މުރާކި ނުވަތަ ކާނބޯއްޓަކީ އާއްމުގޮތެއްގައި ދިވެހިން ހައްދައިގެން ކައި އުޅޭ މޭވާއެއް ނޫނެވެ. ދޫކޮށްލެވިފައި ހުންނަ ހުސް ބިން ބިމުގައި ހިތަށް ފަޅައިގެން ހެދޭ، ވިނަ ގަހެއްފަދަ ގޮތަކަށް ހެދޭ މި ގަސްގަހުގައި އަޅާ މުރާކި، މިއީ އިންސާނާގެ ހަށިގަނޑަށް އެތައް ފައިދާއެއް ކުރުވާ މޭވާއެކެވެ.

ތުނި ފަރުދާއަކުން ހިމާޔަތްކަން ލިބިފައިވާ މި ކުޑަކުޑަ މޭވާ އަކީ ދޮންވުމުން އަނގަޔަށް ވަރަށް މީރު، ފޮނި މޭވާއެކެވެ. މުރާކީގައި ވަރަށް ގިނަ އަދަދަކަށް ވިޓަމިން ސީ ހިމެނެއެވެ. މިއީ ހަށިގަނޑުގެ ދިފާއީ ނިޒާމު ހަރުދަނާކުރުމަށް ވަރަށްވެސް އަސާސީ މާއްދާއެކެވެ. އަދި ވިޓަމިން ސީ ގެ ސަބަބުން އިންސާނާ ކާ ތަކެތީގައި ހުންނަ ދަގަނޑުގެ މާއްދާ، ލޭގެ ތެރެއަށް ނަގަން ފަސޭހަވެއެވެ. 

މުރާކީގައި ހުންނަ އަނެއް މުހިއްމު މާއްދާ އަކީ ސްޓިރޮއިޑެއް ކަމަށްވާ ވިތަނޮލައިޑްސް އެވެ. މިއީ ހަށިގަނޑުގައި ހުންނަ ބައެއްކަހަލަ އިންފްލެމޭޝަންތަކާއި ދެކޮޅަށް މަސައްކަތްކުރުމުގެ ގާބިލުކަން ލިބިފައިވާ މާއްދާއެކެވެ. އެގޮތުން އާތްރައިޓިސް އާއި ލޫޕްސް އާއި އަދި އިރިޓަބަލް ބަވަލް ސިންޑްރަން، (އައި.ބީ.އެސް) ފަދަ ބަލިތަކުގައި ހުންނަ އިންފްލެމޭޝަން އާއި ދެކޮޅަށް މަސައްކަތްކުރުނުގެ ހާއްސަ ކުޅަދާނަކަމެއް ލިބިގެން ވެއެވެ.

ކެލްޝިއަމް އަކީވެސް މުރާކީގައި ގިނަ މާއްދާއެކެވެ. މިއީ ކަށިތަކުގެ ދުޅަހެޔޮކަން އިތުރުކޮށްދީ މަސްތަކުގައި ބާރު ޖައްސައިދިނުމަށް އެހީތެރިވެދޭ މާއްދާއެކެވެ. ދުޅަހެޔޮ ލޭނާރުތަކަކާއި ހޯމޯނުތައް އުފައްދައިދޭ މިންވަރު އެއް ހަމައެއްގައި ހިފަހައްޓައިދިނުމަށްވެސް މިއީ މުހިއްމު މާއްދާއެކެވެ. މީގެ އިތުރުން މުރާކީގައިވާ ފައިބަރުގެ މާއްދާގެ ސަބަބުން، ހަޖަމުގެ ނިޒާމުގެ ތަރުތީބު ހަރުދަނާވެ، ހަމަޖަމަށް ފަސޭހަވެގެން ދެއެވެ.

މުރާކި އަކީ ރޮލާ ކެވޭ މޭވާއެކެވެ. ނަމަވެސް މުރާކީގައި ތައްޔާރު ކުރާ ބައެއް ފޮނި ކާތަކެއްޗަކީވެސް ކެއުމަށް މީރު އެއްޗެއްސެވެ. ދުނިޔޭގެ ބައެއް މާރުކޭޓުތަކުގައި މުރާކީގައި ޖޭމު ހަދާފައި ހުރެއެވެ. ޕާނާއި އެއްކޮށް ކާން މުރާކި ޖޭމަކީވެސް އޭގައި މީރުކަމެއް ހުންނަ އެއްޗެކެވެ.