އަހަރުމެންގެ ތެރެއިން ކޮންމެ މީހަކީ ވެސް ތަފާތު ދިރިއުޅުމެއް އުޅޭ މީހެކެވެ. ތަފާތު ކަންކަން ތަޖުރިބާ ކުރަމުން އަންނަ މީހުންނެވެ. ދިރިއުޅުމުގެ މި ހަނގުރާމައިގައި އެތައް އަޑިގުޑަން ތަކެއް ގިރާ ކުރަން ޖެހިފައިވާ ބައެކެވެ. އެއް ދުވަހު ހީލާ މަޖާ ކޮށްލައިފިނަމަ، އަނެއް ދުވަހު ރޯލަން ޖެހެއެވެ. އަޑިގަނޑަކަށް ފަހު އުސްގަނޑެއް އަންނާނޭ ބުނާ ފަދައިންނެވެ.

ދިރިއުޅުމުގައި ދިމާވާ ކަންކަން ހިއްސާ ކުރުމަށް އަބަދުވެސް ކޮންމެވެސް އެކުވެރިއެއް ނުވަތަ އެކުވެރިންތަކެއް ތިބެއެވެ. ލިބޭ ކޮންމެ އުފަލަކާއި ހިތާމައެއް އެ މީހުންނާ ހިއްސާ ކުރެއެވެ. ނަމަވެސް، އަހަރުމެންގެ ތެރެއިން އެކުވެރިންނާ ރަޙްމަތްތެރިން ވަކި ކުރުމަކީ އުނދަގޫ ކަމެކެވެ. މިކަން އެނގިގެން ދަނީ ދިރިއުޅުމުގައި ދިމާވާ ބޮޑު ކަމަކާ ގުޅިގެންނެވެ.

އިންތިހާއަށް ލޯބިވި ބައިވެރިޔާ ގެއްލި ދުނިޔެ މަތިން ފޫހިވެ، ކެއުމާ ބުއިމުން އެއްކިބާވެ، މީސްމީހުންނާ ވާހަކަ ދެއްކުން ފޫހިވެ، އަތުން ފައިން ގޯހެއް ހެދޭ ހާލުގައި ތިބާގެ އަތުގައި ހިފާލާނީ ރަހްމަތްތެރިއެއްކަން ޔަގީނެވެ. އެ ފަދަ ހާލަތެއް މެދުވެރިވުމުން ތިބާގެ ކައިރީ އުޅޭ އެކުވެރިންގެ ތެރެއިން ބައެއް މީހުންގެ ޚަބަރުވެސް ނުވާނެއެވެ. ތިބާއަކީ މޮޔައެއްކަމަށް ނިންމާ، އެހެން މީހުންގެ ކުރިމަތީގައި ތިބާ ފަޟީހަތް ކުރަމުން ދުވާނީ ވެސް އެންމެ ފުރަތަމަ އެކުވެރިންގެ ގޮތުގައި ގާތުގައި ތިބި މީހުންނެވެ. ނަމަވެސް، ކުރިން މި ދެންނެވި ހާލަތު މެދުވެރިވުމުން ތިބާއާ ގާތްވެ، ވެގެން އުޅޭ ގޮތް އޮޅުން ފިލުވާ، ތިބާއަށް ހެޔޮ ގޮތް ކިޔައިދޭ މީހަކު ނަމަނަމަ ދޫކޮށް ނުލާށެވެ. އެއީ ތިބާއަށް ހުރި ރަހްމަތެކެވެ.

އަތްމަތި ދަތިވެ ހާސްވެ ކަންބޮޑުވެ ގޮތް ހުސްވާ ހާލަތަކީ ހެޔޮ އެދޭ މީހުންނާ އަޑިނުބައި އެކުވެރިން ހާމަވާ ކަމެކެވެ. މާލީ ހާލަތު ބަދަލުވާކަށް ފަޅި ސިކުންތެއް ނުނަގާ ފަދައިން ހެޔޮ އެދޭ ރަޙްމަތްތެރިންކަމަށް ދެކޭ އެކުވެރިންގެ އަޑި އެނގި ހާމަވާކަށް ވެސް ފަޅި ސިކުންތެއް ނުނަގައެވެ. އެހީ އަކަށް އެދުމުން އެކުވެރިން ފިލާނެއެވެ. ތަނަވަސްކަން ހަމަ ލިބޭ އިރަށް އޭރު ޚަބަރު ނުވި އެކުވެރިން އަނެއްކާ ވެސް ފެންނަން ފަށާނެއެވެ. ނަމަވެސް، އަތްމަތި ދަތިވެ މާޔޫސްވެގެން އުޅުނުއިރު އެހީ ނުވި އެކުވެރިންނާ އެހީގެ ކުޑަ މިންވަރެއް ވެދިން ރަޙްމަތްތެރިންނާއި، އެހީތެރިކަމެއް ނުދެވުނު ނަމަވެސް ހެޔޮ ދުޢާ ކޮށްދީ މަގެއް ހޯދޭތޯ އެކުގައި އެ ދުވަސްތައް ވޭތު ކުރި ރަޙްމަތްތެރިންގެ މަތީން ނަމަނަމަ ހަނދާން ނައްތާ ނުލާށެވެ.

ރަޙްމަތްތެރިން ކަމަށް ބަލާނަމަ، މި ކަންކަން ފުރިހަމަ ވޭތޯ ބަލާށެވެ. ތިބާއަށް އިތުބާރު ކުރާނެއެވެ. ތިބާގެ ވާހަކަ އެހެން މީހުން ގާތު ގޯސްކޮށްގެން ނުދައްކާނެއެވެ. އެހެން މީހުންގެ ކުރިމަތީ ތިބާ ދިފާޢު ކުރަން މަސައްކަތް ކުރާނެއެވެ. ތިބާގެ އިހްސާސްތައް އަޑު އަހާނެއެވެ. ހެޔޮ ނަޞޭހަތް ދޭނެއެވެ. ވަގުތު ހޭދަ ކުރާނެއެވެ. މިކަންކަން ފުރިހަމަވުމަށްފަހު ވެސް، އުނދަގޫ ހާލަތެއް މެދުވެރިވަންދެން މަޑު ކޮށްލާށެވެ. އޭރުން ހަގީގީ ރަޙްމަތްތެރިން ފާޅުވާނެއެވެ.