އަހަރެން އުޅުނީ އެހެން ދުވަސްތަކެކޭ އެއްފަދައިން އޮފީސްގެ ކަންކަމުގައި އަވަދިނެތިއެވެ. އަހަރެންނަކީ ފޯނަށް ޖަވާބު ދިނުމުގައި 'ދަށް' މީހެއްކަމުގައި ލޭބަލް ކުރެވިފައިވާ މީހެކެވެ. އެހެންކަމުން، ފޯނަށް ދެ ކޯލު އައިކަން އެނގިހުރެ ކުރަން ހުރި ކަންތައް ނިންމާލާފައި ބަލާލުމުގެ ވިސްނުމުގައި ހުރީމެވެ. ނަމަވެސް ތިންވަނަ ފަހަރަށް ރިންގްވާން ހެދީމާ ބަލައިލީމެވެ. ގުޅަނީ ބޭބެއެކެވެ. ނެގުމާއެކު ރުޅިއައިސްގެން އަހަރެންނަށް އެތިވަރު ގޮވާލައިފިއެވެ. ފޯނު ނުނެގުނީތީއެވެ. އެއަށްވުރެ ބޮޑަށް ރުޅިގަދަވީ ފޯނުގެ މައިޓޯންއާ ގުޅިގެންކަން ބޭބެގެ ވާހަކައިން އެނގުނެވެ. ގުޅީ ބޭބެއެއް ނިޔާވެގެން އެ ޚަބަރު ދޭން ވެގެނެވެ. ނަމަވެސް އެ ހާދިސާއަށްފަހު، މަދަހައެއް ލައިގެން ދުވަސްކޮޅަކު އުޅުމަށްފަހު، މައިޓޯން ކެންސަލް ކޮށްލީއެވެ.

މި ދެންނެވުނީ އަހަރެންނަށް ދިމާވި ގޮތެވެ. ދާދި ފަހުން ރައްޓެއްސަކު މީހަކަށް ގުޅަނިކޮށް ކައިރީގައި އިނދެވުނެވެ. ގުޅީ ސްޕީކަރު އޮން ކޮށްގެން ކަމަށް ވާތީ، އެ ކޮޅުން ނެގީ ކަމަށް ހީކޮށް އެކުވެރިޔާ ވާހަކަ ދައްކަން ފެށިއެވެ. ނަމަވެސް، މާފަހުން އެއީ އެ ފޯނުގެ މައިޓޯން ކަން އެނގުނެވެ. ތަމަޅަބަހުން ކޮންމެވެސް ބަނދިވަރެއް ކިޔާ ނަގަނީއެވެ. ދެ މީހުން ހީހީ އަވަދިވިއެވެ. ފޯނު ނެގުމުން މައިޓޯންގެ ވާހަކަ އަހާލުމުން އެއީ އޭނާ އާއި އެކުގައި ރިސޯޓުގައި އުޅޭ ބިދޭސީންގެ އުނދަގޫ ބޮޑުވެގެން ލީ މައިޓޯނެއްކަމުގައި ބުނެ ހަމަޖައްސާލިއެވެ.

މިއީ ވަރަށް ގިނައިން ދިމާވާ ކަމެކެވެ. ގުޅާ މީހާ ކޮންމެފަދަ ހާލަތެއްގައި ހުރެ ގުޅިއަސް، އިވޭ މައިޓޯންއެއްގެ ސަބަބުން ގުޅާ މީހާގެ މޫޑު ބަދަލު ކޮށްލައެވެ. ހާލަތުގެ ގޮތުންނެވެ. ހިތާމަވެރި ޚަބަރަކައިގެން ގުޅާ ވަގުތު މަޖާ މައިޓޯނެއްގެ އަޑު އަހަން ބޭނުންވާނީ ކާކު ހެއްޔެވެ؟ ނަމަވެސް، ރުޅި އައިސްގެން ގުޅާ ވަގުތު މަޖާ މައިޓޯނެއް އަޑު އިވުމުން މީހާގެ ރުޅި މައިތިރިވެސް ވެދާނެއެވެ. ނޫނީ އިހުނަށްވުރެ ބޮޑަށް ރުޅި އިތުރުވެސް ވެދާނެއެވެ.

ފޯނަށް މައިޓޯން ލުމުގައި އެކި މީހުން ގެންގުޅޭ އުޞޫލުވެސް ތަފާތެވެ. ދީނީ މައިޓޯންތައް ލާ މީހުންނާއި ލަވަލަވަ ލާ މީހުންނެވެ. ޒުވާބު ކުރާ އަޑުކޮޅުތަކާއި ފަރަންޖީ ފިލްމުތަކުގެ ޑައިލޮގްތަކެވެ. މި ނޫންވެސް އެކި ޒާތްޒާތުގެ މައިޓޯން ލައި އުޅެއެވެ. ބައެއް މީހުނަށް ގުޅާލުމުން މި ގުޅެނީ ލަވަ ބާޒީއަކަށް ބާއޭ ހިތަށް އަރާ ފަހަރުވެސް އާދެއެވެ. މި ސަބަބުތަކާހުރެ، ބައެއް މީހުންނަށް ނުގުޅަންވެސް ހިތަށް އަރައެވެ. ލާފައި ހުންނަ މައިޓޯންގެ ސަބަބުން ތުރާ ބޮޑުވެގެނެވެ.