމައިންނާއި ކާފައިންނެވެ. ދުނިޔެއަށް ނޭވާލުމުގެ ކުރިން، ދިރިހުރުމުގެ ހައްޤުން މަހުރޫމު ކޮށްފައިވާ ފުރާނަތަކެވެ. ބަލައިލި ކޮންމެ ދިމާލަކުންވެސް އެ ވޭނީ އަޑުތަކާއި ހިތްދަތިކަމެވެ. ހިތް ކުދިކުދިވާ ޖުމުލަތަކާއި، ތަސައްވަރު ކޮށްލަން ބިރުވެރި ތަފްސީލުތަކެވެ. 

"ބޭބޭ، އަހަރެންގެ ފައި، އަލުން އިޔާދަ ވާނެތަ؟" އަޙްމަދު ނަމަކަށް ކިޔާ ފަލަސްތީނުގެ ކުޑަކުއްޖަކު ސުވާލު ކުރިއެވެ. "އަހަރެންގެ އަތް ބުރި ކޮށްލުމަށް ފަހު، ބަނޑުހައިވެފައިވާ އަހަރެންގެ ދަރިންނަށް ކާން ދިނުމަކީ ހުއްދަ ކަމެއްތަ؟" މިއީ ފަލަސްތީނުގެ މަންމައެއްގެ ވޭނީ އާޙެވެ. ބަނޑުހައިހޫނުކަމުގައިވާ ދަރިންގެ ހާލަތު ފެނުމުން އެ މައި ލަގޮނޑިއަށް ކުރި ފުން އަސަރެވެ. އަދިވެސް އެފަދަ ކިތަށްމެ ޖުމުލައެކެވެ. ފަލަސްތީނުގެ ކުޑަ ފިރިހެން ކުއްޖެއް ބުނެފައިވެއެވެ. "އަހަރެންނަށް އަހަރެންގެ އެކުވެރިޔާގެ ސިކުނޑި ފެނުނީ ބިންމަތީ އޮއްވައެވެ." މިއީ އެ ކުޑަކުޑަ ލޯތަކަށް ފެންނަށް ހެޔޮވާވަރުގެ މަންޒަރުތައް ހެއްޔެވެ؟ "އަހަރެން އުއްމީދު ކުރީ އަހަރެންގެ ކޮއްކޮ ދިރި ހުންނާނެކަމަށް. އެކަމަކު އަހަރެންނަށް ކޮއްކޮ ފެނުންއިރު ކޮއްކޮގެ ބޮލެއް ނެތް." މިއީ ފަލަސްތީނުގެ އަންހެން ކުއްޖެއްގެ ލޮލަށް ފެނިފައިވާ އަނިޔާވެރިކަމެކެވެ. އަނެއްކާވެސް ތަސައްވަރު ކުރަން ކުޅަދާނަ މަންޒަރެއް ނޫނެވެ. މި ދައްކަނީ ކަނދުރާއިން ކޮއްކޮގެ ބޯ، ވަކިވެފައިވާ ވާހަކައެވެ. ލޯބިން ބޮސްދީ ހެދި އެ މޫނު، ހަށިގަނޑުގައި ނެތް ވާހަކައެވެ. ހައްތަހާވެސް ޔަހޫދީންގެ އަނިޔާވެރިކަމުގެ އިމެއް ނެތް ހަމަލާތަކުގެ ނަތީޖާއެވެ.

ފަލަސްތީނުގެ މަންމައަކާ އަމާޒު ކުރެވުނު ސުވާލުތަކަށް އެ މަންމަ ޖަވާބު ދެމުން ދިޔައެވެ. އެންމެ ފަހު މަންޒަރަކަށް ފެނުނީ ކޮން މަންޒަރެއްތޯ އެހެމުން އެ މަންމަ ޖަވާބުގައި ބުންޏެވެ. "ކުއްތާތަކާއި، އިސްރާއިލީންނާއި އެ މީހުންގެ ޓޭންކުތައް ވަދެގެން އައިއިރު އަހަރެމެން ތިބީ ރައްކާތެރިކަމާއެކުގައެވެ. އެއަށްފަހު އެމީހުން އައިސް އަހަރެމެން ގެއިން ނެރެލިއެވެ. އެ މީހުން، ޒުވާން ފިރިހެނުންތައް ގެންގޮސް މަރާލިއެވެ. އަހަރެމެން ދާން ބޭނުންވީ ގައްޒާގެ ދެކުނަށެވެ." މަރާލާފައިވާ ޒުވާން ފިރިހެނެއް މަގުމަތީގައި ވަނިކޮށް ފެނުނުތޯ އެހުމުން އެ މަންމަ ޖަވާބު ދިނެވެ. "މީހުންތަށް ވަނީ މަގުތައްމަތީ ޝަހީދުކޮށްލާފައެވެ. އެ މީހުން އަހަރެންގެ ފިރިމީހާގެ ކާފައާއި ބޮޑު ބޭބެވެސް ވަނީ މަރާލާފައެވެ. އެއީ ޤަބޫލުކުރެވޭނެ ފަދަ މަންޒަރެއް ނޫނެވެ. ޢަރަބި ޤައުމުތައް ކޮބާ ހެއްޔެވެ؟ ޔުނައިޓެޑް ނޭޝަންސް ކޮބާ ހެއްޔެވެ؟ އަހަރެމެންގެ ކުށަކީ ކޮބާ ހެއްޔެވެ؟ ޔާ ﷲ! އަހަރެމެންނަށް ގޯސްކޮށް ކުރެވިފައިވަނީ ކޮންކަމެއް ހެއްޔެވެ؟" "އަހަރެމެން މަގުމަތީ މި އުޅެނީ ހެނދުނުން ފެށިގެންނެވެ. ދެ ގަޑިއިރެއް ވަންދެން މިހެން މި ހިނގަނީއެވެ." މަގުމަތީ އުޅޭތާ ކިހާ އިރެއް ވެއްޖެތޯ ސުވާލު ކުރުމުން އެ މަންމަ އިތުރަށް ކިޔައިދިނެވެ. ހުރިހާ ވާހަކައެއް ކިޔައިދެމުން ދިޔައިރު އެ މަންމަގެ ލޮލުން ކަރުނަ ނުހިކެވެ. އެ ގިސްލުމުގެ އަޑުގައިވަނީ ވޭނާއި ހިތްދަތިކަމެވެ. އުރުގައި އިން ދަރިފުޅަށް އަދި ވާނުވާ އެނގޭ ވަރެއް ނޫނެވެ. ކައިރީ ދެން ތިބި ދެ އަންހެން ދަރިންގެ މޫނުމަތީ ވަނީ ގިސްލުމުގެ ކުލަވަރުތަކާއި މާޔޫސްކަމެވެ. އެއް ދަރިފުޅުގެ އަތުގައި ހުސް ފުޅިއެއް އޮތްއިރު، އަނެއް ދަރިފުުޅުގެ އަތުގައި ދަބަހެކެވެ. އަމިއްލަ ގެއިން ނެރެ މަގުމަތި ކޮށްލުމުން، ފައި މަގުގައި 4 މައިން ދަތުރުކުރަމުން ދިޔައީއެވެ.

މިފަހަރު ފަލަސްތީނުގެ ބައްޕައެކެވެ. ގުދުވެ އޮވެ ބިންމައްޗަށް ވެރިފައި ހުރި ގޮދަންފުއް އެއްކުރަނީއެވެ. އަތުގައި އޮތް ކުޑަ ކަރުދާސް ކޮޅެއްފަދަ އެއްޗަކުން ވެރިފައިވާ ގޮދަންފުއްތައް ނަގަމުން ނޫ ކުލައިގެ ގޯންޏަކަށް އަޅަމުން ދިޔައެވެ. އެ ބައްޕަ ކިޔައިދިނެވެ. "އަހަރެންގެ ދަރީންނަށް ކާންދީ ބަނޑުފުރައި މުއްތި ކުރުމަށް ގޮދަންފުއް އެއްކުރަނީއެވެ. އެހީގެ އުޅަނދުތަކުން އަހަރެމެންނަށް ގޮދަންފުއް ނުނެގުނީއެވެ. އަަހަރުމެންނަށް އެއް ކުރެވޭނެ އެއްޗަކީ މިއެވެ. އަހަރުމެން މި އެއްކުރަނީ ބިންމަތިންނެވެ. އެއީ އިތުރަށް ގަތުމަށްޓަކައި އަހަރެމެން އަތުގައި ފައިސާ ނެތީތީއެވެ." ދެމުން ދިޔަ ގަދަ އަވީގައި އެ ބައްޕަ ބިންމަތިން ގޮދަން ފުއް އެއްކުރަމުން ދިޔައީ ބަނޑުހައިހޫނުކަން ފިލުވުމަށެވެ. ދަރީންނަށް ކާންދިނުމަށެވެ. ފަރުވާތެރިކަމާއެކު، ހަޑި ނުވާހެން ހީވާ ތަންކޮޅުތަކުން ގޮދަންފުއް ނަގަމުން ގޯންޏަށް އަޅަމުން ދިޔައެވެ. ލައިގެން ހުރި އައްނައުނުގެ އެތަން މިތަނުގައި އެ ގޮދަން ފުށުގެ ނިޝާންތައްވެއެވެ.

ބިކަ ޙާލުގައި އެވަނީ ހަމަ މި އިސްލާމީ އުއްމަތުގެ ބައެކެވެ. ފުރާނަހުރި، ތަދާއި ވޭން އިޙްސާސްވާ އިންސާނުންނެވެ. ޒަރޫރީ ބޭނުންތަކުން މަހުރޫމުކޮށް އެ ފަލަސްތީނުގެ އަޚުންނާއި އުޚުުތުންވަނީ ނިކަމެތިކޮށްފައެވެ. އެ އަޚުންނާއި އުޚުތުންގެ ޙާލަތު ދެނެގަނެ، އެކަމުން ނަޖާކޮށް ނަޞްރު ދެއްވާތޯ އަހަރުމެން ދުޢާކުރަން ޖެހެއެވެ. އެ އަޚުންނާއި އުޚުތުންގެ ޙައްޤުގައި އަޑު އުފުލަން ޖެހެއެވެ. ހިތް ކުދިކުދިވާ ފަދަ ޖުމްލަތަކުގެ ފުންމިން ތަސައްވަރުކޮށްލަން ޖެހެއެވެ.