އުފަންދުވަސް އަންނާތީ ވަރަށް އުފާވެއެވެ. ކުރިޔާލާ ދުވަސްތައް ގުނާ ބާކީ އޮތީ ކިތައް ދުވަސްކަން ހަނދާނުގައި ބަހައްޓައެވެ.  ކަލަންޑަރތުގައި ތާރީޙް ފާހަގަކޮށް އެހެން މީހުންވެސް ތިބާއަށް ދުވަހުގެ ތަހުނިޔާ ކިޔަން އެދެވެއެެވެ. މިހުން ތިމާގެ އުފަންދުވަހު "ހެޕީ ބާތްޑޭ" ނުބުނީތީ ނުވަތަ އުފަންދުވަސްކަން އެ މީހުންގެ ހަނދާނުގައި ނެތުނީތީ ދެރަވެ މޮޅިވެއެވެ. ނަމަވެސް އުފަންދުވަހާމެދު ވިސްނާލުމުން ތިލަ ވަނީ އެހެން މާނައެކެވެ. ސިފަވަމުންދަނީ އުފާވެރިކަމެއް ނޫނެވެ. ފެންނަންފަށަނީ ހިތް ނުުތަނަވަސްކަމުގެ މަލަމައްޗެވެ.

އުފަންދުވަސް އައުމުން ފާހަގަ ކުރަނީ ތިމާއަށްވީ ކޮންމެވެސް އަހަރެކެވެ. ނަމަވެސް ރަނގަޅަށް ވިސްނާލުމުން ފަހުމުވެގެންދަނީ އެއީ ހަޔާތުން ނިމުނު އަހަރެއްކަމެވެ. އަހަރެއް އެކީ ތިމާއާ ވަކިވެގެން ދިޔައީއެވެ. ހަޔާތުން އަހަރެއް ފާއިތުވީއެވެ. އަހަރުމެންގެ މަރު، އަހަރުމެންނާ ނުހުނު ގާތް ވަނީއެވެ. ހުދު ފޮތިގަނޑުން ނިވާކޮށް ކަށްވަޅަށް އަހަރުމެން ތިރި ކުރާނޭ ދުވަސް ކުރިޔަށްވުރެ އެއް އަހަރު އަނެއްކާވެސް ކާއިރިވީއެެވެ. 

އުއްބައްތިތަކުން ޖަރީވެފައިވާ ކޭކުތަކާއި މާމެލާމެލިންނާއި ފުއްޕާހަމުން ތައްޔާރުކޮށްފައިވާ މެހެފިލަށްވުރެ މުހިއްމީ އަމިއްލަ ނަފްސު ހިސާބުކުރުމެވެ. ފާއިތުވެ ދިޔަ އަހަރުގައި، އުޅެވިފައިވާ ގޮތުގެ މައްޗަށް ނަޒަރު ހިންގާލަންވީއެވެ. ކުރެވިފައިވާ ފާފަތަކާއި ހެޔޮ ޢަމަލުތައް މިނެ ކިރާލަންވީއެވެ. ﷲ ސުބުޙާނަހޫ ވަތަޢާލާގެ ރުހިވޮޑިގަތުން ހާސިލްކުރުމަށް ކުރެވިފައި އޮތީ ކޮންކަމެއްތޯ އަމިއްލަ ނަފްސާ ސުވާލު ކޮށްލަންވީއެވެ. އާޙިރަތައްޓަކައި ގޮވާމެއް އިންދުނު ހެއްޔެވެ؟ ނުވަތަ ކޮނެވުނީ ނަރަކައިގަ އަނދަވަޅެއް ހެއްޔެވެ؟ އަމިއްލަ ނަފްސަށް މި ފަދަ ސުވާލުތައް އަމާޒު ކޮށްލާށެވެ. ކުރެވިފައިވާ ހެޔޮ ޢަމަލުތަކާއި އެ ޢަމަލުތަކުގައި ދެމި ހުންނަންވީ ޢަމަލުތަކާމެދު ފިކުރު ކުރަންވީއެވެ. ކުރެވުނު ފާފަތަކާއި (މާތް ﷲ އަޅަމެން އެންމެންގެ ފާފަތައް ފުއްސަވާށިއެވެ. އާމީން.) އެކަމުން ދުރުހެލިވާންވީ ގޮތްތަކާއި އިތުރަށް ރަނގަޅު ކުރަންވީ ސިފަތަކާއި ޢަމަލުތައް އަމިއްލަ މީހާއަށް ވިސްނައިދޭންވީއެވެ. 

އުފަންދުވަސް ފާހަގަ ކުރުމަކީ ޤުރުއާނާއި ސުންނަތުން ދަލީލި ލިބޭ ކަމެއް ނޫނެވެ. އުފަންދުވަސް ފާހަގަކުރުމާ ގުޅޭގޮތުން އިސްލާމްދީނުގައި ކަން އޮންނަ ގޮތާމެދު ކުރެވިފައިވާ ސުވާލެއްގެ ޖަވާުބުގައިވެއެވެ. " ޤުރުއާނާއި ސުންނަތުން ދަލީލު ލިބޭ ގޮތުގެ އަލީގައި އުފަންދުވަސް ފާހަގަ ކުރުން ބޮޑަށް ވަންނަނީ ބިދުޢަ ނުވަތަ ދީނަށް އަލަށް އުފައްދާފައިވާ ކަމެއްގެ ގޮަތުގައެވެ. އޭގައި އިސްލާމީ ޝަރީޢާގެ އެއްވެސް އަސާސްތަކެއް ނުހިމެނެއެވެ. އުފަންދުވަހުގެ ހަފްލާއަށް ދެވޭ ދަޢުވަތުތައް ޤަބޫލުކުރުންވެސް ހުއްދައެއް ނޫނެވެ. އެއީ ދަޢުވަތު ޤަބޫލުކުރުމުގެ ތެރެއިން ބިދުޢައަށް ބާރުއެޅި އެކަމަށް ހިތްވަރު ދެވޭތީއެވެ." (އިސްލާމް ކްއެޝަން އެންޑް އާންސާ)

އުފަންދުވަސް ފާހަގަ ކުރުމުގެ ބަދަލުގައި ފާއިތުވެގެން ދިޔަ އަހަރުގައި ކުރވުނު ޢމަަލުތައަް މިނެ ކިރުމުން ދުނިޔެއާއި އާޙިރަތުގެ ފާގަތިކަމާއި މަންފާ ލިބުމަށް މަގުފަހިވެގެންދެއެވެ. މަރުގެ މަތިން ހަނދާންވެ މަރަށް ތައްޔާރުވެ ތިބުމަށް ހިތްވަރު ލިބެއެވެ. ފާހަގަ ކުރަންވީ އުފަންދުވަހެއް ނޫނެވެ. ހިސާބު ކުރަންވީ ނަފްސެވެ.