2023 ވަނަ އަހަރުގެ އޮކްޓޯބަރ 7ގައި ހަމާސްއިން އިސްރާއީލަށް ދިން ހަމަލާއިން މުޅި ދުނިޔެ ކެކިއަރައިގެން ދިޔައީ ނުހަނު ހަލުވި މިނުގައެވެ. ހުޅަނގުގެ އެތައް ޤައުމަކާއި ވެރިންނެއް މިކަން މަނާކުރުމަށް ނެނގީ ފަޅި ސިކުންތެކެވެ. އެއީ އެ ހަމަލާ އަމާޒު ކުރީ މުސްލިމު ޖަމާޢަތަކަށްވީތީއެވެ. އިސްރާއީލުގެ ލާއިންސާނީ އަތްތަކުން މަރާ ސުންނާފަތި ކުރަމުން ދިޔަ ފަލަސްތީނުގެ އަޙުންނާއި އުޙުތުންގެ ރުއިމާ ހަޅޭކުގެ އަޑު އެވެރިންގެ ކަންފަތަށް 75 އަހަރުންވެސް ނުފޯރިއެވެ. އިސްރާއީލުގެ އަޅުވެތިކަމުގައި އަމިއްލަ ވަޒަނުގައިވެސް ރެފިއުޖީންގެ ގޮތުގައި އުޅެމުން ގެންދާތާ ކޮން ޒަމާނެއް ހެއްޔެވެ؟ ނަަމަވެސް ބަވަނަވަމުން އަންނަ މި ދުނިޔޭގައި ކުރިއަރާފައިވާ ޓެކްނޮލޮޖީގެ ސަބަބުން ފަލަސްތީނުގެ ނޫސްވެރިންނާއި ޓީވީ ރިޕޯޓަރުންނަށް ފަހިވެގެން ދިޔައީ މަގެކެވެ. ކަމުގެ ހަޤީޤަތް އެންމެންގެ ކުރިމައްޗަށް ގެނައުމަށް އެ ފަހުލަވާނުން ނުކުތީ އަތުގައި އޮތް ފޯނަކާއި ކެމެރާއެއް ހިފައިގެންނެވެ. އެ އާރުކާޓީންގެ އަމާޒަކަށްވެސް އަދި ހަތިޔާރަކަށްވެސް ވީ، 'ހައްޤު ތެދު' ދުނިޔެއަށް ހާމަކުރުމެވެ.

އިސްރާއީލުގެ ހަޤީޤީ ކުލަވަރު ދުނިޔެއަށް ހާމަވާން ފެށުމުން އެބައިމީހުންނަށް ވާގިވެރިވާ ހުޅަނގުގެ ނޫސް މަޖައްލާތަކާއި ޓީވީ ޗެނަލްތަކުން ނެރެންފެށީ ދޮގު ޚަބަރުތަކެވެ. މީސްތަކުންގެ ލޯ މައްޗަށް އޮޅުވާލުމަށްޓަކައި، ލަފްޒުތައް ބޭނުންކުރާ އުސްލޫބު، އެވެރިން ބަދަލުކޮށްލިއެވެ. ޤަތުލުޢާއްމަށް އެވެރިން ނަން ދިނީ 'ހަނގުރާމަ' އެއްގެ ގޮތުގައެވެ. ހަތިޔާރެއް ނާޅާ ތިބޭޭ އާއްމު ރައްޔިތުން ދިރިއުޅޭ އިމާރާތްތަކާއި، ރެފިއުޖީ ކޭމްޕްތަކުގެ އިތުރުން  މަދަރުސާތަކާއި ހޮސްޕިޓަލްތަކަށް ބޮން އެޅުމަކީ ހަނގުރާމަ ކުރުމެއް ނޫނެވެ. ހަނގުރާމައެއްގައި ދެ ފަރާތުގައި ހަތިޔާރު ހުންނަންޖެހޭނެއެެވެ. ހަމާސް ޖަމާޢަތް އަތުލައިގަތުމުގެ ނަމުގައި އެ ޖާހިލުން ސުންނާފަތިކުރަމުން ދަނީ މުޅި ޣައްޒާއެވެ. ބަރަކާތްތެރިވެގެންވާ މުޅި ފަލަސްތީނެވެ. 

އިސްރާއީލުގެ ހަމަލާތަކަށް އެބައިމީހުން ނަންދިނީ އަމިއްލަ ނަފްސު ދިފާޢު ކުރުން ނުވަތަ 'ސެލްްފް ޑިފެންސް' ގެ ނަމުގައެވެ. ކުށެއްނެތް މައުސޫމު ކުޑަކުދިންނާއި އާއްމުން ބޯހިޔާވަހިކަން ހޯދަމުންދާ ޓެންޓުތައް އަންދާ އަޅިއަށް ހެދުމަކީ އަމިއްލަ ނަފްސު ދިފާޢު ކުރުމެއް ނޫނެވެ. ގައިބާރު ދޫވެފައިވާ މުސްކުޅި މާމައެއް، އަމިއްލަ ގޭގައި ނިދަފައިވާ ވަގުތު، ވަލު ކުއްތާއެއް އެ މާމަގެ ގަޔަށް ދޫކޮށްލުމަކީ އަމިއްލަ ނަފްސު ދިފާޢު ކުރުމެއް ނޫނެެވެ. އަމިއްލަ ނަފްސު މީހުން ދިފާޢު ކުރަނީ ނުރައްކަލެއް ކުރިމަތިވާ ބައެއްގެ ކިބައިންނެވެ. ހަތިޔާރެއް ނެތް މައުސޫމު ރައްޔިތުންތަކެއް ޤަތުލު ކުރަމުން އަޑުގެ ކޮޅަށް 'ސެލްފް ޑިފެންސް' ކަމުގައި ގޮވަމުން ހަޅޭއްލެވިޔަސް އެއީ އަމިއްލަ ނަފްސު ދިފާޢު ކުރުން ކަމުގައެއް ނުވާނެއެވެ. ޒަމާނީ ހަތިޔާރުތަކާއި އެންމެ ފަހުގެ ބްލެޓް ޕްރޫފް ޖެކެޓްތައް އައްޑަނައަކަށް ހެދުމަށް ފަހު އަތަށް ހެޔޮވަރު ބަޑިއަކާއި ބޮލަށް ފެތޭ ހެލްމެޓު އެޅުމަށްފަހުވެސް އެއްވެސް ހަތިޔާރެއް ނެތް ރައްޔިތުންނާ ކުރިމަތިލާއިރު އެނގިގެންދަނީ އެވެރިންނަށް ވުރެ ފިނޑިބައެއް ނެތްކަމެވެ. 

އިސްރާއީލުން ގަސްތުގައި މަރާލާ ފަލަސްތީނުގެ ރައްޔިތުންނަށް ނިސްބަތްކޮށް ހުޅަނގުގެ އެ ޚަބަރުތަކުން އިބާރާތް ކުރަނީ 'މަރުވީ' ކަމުގައެވެ. މަރުވީއެއް ނޫނެވެ. މަރާލިއެވެ. ޝަހީދުކޮށްލީއެވެ. ގޭގައި ނިދާފައި ތިއްބާ ބޮންއަޅާ، އިމާރަތް ދަށުގައި ފަސްދާނުލީއެވެ. އޮހޮރެމުންދިޔަ ލޭތައް މަނާކުރުމަށް ހަސްފަތާލަށް ދިއުމުން ހަސްފަތާލަށް ބޮންއަޅައި ޝަހީދުކޮށްލީއެވެ. ޒަޙަމްވެފައިވާ ރައްޔިތުން ހަސްފަތާލަށް ގެންިޔުމަށް ދަތުރު ކުރި އުޅަނދުތަކަށް ގަސްތުގައި ހަމަލާދީ އޭގައި ތިބި މީހުން މި ދުނިޔެއާއި ވުޖޫދުން ފޮހެލީއެވެ. ސީދާ މީހާއަށް އަމާޒުކޮށްފައި ބަޑިޖަހައި މީހާގެ ދުވަސް ދުއްވާލީއެވެ. ވިންދު ޖަހަމުން ދިޔަ ފުރާނައެއްގެ ގައިމަތިން އެ ބަރު، ބިޔަ ބަލްޑޯޒާ ދުއްވާ، މީހާ އެކީ ޗިސްކޮށްލީއެވެ. އެއްވެސް ކުށަކާ ނުލައި ހައްޔަރު ކުރުމަށްފަހު ނުވަތަ ރަހީނު ކުރުމަށްފަހު ލާއިންސާނީ އެތައް އަނިޔާއެއް ކުރަމުންގޮސް ޖަލު ގޮޅީގައި މަރާލީއެެވެ. އަނިޔާވެރިކަމާއި ރަޙުމުކުޑަކަމުން ފުރިފައިވާ މިފަދަ ކޮންމެ މަރާލުމަކަށް 'މަރުވީ' ކަމަށް ބުނެ އެ ޚަބަރުތަކުން އޮށްބައިފިއެވެ. 

ހަމަމިއާއެކު، މިކަން ފެށުނީ އޮކްޓޯބަރ 7 ގައި ކަމަށް ބުނެ މުޅި ހަރުތާލުގަނޑުގެ ފެށުމަކީ އޮކްޓޯބަރ 7ކަމުގައި މީހުންގެ ސިކުނޑިއަށް ވިސްނައިދޭން ފަށައިފިއެވެ. ފެށުނީ އޮކްޓޯބަރ 7ގައެއް ނޫނެވެ. ފެށުނީ 1978 ވަނަ އަހަރުގައެވެ. ފެއްޓީ ހަމާސް ޖަމާޢަތަކުން ނޫނެވެ. ލާއިންސާނީ ޢަމަލުތަކުގެ ފެށުން އައިސްފައިވަނީ އިސްރާއީލުގެ ކޮޅުންނެވެ. ހަމާސް ޖަމާޢަތް ވުޖޫދަށްއައީ އެ ލާއިންސާނީ ޢަމަލުތަކާއި އަނިޔާވެރިކަމުގެ ބަނަ ވިލާގަނޑުތަކުން ފަލަސްތީނު ހިމާޔަތްކޮށް މިނިވަން ކުރުމަށެވެ. އިސްރާއީލުން ފެށި ކަންތައްތަކަށް ޖަވާބުދީ ރައްދުދޭށެވެ. ހަޤީޤީ ސެލްޕް ޑިފެންސްއަކީވެސް އެއީއެވެ. އަމިއްލަ ވަތަނުގެ އަޚުންނާއި އުޚުތުންގެ ލެއިން މަގުތައް ތަތްތެޅެމުންދާއިރު ބަލަހައްޓައިގެން ތިބެންވީ ހެއްޔެވެ؟ އެއީ އިންސާނެއްގެ ލަގޮނޑިއަށް ކެތްވާނޭ މަންޒަރުތަކެއް ނޫނެވެ. ނަމަވެސް ހަމާސް ޖަމާާާޢަތަކީ  ޓެރަރިސްޓު ޖަމާޢަތެއްކަމުގައި ދުނިޔެއަށް ދައްކައިފިއެވެ. ހަޤީޤތުގައި އެއީ މުޖާހިދުންނެވެ. ދީނާއި ވަތަން ޙިމާޔަތްކުރަން މާތް ﷲގެ މަގުގައި ޖިހާދުކުރާ ހިތްވަރުގަދަ ކެރޭ ބަތަލުންނެވެ. އާރުކާޓީންނެވެ. 

ހުޅަނގުގެ ޚަބަރުތަކުން މުޅި ދުނިޔޭގައި އަޅުވާފައިވާ އަނދުނުގެ އަސަރު މި ރާއްޖޭގެ ބައެއް ރައްޔިތުންނަށްވެސް ކޮށްފައިވާކަމީ ހިތި ނަމަވެސް ހަޤީޤަތެވެ. ހަމާސް ޖަމާޢަތް ކުއްވެރިކޮށް އެކަން އެބީދައިން ޤަބޫލުކުރާ މަދު ނަމަވެސް ބަޔަކު ތިބީތީ ހިތާމަކުރަންޖެހެއެވެ. އިސްރާއީލަށް ވިކިފައިވާ ހުޅަނގުގެ މަސްދަރުތަކާއި ޚަބަރުތަކަށް ސަމާލުވާންވީ މިހެންވެއެެވެ. އެކި މަންސަތަކުގައި އެބައި މީހުން ދައްކާ ވާހަކަތަކުގެ ހަޤީޤަތް ބަލަންވީ މިހެންވެއެވެ. ފިކުރީގޮތުން އެވެރިން ކުރާ ހަނގުރާމަ ކާމިޔާބު ވިޔަނުދޭށެވެ. އެވެރިން ބޭނުންކުރާ ލަފްޒުތަކާއި އިބާރާތްތަކަށް ސަމާލުވުމުން ތިމާގެ ސިކުނޑިއާއި ކުޅެ، ތިމާގެ ވިސްނުން ބަދަލު ކުރުމުގެ ބާރު އެމީހުންނަށް އޮންނާނީ ގެއްލިފައެވެ. ސަމާލުވާށެވެ. އެވެރިންގެ ހަނގުރާމައިގެ ޝިކާރައަކަށް ނުވާށެވެ.