އިންސާނުންގެ ދިރިއުޅުމުގައި އެންމެ މުހިންމު އެއް ސިފައަކީ އިހުލާސްތެރިކަމެވެ. އިހުލާސްތެރިކަމަކީ މީހެއްގެ ޢަމަލުތަކާއި ބަސްތައް ތެދުވެރިކަމާއި ވަފާތެރިކަމާއެކު ކުރިއަށް ގެންދިއުމެވެ. ނަމަވެސް، މިއަދުގެ ދުނިޔޭގައި ހަގީގީ އިހުލާސްތެރިން ދެނެގަތުމަކީ ފަސޭހަ ކަމަކަށް ނުވެއެވެ. އެހެންކަމުން، މި މަޒުމޫނުގައި އަޅުގަނޑުމެން ބަލައިލާނީ ހަގީގީ އިހުލާސްތެރިންގެ ސިފަތަކާއި، އެފަދަ މީހުން ދެނެގަންނާނެ ގޮތްތަކެވެ.

ފުރަތަމަ ކަމަކަށް، ހަގީގީ އިހުލާސްތެރިންނަކީ އެމީހުންގެ ބަހާއި ޢަމަލު އެއްގޮތް މީހުންނެވެ. އެމީހުން ވާ ވަޢުދުތައް ފުއްދައި، އެމީހުން ބުނެ އުޅޭ ބަސްތަކަށް ރައްކާތެރިވާނެއެވެ. އެމީހުންގެ ވާހަކަތަކުގައި ދޮގެއް ނުވަތަ މަކަރެއް ނުހިމެނޭނެއެވެ. މިއީ އިސްލާމްދީނުގައިވެސް ވަރަށް ބޮޑަށް އަހައްމިއްޔަތުކަން ދީފައިވާ ކަމެކެވެ.

ހަގީގީ އިހުލާސްތެރިންނަކީ އެހެން މީހުންގެ ޙައްޤުތަކަށް ޙުރުމަތްތެރިކޮށް ހިތާ މީހުންނެވެ. އެމީހުން އެހެން މީހުންގެ މުދަލަށް ޚިޔާނާތްތެރިއެއް ނުވާނެއެވެ. އެހެން މީހުންގެ ޙައްޤުތައް ނިގުޅައެއް ނުގަންނާނެއެވެ. އަދި އެމީހުންނާ ޙަވާލުކުރެވޭ އަމާނާތްތައް ރައްކާތެރިކަމާއެކު އަދާކުރެއެވެ.

ހަގީގީ އިހުލާސްތެރިންގެ އަނެއް ސިފަ އަކީ، އިހުލާސްތެރިންނަކީ އެމީހުންގެ ޢަމަލުތައް ﷲ ގެ ރުހިވޮޑިގަތުން ހޯދުމަށްޓަކައި ކުރާ މީހުންނެވެ. އެމީހުންގެ އަމަލުތަކުގައި ދުނިޔެވީ ދަހިވެތިކަން މަދުވާނެއެވެ. ނަމަވެސް ނިޔަތުގައި އިހުލާސްތެރިކަން އޮންނާނެއެވެ. ނިޔަތަކީ އަނެކާއަށް ފެންނަން ހުންނާނޭ ސިފައެއް ނޫން ކަމުގައި ވިޔަސް، ނިޔަތުގެ ސާފުކަން، އަމަލުން ފެންނާނެއެވެ.

އިހުލާސްތެރިންނަކީ އެމީހުންގެ މައްޗަށް ޙައްޤުތަކެއް އޮތް ކަމަށް ޤަބޫލުކުރާ މީހުންނެވެ. އެމީހުން މައިންބަފައިންނަށް ހެޔޮކޮށް ހިތައި، ގާތްތިމާގެ މީހުންނާ ގުޅުން ބަދަހިކޮށް، އަވަށްޓެރިންނަށްވެސް އިޙްތިރާމްކުރެއެވެ. އެކުވެރިންނާއި ރަހުމަތްތެރިންނަށް އަޅާލާ ގުޅުންތައް ބަދަހި ކުރާނެއެވެ. ރުޅިވެރިކަމާއި ހަސަދަވެރިކަން އެއީ އިހުލާސްތެރިން ދަންނަ ސިފަތަކެއް ނޫނެވެ.

ހަގީގީ އިހުލާސްތެރިންނަކީ އެމީހުންގެ ނަފްސުގެ މައްޗަށް ކޮންޓްރޯލް އޮންނަ މީހުންނެވެ. އެމީހުން ނުރަނގަޅު ކަންތައްތަކުން ދުރުހެލިވެ، ހެޔޮ ޢަމަލުތައް ކުރުމަށް މަސައްކަތްކުރާނެއެވެ. ބަޔަކު، ނުވަތަ މީހެއްގެ އަޅުވެތިކަމުގައި އެމީހަކަށް ނުވަތަ ބަޔަކަށް ސަނާ ކިޔުމުގައި އަގުހުރި ވަގުތުތައް ދުއްވާލާ ބޭކާރެއް ނުކުރާނެއެވެ.

ނިންމާލަމުން ދަންނަވާނީ، ހަގީގީ އިހުލާސްތެރިންނަކީ އެމީހުންގެ އަޚްލާޤާއި ޢަމަލުތަކުން ފާހަގަކުރެވޭ ބައެކެވެ. އެމީހުންގެ ކިބައިގައި ހުންނަ މި ސިފަތަކަކީ އެމީހުންނަކީ ހަގީގީ އިހުލާސްތެރިންކަން ދައްކުވައިދޭ ހެކިތަކެވެ. އަޅުގަނޑުމެން އެންމެން ވެސް މިފަދަ ސިފަތައް އަޅުގަނޑުމެންގެ ކިބައިގައި އަށަގެންނެވޭތޯ ބަލަމާ ހިނގާށެވެ! އަދުގެ މި ދުނިޔޭގައި އިހުލާސްތެރިން މި ދަނީ ދުވަހެއް ދުވަހަކަށް މަދުވެ، ފެނުން ކޮށިވެ، ގެއްލެމުންނެވެ!