ކަމަކު ބޭނުންވީމާ މީހަކު ތިބާގެ ގާތުން އެހީއަށް އެދި ތިބާ ބޭނުން ކޮށްފައި، އެކަމެއް ފުދުމުން ތިބާ ދުރުކޮށް އެކަހެރި ކުރިމާ ތިބާ ދެރަވެއެވެ. އެކަމާ ހިތްހަމަނުޖެހި އެކަމާ މެދު ނަފްރަތު ކުރެއެވެ. ނަމަވެސް ހަމަ އެފަދައިން، އެ މޭރުމުން އަހަރެންނާމެދު ތިބާ ކަންތައް ކުރާއިރު ތިބާ އެއްޗެއް ހިތައްވެސް ނާރަ ހެއްޔެވެ؟ އަހަރެން އެކަހެރިކޮށް އެއްލައިލާކަށް ތިބާ ލަދެއް ނުގަނޭ ހެއްޔެވެ؟ އެކަމާމެދު ދެރަވެ ތިބާ ހިތާމަ ކުރަމު ހެއްޔެވެ؟ 

އަހަރެންގެ ރަޙްމަތްތެރިޔާ ކޮންމެ ދުވަހަކުވެސް ތިބާއަށް ގޮވައެވެ. އަހަރެންގެ ގާތަށް އައުމަށް ހަނދާންކޮށްދެއެވެ. ނަމަވެސް ތިބާ އަހަރެން ނަޒަރްއަންދާޒްކޮށް އެކަހެރިކޮށްފައި ދަނީ އަހަރެންނަކީ ތިބާ ނުވެސް ދަންނަމީހެއްކަމަށް ހަދާފައެވެ. ތިބާ ރޮއެ އާދޭސްކުރިއިރު އަހަރެން ތިބާއާއެކުވީމެވެ. ތިބާ ހާސްވެ ނުތަނަވަސް ވެފައިވީ ވަގުތު، ތިބާގެ ހިތްހަމަޖެހުން ކަމުގައި އަހަރެން ވީމެވެ. ތިބާ ގޮތް ހުސްވެ، ނަފްސާނީ އަނދަވަޅުތަކަށް ވެއްޓިފައިވީ ވަގުތުތަކުގައި އެ އަނދަވަޅުތަކުން އަރައިގަންނާނެ ހަރުފަތްތައް ކަމުގައި އަހަރެންވީމެވެ. މާޔޫސްކަމުގައި ތިބާ ވަނިކޮށް ތިބާގެ ބޭހާއި ފަރުވާއަށް އަހަރެންވީމެވެ. ތިބާގެ ހިތާމަތަކާއި އަޑިގުޑަންތަކުގައި އަބަދުވެސް އަހަރެން ތިބާގެ ގާތުގައި ހުރީމެވެ. ތިބާގެ ލޮލުން ކަރުނައިގެ ކޯރުތައް ދެމޭ ކޮންމެ ފަހަރަކު އެ ކަރުނަތައް ފޮހެދޭ ބައިވެރިޔަކަށް އަހަރެން ވީއެވެ. ނަމަވެސް މިއަދު ލޮލުގެ ކޮޅުން ތިބާ އަހަރެންނާ ދިމާ ބަލައިވެސް ނުލައެެއެވެ. އަހަަރެންމީ ތިބާގެ ހަނދާނަށް އަންނަ އެންމެ ފަހު ހިޔާލެވެ. ނޫންނަމަ އެއްގޮތަކަށްވެސް ނާންނަ ހިޔާލެކެވެ. ތިބާ އަހަރެންނާމެދު ޢަމަލުކުރާ ގޮތާމެދު ތިބާއާ ސުވާލުވެވޭނެއެވެ. އެކަމާމެދު ތިބާ ބިރެއް ނުގަނޭ ހެއްޔެވެ؟ އަހަރެންނާމެދު ކުރެވޭ ސުވާލުތަކަށް ޖަވާބުދާރީ ވާން ތިބާގެ ދޫ ކުޅެދޭނެ ހެއްޔެވެ؟ އަހަރެންނަކީ ކާކުކަން ހަނދާން ވެއްޖެހެއްޔެވެ؟

އަހަރެންނަކީ ތިބާގެ ނަމާދެވެ. ހިތާމަޔާ މޮޅިވެރިކަމާ ކަރުނައިގެ ކަނޑުގައި ތިބާގެ އެންމެ ގާތުގައިވާ ނަމާދެވެ. އަހަރެންގެ ރަހުމަތްތެރިޔާއަކީ ކޮންމެ ދުވަހަކު ތިބާގެ ކަންފަތަށް 5 ފަހަރު އިވޭ ބަންގިއެވެ. ބޭނުންވާ ހާޖަތްތައް ފުދުމުންނާއި ހިތާމައިގެ ކަނޑުން ގެނބި ޣައަޣުބަނިކޮށް ތިބާ ސަލާމަތް ކޮށްިނުމުން ތިބާ އަހަރެންނަށް ދެނީ ފެންކައްކާ ބޮލީގެ އިއްޒަތެވެ. ޢަމަލުތައް މިނެ ކިރާ ދުވަހުގައި ތިބާއާ އެންމެ ފުރަތަމަ ދުވާލުވެވޭނީ އަހަރެންނާ ބެހޭގޮތުންނެވެ. އެކަމަށް ތިބާ ތައްޔާރު ހެއްޔެވެ؟ އަހަރެންގެ ރަހުމަތްތެރިޔާގެ ގޮވާލުމަށް ތިބާ ދެނީ ބީރު ކަންފަތަކެވެ. حي عل الصلاة (ނަމާދަށް އަވަހަށް އަންނާށެވެ!) އާއި حي عل الفلاح (ސަލާމަތާއި ނަސީބު ލިބިގަތުމަށް އަވަހަށް އަންނާށެވެ!) ގެ އަޑަަށް ތިބާ އިޖާބައެއް ނުދެމުއެވެ. އެ ބީދައިންތިބާ  ފަސްދީފައި ދާއިރު ތިބާއަށް ޒައްރެއްގެ މިންވަރުވެސް ދެރައެއް ނުވަތަ ލަދުވެތިކަމެއް އިޙްސާސެއް ނުވޭ ހެއްޔެވެ؟ ތިބާއަށް ހަމަ އަސަރެއް ނުކުރޭ ހެއްޔެވެ؟ އަހަރެންނަށް ފަސްދީފައި ދާއިރު ތިބާއަށް އަސަރެއް ނުކުރޭ ހެއްޔެވެ؟ ހަނދާނުގައި ބަހައްޓާށެވެ. އަހަރެންވަނީ ތިބާގެ ދެދުނިޔޭގެ ބާއްޖަވެރިކަމާ ގުޅި ލާމެހިވެފައެވެ. ފަޟާޙާއި ކާމިޔާބު ލިބޭނީ އަހަރެންނަށް ރައްކާތެރިވެގެންނެވެ. އަހަރެންނަކީ ތިބާގެ ހިތްހަމަޖެހުމާއި އުފާތަކަށް ވާސިލްވެވޭނެ ޒަރީޢާއެކެވެ. ހަޔާތުގައި ތިބާއަށް މަގުކޮށައިދީ ރަނގަޅު މަގުން ކުރިޔަށް ދިއުމަށް އެހީތެރިވާ އާރުކާޓީއެކެވެ. ގޯސް ޢަމަލުތަކުން ތިބާ ދުރުކޮށްދޭ މޭސްތިރިއެކެވެ. ވީމާ ތިބާ އަހަރެންނަށް ސަމާލުވާށެވެ. އަހަރެންނަށް ރައްކާތެރިވާށެވެ. ތިބާ، ނަމާދަށް ރައްކާތެރިވާށެވެ.