ޒަމާން މިވަނީ ބަދަލުވެފައެވެ. މުށުތެރެއަށް މުޅި ދުނިޔެ ލެވިފައެވެ. މުވާސަލާތީ ގުޅުމުން ދިރިއުޅުމުގެ ކަންކަމަށް ގެނައި އިންޤިލާބީގެ މަންފާއާއި ލާބަ އެންމެން މިދަނީ ތަންމިނަށް ލިބިގަންނަމުންނެވެ. އޭގެ ތެރެއިންވެސް އެންމެ ވައިގައި ހިފާފައިވާ އެއް މަންސައަކީ މީސްމީޑިއާގެ އެޕްތަކުގެ ތެރެއިންވެސް ވައިބަރއޭ ބުނުމަކުން ދޮގަކަށް ނުވާނެއެވެ. ހުރިހާ އުމުރެއްގެ މީހުންމެ ފޯނުތަކާއި ޓެބްލެޓްތަކާއި ކޮމްޕިއުޓަރުތަކުގައި ރަސްކަން ކުރަމުންދާ އެކައްޗަކަށް ވައިބަރު ވެއްޖެއެވެ. އޭގެ ބޭނުން ހެޔޮގޮތުގައި ހިފަން އެންމެންވެސް ބޭނުންވާއިރު، އެ މަޤުޞަދު ހާޞިލު ވޭބާއޭ ހިތަށް އަރައެވެ.

ބައެއް މީހުން ބުނާ ގޮތުން މިހާރު ސުކޫލުތައް ވެސް ހިންގަނީ ވައިބަރއިންނެވެ. އިސް މުވައްޒަފުންގެ ގުރޫޕެކެވެ. މުދައްރިސުންގެ ގުރޫޕެކެވެ. ކޮންމެ ކުލާހަކަށް ގުރޫޕެކެވެ. މުދައްރިސުންނާއި ދަރިވަރުންގެ ގުރޫޕެކެވެ. ސުކޫލުގެ ހުރިހާ ދަރިވަރުންގެ ގުރޫޕެކެވެ. ބެލެނިވެރިންނަށް ކަންކަން އެންގުމަށް ގުރޫޕެކެވެ. ޕީޓީއޭ އިން އަންގާ އެންގުންތަކަށް އަނެއްކާ ވަކި ގުރޫޕެކެވެ. މިހެން ގޮސް ލައްކަ ގުރޫޕްތައް ހަމައެކަނި ދަރިއެއްގެ ކިޔެވުމާ ގުޅޭ ގޮތުންވެސް އޮވެއެވެ. އަނެއްކާ ހަރަކާތެއް ހިންގާނަމަ އެކަމުގައި އިސްކޮށް އުޅޭ މީހުންގެ ގުރޫޕަކާއި ހަރަކާތާ ގުޅޭ ގުރޫޕެކެވެ. މިކަހަލަ ވަގުތީ އެތަކެއް ގުރޫޕްތަކާއި އެ ގުރޫޕްތަކުން އޮޅިގެންވެސް ނުކުމެވިއްޖެނަމަ ކުށްވެރިވާ އެތަކެއް ގުރޫޕް ޗެޓްތަކުން މުޅި ވައިބަރ އޮންނަނީ ތޮއްޖެހިފައެވެ.  މަސައްކަތުގެ މާހައުލުގައިވެސް ކަން އޮތީ މިހެނެވެ. ހުރިހާ ގިންތިއަކާއި ފަންތިއަކަށް ވަކިވަކި ގުރޫޕްތައް ހެދިފައި ހުރެއެވެ. މުހިންމު އެންގުންތައް އެންގުމަށެވެ. މުހިންމު ލިޔެކިޔުންތައް ހިއްސާ ކުރުމަށެވެ. 

ނަމަވެސް، ސުވާލަކީ ވައިބަރ އަށް މިހާ ބޮޑަށް ބަރޯސާ ވާން ކޮންމެހެން ޖެހޭތޯއެވެ؟ ބަވަނަވެފައި މިވާ ދުނިޔޭގައި ޓެކްނޮލޮޖީއަކީ މުހިންމު ބައިވެރިއެކެވެ. މިގޮތުން މައުލޫމާތު އަވަހަށް އަދި އެއްފަހަރާ ގިނަ ބަޔަކަށް ހިއްސާ ކުރުމަށް ވައިބަރ ކަހަލަ މީސްމީޑިއާ އެޕް ބޭނުން ކުރުމަކީ މި ޒަމާނުގައި ކޮންމެހެންވެސް ކުރަން ޖެހޭ ކަމަކެވެ. ދިރިއުޅުމުގެ ހާލަތު ހުންނަ ގޮތުން ބެލެނިވެރިންގެ ބައްދަލުވުމަކަށް ބެލެނިވެރިއަކަށް ހަމަ ނުދެވިދާނެއެވެ. މަސައްކަތްތައް ހުންނަ ގޮތުން ރައްޔިތުންނާ ގުޅުންހުރި ބައްދަލުވުމަކަށް ނުދެވިވެސް ދާނެއެވެ. ރަށު ކައުންސިލުންނާއި އިދާރާތަކުން ނެރޭ މުހިންމު އެންގުންތަކާއި އިޢުލާންތައް ބަލަން އެ އިދާރާތަކުގެ ނޯޓިސްބޯޑު ދޮށަށް ދާން ކޮންމެ ފަހަރަކު އުނދަގޫވާނެއެވެ. މި ސަބަބުތަކާ އެކު މީސްމީޑިއާގެ މުހިންމުކަން އަންދާޒާ ކޮށްލެވެއެވެ. ބައްދަލުވުމެއްގައި ކަންކަން ހިނގާދިޔަ ގޮތް ނުދެވޭ މީހަކަށް ތުންތުން މަތީން ގެނެސްދޭއިރު ހުންނާނީ ގިނަ ފަހަރު އެއްބައި މަދުންނެވެ. ނޫނީ އިތުރުވެފައެވެ. އޭގެ އަސްލު ގެއްލިފައެވެ. އެހެން ކަމުން ބައްދަލުވުންތައް ބޭއްވުމަށްފަހު ހިނގާދިޔަ ކަންތައްތަކުގެ ހުލާސާއެއް މީސްމީޑިއާ އެޕްއަކުން ހިއްސާ ކުރުމަކީ ވަރަށް މުހިންމު ކަމެކެވެ. އެތަނަށް ދާމީހުންނަށްވެސް ފަހުން ބަލައިލެވެން އޮންނާނެތީއާއި ނުދާ މީހުންނަށް ވާންވީ ގޮތް އެނގޭނެތީއެވެ.

މިއާ ޚިލާފަށް މިހާރު ގިނަ ފަހަރު ވަނީ މުޅީން އެހެން ގޮތެކެވެ. ގިނަ ފަހަރު ބައްދަލުވުންތައް ބޭއްވުމުގެ ބަދަލުގައި މިކަން އޮންނަންވީ މިހެނޭ ކިޔާފައި ގުރޫޕްތަކުގައި ޖަހާލަނީއެވެ. އެންމެނަކީ އިންޓަނެޓާއި ސްމާޓް ފޯނު ގެންގުޅޭ މީހުންނަށް ނުވެދާނެކަން ގަބޫލު ކުރުމެއް ނެތިއެވެ. އޭގެ ސަބަބުން މަޢުލޫމާތު އެނގެން ޖެހޭ މީހުންނަށް އެކަމުގެ ހިލަމެއްވެސް ނުވެ ދަނީއެވެ. އެކަމާހުރެ ކަންކަމުގައި މަސްލަހަތު ގެއްލި މީހުން މޫނު ގެއްލެނީވެސް މަދެއްކޮށެއް ނޫނެވެ. 

މީސްމީޑިއާ ބޭނުންވެސް ކުރަންވީއެވެ، އެހެން ނަމަވެސް، އެކަމުގައި ވެސް ހައްދެއް ގެންގުޅެން ވާނެއެވެ. މިހާރު ގުރޫޕްތައް ގިނަކަމުން ގިނަ މީހުން ގުރޫޕްތައް ހުންނަނީ މިއުޓް ކޮށްލާފައެވެ. އިންޓަނެޓާ ގުޅާލާއިރު ފޯނު ނޭވާ ނުލެވޭ ވަރަށް ނޮޓިފިކޭޝަންތައް އޮހޭތީއެވެ. މިހެން ގުރޫޕްތައް މިއުޓް ކުރާއިރު މުހިންމު ގުރޫޕެއް މިއުޓް ކޮށްލެވިއްޖެނަމަ ދެން އެއޮތީ ވާނެދަމެއްވެ ނިމިފައެވެ. އެމީހަކު ނުލާ އާއިލީ ބޮޑު ދަތުރެއްވެސް ނިންމާލަފާނެއެވެ. ދަރިވަރު ސުކޫލުން ކަނޑާލާ ހިސާބަށްވެސް ހިނގައިދާނެއެވެ. ހަރަކާތަކަށް އެއްބާރުލުން ނުދޭނީ ބެލެނިވެރިޔާ ބްލެކް ލިސްޓަށްލައިވެސް ދާނެއެވެ. ނަމަވެސް، އެގަހު ކޭލެއް މިގަހު ކޭލެއް ނޭނގޭ ވަރުވީމާ ވާނީ ވެސް އެހެންތާއެވެ.