ތުއްތުކުދިން ދުނިޔެއަށް އަންނަނީ އެންމެންގެ މޫނުމައްޗަށް ހިނިތުންވުން ގެނުވަމުންނެވެ. އަލަށް އުފަންވާ ކުދިންނާއި އެކު މުޅި އާއިލާ އާއި އަވަށްޓެރިންނަށްވެސް އުފާވެރިކަން ގެނުވައެވެ.   އަދި އެކުދިންގެ އުމުރުގެ އެކި މަރުޙަލާގައި އެކި ރަށް ރަށުގައި އެކުދިންނަށް ކޮށްދެވޭ ޚާއްސަ ކަންކަން ހުރެއެވެ. އެގޮތުން މިއަދު މި ބަލާލަނީ ތުއްތުކުދިން އަލަށް ގެއަަކަށް ގެންދިއުމުން ރ. އަލިފުށީގެ އިހުގެ މީހުން ކަންކޮށް އުޅުނު ގޮތަށެވެ.

ރ. އަތޮޅު އަލިފުއްޓަކީ އާދަކާދަ އާއި ސަގާފަތާއި ގުޅުވައިގެން ވަރަށް ގިނަކަންކަން ވަރަށް ފަހަކާ ޖެހެންދެންކުރަމުން އައި ރަށެކެވެ. ނަމަވެސް މި ފަދަ ބައެއް ކަންކަމަކީ ބިދުޢައެއް ކަމަށް ނުވަތަ އަޅުގަނޑުމެންގެ އިސްލާމް ދީނުގެ ސަގާފަތާއި ފުށުއެރުން ހުރި ކަމަށް ގަބޫލުކުރެވި އެފަދަ ވަރަށް ގިނަ ކަންކަން ކުރުން ވަނީ ހުއްޓާލާފައެވެ.

ނަމަވެސް އިހުގެ މީހުންގެ ފަރާތުން އަދިވެސް ފެންނަ އެއް އާދައެއް ވެއެވެ. ތުއްތު ކުއްޖަކު ގެއަކަށް އަލަށް ގެންދާ ދުވަހު އެކުއްޖަކަށް ހަދިޔާއެއްގެ ގޮތުގައި ކާއްޓެއް ދޭނެއެވެ. އާންމުކޮށް މިއީ ވަރަށް އޮށްބޮޑު ކާއްޓަކަށް ވާނެއެވެ. އަދި މި ކާށިން ރުއް ފެޅުމުން ކުއްޖާގެ ނަމުގައި މި ރުށް އިންދެއެވެ. އަދި ބޮޑުވަންދެން ބަލަހައްޓައެވެ. މިހެން އެއް ކުއްޖަކަށް ވަރަށް ގިނަ ކާށި ލިބިދާނެއެވެ. ނަމަވެސް ރުށް ފަޅާ ހުރިހާ ކާށިވެސް ވަރަށް ފަރުވާތެރިކަމާއެކު ބަލަހައްޓާނެއެވެ.

އެގޮތުން މަތީގައިވާ ފޮޓޯއިން ތިޔަ ފެންނަ ރުކަކީ މީގެ 11 އަހަރު ކުރިން އުފަންވި ކުއްޖަކު، އާއިލާގެ ގެއަކަށް ގެންދިއުމުން އެގެއިން ދިން ކާއްޓަކުން ފަޅާފައިވާ ރުކެކެވެ. އާއިލާގެ ފަރާތުން މި ރުށް ވަރަށް ފަރުވާތެރިވެގެން ބަލަހައްޓަމުން އާދެއެވެ. މި ރުށް އިންދީ ގެވަޅު ދޫ ނުކުރާ ހުސް ބިމެއްގައެވެ. ނަމަވެސް މިހާރު މިހިސާބުން ވަނީ އާންމުންނަށް ގެވަޅު ދޫކޮށްފައެވެ. އާއިލާގެ ފަރާތުން ބޭނުންނަމަ ނަގައިގެން އެހެން ތަނަކަށް ގެންދެވޭނެއެވެ.

ޒަމާނަށް އައި ބަދަލު ތަކާއި އެކު ކާށީގެ ބަދަލުގައި މިހާރު އެހެން ހަދިޔާ ދެެވެއެވެ. ނަމަވެސް މިހެން ހަދިޔާ ދިނުމަކީ އަދިވެސްމިރަށުގައި ކުރަމުން އަންނަ ކަމެކެވެ. ޒުވާން ބެލެނިވެރިންގެ ފަރާތުން ނުފެނުނު ނަމަވެސް މިއީ އަދިވެސް އިސްރަށްވެރިންގެ ފަރާތުން ފެންނަ ވަރަށް ލޯބިވެތި އާދައެކެވެ. މިހާރު ދެވޭ ހަދިޔާތަކުގެ ތެރޭގައި ގިނައިން ހިމެނެނީ ސައިބޯނި ފަދަ، ބޭނުންކޮށް ހުސްވާ ހަދިޔާއެވެ.