މިހާރު ދެން ނޫހެއް ބަލައިލިޔަސް ފެންނާނީ ބަނޑު ހިންދާނޭ ކޮންމެވެސް މޮޅު ގޮތެއްގެ ވާހަކައެވެ. މިވެނި އެއްޗެއް ބުއީމާ މިވެނި ދުވަހެއް ތެރޭގައި މިވެނި ވަރަކަށް ބަރުދަން ލުއިވާނޭ ވާހަކައެވެ. ދުވަންވީ ގޮތާއި ހިނގަންވީ ގޮތުގެ ވާހަކައެވެ. ކާންވީ އެއްޗިއްސާއި ނުކާންވީ އެއްޗެހީގެ ވާހަކައެވެ. ނަމަވެސް ކަންކަން އަސްލު ހިނގާ މަގު ބަލައިލުން ކޮންމެވެސް މުހިންމު ކަމުގައި ދެކެމެވެ.

އަލީ (އުޅޭ މީހެއް ނޫން) އަކީ ވަރަށް ބޮޑު ބަނޑެއް ލާފައި ހުންނަ މީހެކެވެ. ރައްޓެހިން އަލީ ފެންނައިރަށް ބަނޑާ ބެހިލައެވެ. އެކަމާ އަލީވެސް މޭކަރާ ގޮތްވެ، އެންމެފަހުން 'ދުވާ މެޝިނެއް' ގަނެފިއެވެ. ހެޔޮވަރުގެ ޓެނިހަކާއި ދެންވެސް އެކަމަށް ބޭނުންވާ އާލާތްތައް ގެޔަށް ގެނެސް ހަމަކޮށްފިއެވެ. ތެޔޮ އެއްޗިއްސަށް ހޯހޯ ބުނަން ފަށައިފިއެވެ. އަލީ ކަސްރަތު ކުރާ ވާހަކަ އޭނާގެ ރައްޓެހިންނަށްވެސް އޮތީ ކިޔައިދީފައެވެ. ވަރަށް ކަރާ ފަޅާފައެވެ. އިންސްޓަރގްރާމް ވެސް ފުރިފައި އޮންނަނީ އެ ޒާތުގެ ފޮޓޯތަކުންނެވެ. ނަމަވެސް އަލީގެ ހަށިގަނޑަކަށް ބަދަލެއް ނާދެއެވެ. މަހެއްހާ ދުވަސްފަހުން، އަލީގެ އެކުވެރި މުހައްމަދު (އަސްލު އުޅޭ މީހެއް ނޫން) އަލީގެ ގެޔަށް ދިޔައިރު ފެނުނު މަންޒަރުން މުހައްމަދު ބިނދި ބިނދިފައި ޖެހުނީ ހޭށެވެ. 'ދުވާ މެޝިނުގައި' ދުވަނީ އަލީގެ އަންނައުނެވެ. މިއީވެސް ގިނަ މީހުންގެ ހާލަތެވެ.

މީސްމީޑިއާއިން ހަމަ އެއްޗެއް ފެންނައިރަށް އަޖުމަ ބަލާ މީހުން އަދި މާ މަޖަލެވެ. ތަފާތު ބުއިންތައް ދެލޯ މަރާފައި ގުން ކިޔާފައި ބޯން ޖެހުނަސް، ހިކެން ބޭނުންވެފައި ހުންނަލެއް ބޮޑުކަމުން ބޯލަނީ ޖެހިލުމެއްނެތިއެވެ. އެއީ ސައްޙަ މަސްދަރަކުން އައިސްފައިވާ ލިޔުމެއްތޯ ވެސް ބަލާކަށް ބޭނުމެއް ނުވެއެވެ. ގިނަ ފަހަރު ބުނެފައި ހުންނަވަރަށް ވުރެ އިތުރަށް ނުވަތަ މަދުން އެކަން ކުރުމުގެ ނަތީޖާއަކީ ފޫނެއް ފަޔަކަށް ފެން ފުރުން ކަހަލަ ކަމަކަށް އެކަން ވެގެން ދަނީއެވެ.

ދެން އޮތީ އަހަރެން ކަހަލަ މީހުންނެވެ. ޖަހާފައިވާ ލޮކި މަސްތައް ވިރުވަން ސިކުނޑި އަބަދާ އަބަދުމެ ބުނެއެވެ. ނަޞޭހަތްވެސް ދެއެވެ. ތަފާތު ސައިޓުތައްވެސް ބެލެއެވެ. ކަސްރަތުވެސް ކުރެވެއެވެ. ނަމަވެސް ކެއުމާ ޖެހުމުން ވަނީ އެހެން ގޮތެކެވެ. މީރު އެއްޗެއް ފެންނަންދެން ހުރެވޭނީ ޑައިޓްގައެވެ. ކިތަންމެ ލަސްވިޔަސް ރައްޓެހި ގުރޫޕަކާ ޖެހި މީރު ކާއެއްޗެއް އެމީހުން ކާތަން ފެނުނަސް ޑައިޓް މަތިން ހަނދާން ނައްތާލައެވެ. ކޮފީ އެއް ބޯލާނީއޭ ހިތާ ދިޔަސް ނިމިގެން ދާނީ ޝަވަރުމާއަކުންނެވެ. ނޫނީ ޗިކަން ކުރިޔަށްލާފައި ކޮންމެވެސް އެއްޗަކުންނެވެ. މިއީ ޑައިޓް ކުރުމުގެ ގިނަ މީހުންގެ ތަޖުރިބާއެވެ.