ރޭގަނޑުގެ ފިނި ރޯޅިތައް މަޑުމައިތިރިކަމާއެކު ގަސްތަކުގެ ތެރެއިން ދައުރުވަމުން ދިޔައެވެ. އެ ވައިރޯޅީގައި ވަނީ ވެހެން ތައްޔާރުވަމުންދާ ވާރޭގެ ތާޒާ ވަހެވެ. މަޑު ވައިރޯޅި އައިސް ޒިޔާގެ މޫނުމައްޗަށް އެޅިފައިވާ އިސްތަށިތައް ދުރަށް ޖައްސައިލިއެވެ. ހިމޭންވެފައިވާ ދުނިޔެއަށް ހަނދުގެ ފަނޑު އަލިކަން އެޅިފައިވާއިރު، ފަޅުވެފައިވާ މަގާއި، ހޫރެމުންދާ ގަސްތަކުގެ ގޮފިތަކާއި، ދެ ކުދިން އެކުގައި އެތައް ހަވީރަކު ހޭދަކުރި ކުޑަ ލަކުޑި ބެންޗު ފެންނަން ހުއްޓެވެ. ދުރުން އިވެމުންދަނީ ގޮނޑުދޮށަށް ބީއްސަމުންދާ ރާޅުތަކުގެ އަޑެވެ. އެއީ ދުވަހަކުވެސް ނަން ނުކިޔޭ ފަދަ ބޮޑު ހިތާމައެއް ބަޔާންކުރަން ކަނޑުވެސް ރުއިން ފަދަ އަޑެކެވެ. ޒިޔާ މިއަދު އެ ބެންޗުގައި އިނީ އެކަންޏެވެ. އަތުގައި އޮތީ ކައިރިފަށުން ކުލަ ފަނޑުވާން ފަށާފައިވާ ބައު ފޮޓޯގަނޑެކެވެ. އެ ފޮޓޯގައި ވަނީ ކޮނޑާއި ކޮނޑު ޖައްސައިގެން ތިބި ކުޑަ ދެކުދިންނެވެ. އެއީ ޒިޔާއާއި ޒިޔާގެ އެންމެ ގާތް އެކުވެރިޔާ ޒީޝާންއެވެ. އެއީ ހަމައެކަނި ޅަފަތުގައި ފެންނާނެ ފަދަ ޖަޒުބާތީ، އުފާވެރި ހިނިތުންވުމެކެވެ. އެ ދުވަހު އެމީހުންނަކަށް ނޭނގެއެވެ. ކޮންމެވެސް އެއް ދުވަހަކުން ޒީޝާންއާ ނުލައި ދުނިޔޭގައި އުޅެން ޒިޔާއަށް ދަސްކުރަން ޖެހޭނެ ކަމެކެވެ.
އެ ދެމީހުން ބައްދަލުވީ ވަރަށް ޅަފަތުގައެވެ. ރަހުމަތްތެރިކަމަކީ އޮޅުންބޮޅުން ބޮޑު އެއްޗަކަށް ނުވާ، އަދި ލޯތްބަކީ ކޮބައިކަން ވިސްނައިގަންނަން ނޭނގޭ ފަދަ މައުސޫމު އެއްޗެކެވެ. ކްލާސް ނިމޭއިރު އަބަދުވެސް ބޭރުގައި ޒިޔާއަށް އިންތިޒާރުކުރަން ހުންނަނީ ޒީޝާންއެވެ. ޒިޔާގެ ދަބަސް ބަރުވެގެން އުފުލައިދޭ މީހަކީވެސް، އަދި ކާ އެއްޗެހި ގެންނަން ހަނދާންނެތޭ ދުވަސްދުވަހު އަމިއްލަ ކާބޯތަކެތީގެ ދެބައިކުޅަ އެއްބައި ދޭ މީހަކީވެސް ޒީޝާންއެވެ. އަނެއްކޮޅުން، ޒީޝާން ހިތާމައެއް ފޮރުވަން އުޅޭކަން އެންމެ ފުރަތަމަ ދެނެގަންނަ މީހަކީ ޒިޔާއެވެ. ޒީޝާން ރުޅިއައިސްފައި ހުންނަ ވަގުތު ހެއްވާލާ، ވާހަކަދައްކަން ބޭނުންނުވާ ވަގުތުތަކުގައި އެއްވެސް ޝަކުވާއެއް ނެތި ކައިރީގައި އިށީނދެގެން އިންނަނީ ޒިޔާއެވެ. ދެމީހުން ބޮޑުވަމުން އައީ އެކުގައެވެ. އަގުނުކުރެވޭ ފަދަ ހަނދާންތަކެއް އެއްކުރަމުން ދިޔަކަން އެކަކަށްވެސް އިހުސާސެއް ނުވެއެވެ. އެހެން އެއްވެސް މީހަކަށް ނޭނގޭ ސިއްރުތަކާއި، ގަޑިއިރަކަށްވުރެ ދިގުނުވާ ކުދިކުދި ޒުވާބުތަކާއި، އެހެން މީހުންނަށް ނުވިސްނޭ މަޖާ ވާހަކަތަކާއި، ބޮޑުވެގެން އެކުގައި ހާސިލުކުރަން ނިންމި ހުވަފެންތައް އެމީހުންގެ ދެމެދުގައި ވިއެވެ. އެއިން އެކަކު ކުރިމަގާމެދު ވިސްނާލިޔަސް، އަބަދުވެސް އެ ތަސައްވުރުގެ ކޮންމެވެސް ހިސާބެއްގައި އަނެކަކު ހުރެއެވެ.
އެއީ ދުވަހަކުވެސް ވަކިނުވާނެ ކަމަށް އެންމެން ގަބޫލުކުރި ފަދަ ގާތް އެކުވެރިކަމެކެވެ. ކަކުލަށް ލިބުނު ޒަޚަމްތަކާއި ސްކޫލް ޔުނީފޯމުން ފެށިގެން، ބޮޑުވެގެން ވާން ބޭނުންވާ މީހުންނާ ބެހޭގޮތުން ދަންވަރު ދެއްކި ވާހަކަތަކާ ހަމައަށް، ޅަފަތުގެ ހުރިހާ މަރުހަލާއެއް އެމީހުން ކަޑައްތުކުރީ އެކުގައެވެ. ޒިޔާގެ ހިނިތުންވުމުގެ ފަހަތުގައިވާ ހުރިހާ ބިރަކާއި، ދުލުން ބުނަން ނުކެރުނު ހުރިހާ އުއްމީދެއް ޒީޝާންއަށް އެނގެއެވެ. ހަމައެފަދައިން، ޒީޝާން ސަމާސާގެ ފަހަތުގައި ފޮރުވި ހިތާމަތަކާއި، އެހީތެރިކަމަށް ބޭނުންވި ނަމަވެސް ބުނަން ނުކެރުނު ދަނޑިވަޅުތައް ޒިޔާއަށް އެނގެއެވެ. އެކަކު އަނެކަކަށް ބަސްތަކުން ވިސްނައިދޭކަށް ނުޖެހެއެވެ. އެހެނީ، އެމީހުން ވަނީ ހިމޭންކަމުގެ ބަހުރުވަ ދަސްކޮށްފައެވެ.
ނަމަވެސް، ހުރިހާ ކަމެއް ބަދަލުކޮށްލި އެ ހިތާމަވެރި ދުވަސް އައެވެ. އެހެން ދުވަސްތަކެކޭ އެއްފަދައިން އާދައިގެ ގޮތަކަށް ފެށުނު އެ ދުވަސް ނިމިގެން ދިޔައީ ޒިޔާގެ މުޅި ދުނިޔެ ބީރައްޓެހިކޮށްލަމުންނެވެ. އެދުވަހު ހެނދުނު ޒީޝާންއާ ވާހަކަދެއްކި ހަނދާން ޒިޔާގެ ހިތުގައި އަދިވެސް އެބައޮތެވެ. އޭނާ ބުނި މަޖާ ވާހަކައަކަށް ޒީޝާން ހޭން ފެށި ގޮތާއި، "ފަހުން ބައްދަލުވާނެ" ކަމަށް ބުނެ އަލްވަދާއު ކީ ގޮތެވެ. އެއީ އެމީހުންގެ އެންމެ ފަހު އަލްވަދާއު ކަމެއް އޭރު އެކަކަށްވެސް ނޭނގެއެވެ. ޒިޔާއާ ބައްދަލުކުރަން އައި މަގުމަތީގައި ދިމާވި ކުއްލި ނުރައްކާތެރި އެކްސިޑެންޓެއްގައި ޒީޝާން މި ދުނިޔެއާ ވަކިވެގެން ދިޔައީ އެއްވެސް އިންޒާރެއް ނެތިއެވެ. އެ ހިތާމަވެރި ޚަބަރު ލިބުނު ވަގުތު، ޒިޔާއަށް އެކަން ގަބޫލެއް ނުކުރެވުނެވެ.
އެހެނެއް ނުވާނެ .. އެއީ ޕްރޭންކެއް ކަމަށް ވާނީ .. ޒިޔާ ތަކުރާރު ކޮށް ބުނަމުން ދިޔައެވެ.
ޚަބަރު ދިން މީހާގެ މޫނަށް ބަލަން އިނީ، ގަބޫލުނުކުރުމުގެ ސަބަބުން ހަގީގަތް ބަދަލުވެދާނެ ކަމަށް ހީކޮށެވެ. އޭނާ ތަކުރާރުކޮށް ސުވާލުކުރަމުން ދިޔައީ، އެއީ ކުށްހީއެއް ކަމަށާއި ޒީޝާން ކޮންމެވެސް ތަނެއްގައި އޭނާއަށް އިންތިޒާރުގައި ހުރި ކަމަށް ބުނެ އެއްވެސް މީހަކު ހީނގަންނާނެ ކަމުގެ އުއްމީދުގައެވެ. އެކަމަކު، ޒީޝާން ދުވަހަކުވެސް އެނބުރި ނައެވެ.
އޭގެ ފަހުން އައި ދުވަސްތައް ޒިޔާއަށް ވެގެންދިޔައީ ކެތްކުރަން ދަތި ދުވަސްތަކަކަށެވެ. ސަބަބަކީ، އޭނާގެ މުޅި ދުނިޔެ ހުއްޓުނު ނަމަވެސް، ވަށައިގެންވާ ދުނިޔެ އެއްވެސް ކަމެއް ނުވާ ފަދައިން ކުރިއަށް ދެއެވެ. މީހުން މަސައްކަތަށާއި ސްކޫލަށް ދެއެވެ. ދޫނިތައް ގަސްގަހާގެހީގައި ލަވަކިޔައެވެ. ކުޑަކުދިން މަގުމަތީގައި ހީނ މަޖާކުރެއެވެ. ނަމަވެސް ޒިޔާގެ ހަޔާތް ވަނީ ޒީޝާން ވަކިވި ވަގުތުގައި ތާށިވެފައެވެ. ކަމެއް ދިމާވާ ކޮންމެ ފަހަރަކު ފޯނަށް އަތް ދިއްކޮށްލެވެނީ، ދެން ގުޅާނެ ޒީޝާންއެއް ނެތްކަން ހަނދާންވުމުގެ ކުރިންނެވެ. ޒީޝާން ގަޔާވާނެ ފަދަ މަޖާ މަންޒަރެއް ފެނުމުން ހިނިތުންވެލެވެނީ، ކުއްލިއަކަށް ހިތަށް ވެރިވާ ފުން ހިތާމައިގެ ރާޅާއެކުގައެވެ. ފޯނުގެ ކޮންޓެކްޓްސްގައި ޒީޝާންގެ ނަން އަދިވެސް އެބައޮތެވެ. އޭނާގެ މެސެޖުތަކާއި، ކުރިން ކޮށްފައިވާ ރެކޯޑިންގތަކުން އޭނާގެ އަޑު އިވެން އެބަހުއްޓެވެ. މާ ބޮޑަށް ހަނދާންވާ ރޭރޭ، ނިދެންދެން އެ އަޑުތައް ޒިޔާ އަހައެވެ. އެއީ އެ އަޑުން "ޒިޔާ" އޭ ކިޔާލުމުން، ފަޅުވެފައިވާ ހިތަށް ކުޑަނަމަވެސް ތަސައްލީއެއް ލިބޭތީއެވެ.
މީހުން ޒިޔާ ގާތުގައި ބުނަމުން ދިޔައީ ކުރިއަށް ދިއުމަށެވެ؛ ހިތާމައަކީ ދޫކޮށްލާފައި ދެވޭނެ ތަނެއް ފަދައިންނެވެ. ޒީޝާން އެދޭނީ ޒިޔާ އުފަލުގައި ހުރުމަށް ކަމަށް ބުނެ ނަސޭހަތް ދިނެވެ. އެއީ ތެދެއްކަން އޭނާއަށް އެނގެއެވެ. އެކަމަކު އެކަން އެނގުމަކުން ޒީޝާން ގެއްލުމުން ލިބުނު ޒަޚަމްގެ ވޭނަކަށް ލުޔެއް ނުލިބުނެވެ. ޒީޝާން ނެތި ދުނިޔެ ދައުރުވާތީ އޭނާ ދެރަވިއެވެ. އުފަންދުވަސްތަކާއި، އީދު ފަދަ އުފާވެރި މުނާސަބަތުތައް ދެކެ އޭނާ ފޫހިވިއެވެ. ސަބަބަކީ އެ އެއްވެސް ތަނަކުން ޒީޝާން ނުފެންނާނެތީއެވެ. ރީތި އިރުއޮއްސޭ މަންޒަރުތައް ފެނުމުންވެސް ހިތަށް އަސަރުކުރެއެވެ. ސަބަބަކީ އެންމެ ފުރަތަމަ އެ މަންޒަރު ދައްކަން ބޭނުންވާނީ ޒީޝާންއަށް ކަމަށްވާތީއެވެ. ޒިޔާ ހިތާމަކުރީ ހަމައެކަނި ގެއްލުނު އެކުވެރިޔާއަށްޓަކައެއް ނޫނެވެ. އެކުގައި ކުރަން އޮތް އެތައް އުފާވެރި ކަމަކާއި، ދައްކަން އޮތް އެތައް ވާހަކައަކާއި، ދެން ދުވަހަކުވެސް ނުފެންނާނެ އެމީހުންގެ މުސްތަގުބަލަށްޓަކައެވެ.
ކީއްވެ އަހަރެންގެ ހުރި ހަމަ އެކަނި ބެސްޓްފްރެންޑް އަހަންނާ ވަކިވީ .. އަަަހަރެން ބޭނުން ޒީޝާން އާ އެކީ ހީ މަޖާކޮއްލަން .. ޒީޝާން ގެ މޫނު ދެކިލަން .. ޕްލީޒް ކަމް ބެކް .. އައި ރިއަލީ މިސްޔޫ ޒިޔާއަށް ބުނެވެމުން ދިޔައެވެ.
އަހަރުތައް ފާއިތުވެގެން ދިޔައެވެ. ނަމަވެސް ބައެއް ކަހަލަ ހިތާމަތަކަކީ ވަގުތާއެކު ފިލައިގެންދާ އެއްޗެއް ނޫނެވެ. އެއީ ހަމައެކަނި ހިތުގެ އެންމެ ފުންމިނުގައި މަޑުމައިތިރިކަމާއެކު ވަޒަންވެރިވާން ދަސްކުރާ އެއްޗެކެވެ. ޒިޔާގެ އުމުރުން މިހާރު 25 އަހަރުއެވެ. އޭނާގެ މިޒާޖަށް ބަދަލުތަކެއް އައެވެ. އާ ކަންކަން ދަސްކޮށް، އާ މީހުންނާ ބައްދަލުވެ، އަލުން ހޭން ފެށިއެވެ. އަދި ޒީޝާން ދޫކޮށް ދިޔަ ހުސްކަމުގެ ވަށައިގެން އާ ދިރިއުޅުމެއް ބިނާކުރިއެވެ. އެހެންނަމަވެސް، އެއްދުވަސްވަރެއްގައި ކްލާސްރޫމް ބޭރުގައި ޒީޝާންއަށް އިންތިޒާރުކުރަން އިން އެ ކުޑަ އަންހެން ކުއްޖާގެ އިހުސާސް އަލުން ވެރިވާ ރޭރޭ އަދިވެސް އާދެއެވެ. ޅަފަތުގެ އެ ހަވީރުތަކެކޭ އެއްފަދައިން ގަސްތަކުގެ ތެރެއިން މަޑުމައިތިރި ވައިރޯޅި ޖެހިލާ ކޮންމެ ފަހަރަކު، ޒީޝާންގެ ހުނުމުގެ އަޑު ކަންފަތުގައި ގުގުމައިގަންނަ ކަހަލައެވެ. އެމީހުން އެކުގައި އުޅުނު ތަންތަނުން ހިނގާފައި ދާއިރު، މާޒީގެ ހަނދާންތައް އެހާވެސް ސާފުކޮށް ހިތަށް ވެރިވެއެވެ. ހަމަ އެވަގުތު ޒީޝާން ކައިރިއަށް އައިސް، ހިނގުން މާ ލަސްކަމަށް ބުނެ ޝަކުވާކޮށްފާނޭ ހީވާ ފަހަރުވެސް އާދެއެވެ. ބައެއް ދުވަސްދުވަހު އެއްވެސް ވަރަކަށް ނުރޮއި ދުވަސް ފާއިތުވެދާތީ، ޒީޝާންގެ މަތިން ހަނދާންނެތެނީބާވައޭ ހިތަށް އަރައެވެ. އެކަމަކު ފަހުން ޒިޔާއަށް މުހިންމު ހަގީގަތެއް ވިސްނުނެވެ؛ ހިތުގެ ޒަޚަމްތައް ފަސޭހަވުމަކީ ހަނދާންނައްތައިލުމެއް ނޫނެވެ.
އެއްދުވަހެއްގެ ހަވީރު، އެތައް އަހަރެއް ވަންދެން ރޭގަނޑުގެ އުޑުދަށުގައި އެކުގައި ވާހަކަދައްކަން ތިބި އެ ބައު ލަކުޑި ބެންޗަށް ޒިޔާ އެނބުރި ދިޔައެވެ. އަދި އުނގުމަތީގައި އެ ފޮޓޯގަނޑު ބާއްވައިގެން އެކަނިމާއެކަނި އިށީނދެލިއެވެ. ހަނދުގެ އަލިކަން ފަނޑުވެފައިވާ އެ ފޮޓޯގަނޑަށް އެޅި، ޒީޝާންގެ ހިނިތުންވުން ދިއްލިގެން ދިޔައެވެ. ލޮލުން ކަރުނަ ފައިބަމުން ދިޔައިރު، ޒިޔާ ލޯތްބާއެކު އެ ފޮޓޯގައި އިނގިލި ހިންގާލިއެވެ. އަދި ސިއްރުސިއްރުން ބުންޏެވެ.
އަދިވެސް އަހަރެން ޒީޝާމް މަތިން ވަރަށް ހަނދާންވޭ .. އައި ވިޝް ޔޫ ވާ ހިޔާ .. ދުވަހަކުވެސް އަހަރެން ދޫކޮށެއް ނުލާނަމޭ ބުނިތާ މާގިނަ ދުވަހެއް ނުވަނީސް ޒީޝާމް މި ދުނިޔެއަށް އަލްވަދާއު ކީ .. އަހަރެންގެ ހިތުން ޒީޝާން ގެ ހަނދާންތަށް ދުވަހަކުވެސް ފޮހެވިގެން ނުދާނެ..
ޒީޝާން ވަކިވެދިޔަ ފަހުން ހިނގައިދިޔަ ކަންކަމުގެ ވާހަކައާއި، ހާސިލުކުރެވުނު ހުވަފެންތަކާއި، ދޫކޮށްލަން ޖެހުނު އުއްމީދުތަކާއި، ދިމާވި އާ މީހުންގެ ވާހަކަ ވެސް ކިޔަމުން ދިޔައެވެ. އަދި ޒީޝާން ހުރިނަމަ ޖައްސާނެ ހުރިހާ ލަނޑުތަކާއި ކުރާނެ ސަމާސާތައް ހަނދާންކުރިއެވެ. ފުރަތަމަ ފަހަރަށް، ޒީޝާން ވަކިވެގެން ދިޔައީ ކީއްވެގެންތޯ ސުވާލެއް ނުކުރެއެވެ. އޭގެ ބަދަލުގައި، ތަރިތަކުގެ ދަށުގައި އިނދެ، އެފަދަ އަގުހުރި އެކުވެރިއަކު އޭނާގެ ހަޔާތުގައި ލެއްވިކަމަށްޓަކައި ހިތުގެ އަޑިން ޝުކުރުވެރިވިއެވެ.
ބޯމަތީގައިވާ ގަސްތަކުގެ ގޮފިތަކުގެ ތެރެއިން މަޑުމައިތިރި، ހޫނު ވައިރޯޅިއެއް ޖެހިލިއެވެ. ޒިޔާ ލޯ މަރައިލިއިރު، ކަރުނަތަކުގެ ތެރެއިން ކުޑަ ހިނިތުންވުމެއް މޫނުމައްޗަށް ވެރިވިއެވެ. ޒިޔާއަށް އެންމެ ފަހުން ވިސްނުނެވެ. ޒީޝާން ވަކިވެދިޔުމަކީ އެމީހުންގެ އެކުވެރިކަން ފޮހެވިގެން ދިޔުން ނޫންކަމެވެ. އެއީ ހަމައެކަނި އެ އެކުވެރިކަން ހިތުގައި ރައްކާކުރާނެ ގޮތް ބަދަލުވުމެވެ. ކުރިން އުއްމީދުކުރި ގޮތަށް ޒީޝާން ކައިރީގައި ނެތް ނަމަވެސް، އޭނާގެ އަސަރު ފޯރާފައިވާ ކޮންމެ ކަމެއްގެ ތެރޭގައި ޒީޝާން ދިރިހުއްޓެވެ. ޒީޝާން ދަސްކޮށްދިން ހިތްވަރާއި، އޭނާގެ ކިބައިން ފެނުނު އޯގާތެރިކަމާއި، އަދިވެސް ހަނދާނުގައި ހުރި މަޖާ ވާހަކަތަކާއި، ޅަފަތުގެ ހަނދާންތައް ގެނެސްދޭ ލަވަތަކުގެ ތެރޭގައެވެ. އަދި އަމާންކަމަކީ ކޮބައިކަން ވިސްނައިގަންނަން ނޭނގޭ އުމުރުއްސުރެ، ޒިޔާގެ އެންމެ އަމާން ބަނދަރު ކަމުގައިވި އެ ފިރިހެން ކުއްޖާއަށްޓަކައި އަބަދުވެސް ޚާއްސަވެފައިވާ ހިތުގެ އެ ބައިގެ ތެރޭގައެވެ.
ޒިޔާ ހަނދުގެ އަލީގައި ކޮޅަށް ތެދުވެ، އުޑާ ދިމާއަށް ބަލައިލިއެވެ. އަދި ޒީޝާން އަދިވެސް އަޑުއަހަން ހުރި ފަދައިން ހިނިތުންވެލިއެވެ. އެހެނީ، ބައެއް ކަހަލަ ގާތް އެކުވެރިކަމަކީ މަރުގެ ސަބަބުންވެސް ނިމުމެއް ނުގެނެވޭނެ ފަދަ ފުން ގުޅުމެކެވެ. މީހަކު ތިބާގެ ފުރާނައިގެ ބަޔަކަށް ވެއްޖެނަމަ، އެމީހަކު ހަގީގަތުގައި ދުވަހަކުވެސް ވަކިވެގެން ނުދެއެވެ. އެމީހުން ބަދަލުވަނީ ހަމައެކަނި މުޅި އުމުރަށް ތިބާއާއެކު ވާ، ހިމޭން އިހުސާސަކަށެވެ.