ދެއިރު ދެދަޅައަށް ފެންމަތިވަމުން އަންނަ ހާދިސާތަކުގެ މައި މުލަކަށް ވެފައިވަނީ ހަނގާކުރުމޭ ބުނުމަކުން ދޮގަކަށް ނުވާނެއެވެ. ސޯޝަލް މީޑިއާގައި ކެކި އުތުރި އަރަމުންދާ ވީޑިއޯތައް މީހުންގެ ކުރިމައްޗަށް އަންނަންފެށީ ދާދި ފަހުން ކަމުގައިވިޔަސް، ހަނގާއާއި ފުރައްސާރަކުރުން މީގެ ކުރިންވެސް އެތައް ގޮތަކަށް އެތައް ކުދިންނެއް ތަޖުރިބާކޮށްފައިވާނެއެވެ. ހަނގާ ނުވަތަ ބުލީ ކުރެވެނީ ހަމައެކަނި ޖިސްމާނީގޮތުން އަނިޔާކޮށްގެން ނުވަތަ ގެއްލުމެއް ދީގެނެއް ނޫނެވެ. ނުފެންނަ އެތައް ތީރަކާއި ޙަޔާތުގެ ކޮޅުން ފާރު ނުހިކޭނެ ޒަޙަމްތައް ދެވެނީ ގައިގައި އިނގިލިކުރިވެސް ޖައްސާނުލައެވެ. ބުނާ ޖުމްލަތަކުންނާއި އިޙްސާސް ކުރުވާ ގޮތްތަކުގެ ޒަރީޢާއިންނެވެ. ނަފްސާނީގޮތުން އަނދަވަޅުތަކަކަށް ވައްޓާލައިގެންނެވެ.

ހަނގާގެ ސަބަބުން ކުދިންނަށް ނަފްސާނީގޮތުން ކުރާ ނޭދެވޭ އަސަރުތަކުން އެކުދިން މުއްތި ކުރުމަކީ ފަސޭހަކަމެއް ނޫނެވެ. ހަށިގަނޑުން ފެންނަން ހުންނަ ޒަޙަމްތަކުގައި އަޅާނެ ބޭސް ހުރި ކަމުގައިވިޔަސް ކުއްޖާގެ ހިތަށާއި ވުޖޫދަށް އެކުރާ ނަފްސާނީ އަސަރުތަކަކީ ފަރުވާކުރަން ފަސޭހަ ޒަޙަމްތަކެއް ނޫނެވެ. އޭގެ ލައްގަނޑު ކުއްޖާގެ މުޅި އުމުރު ދުވަހު ހުރެއެވެ. ކުއްޖާގެ ހިތް މަރުވާފަދަ ލަފްޒުތައް ބުނުމަކީވެސް ހަނގާއެވެ. އެންމެން ކުރިމަތީ ކުއްޖާ ދަށްކޮށްލާ، ކުއްޖާ ފަޟީހަތް ކުރުމަކީވެސް ހަނގާއެވެ. މީގެ އިތުރުން ކުއްޖާގެ ސިފަޔަށް ފާޑުކިޔާ މަލާމާތްކޮށް، ކުއްޖާގެ ހުރި އުނި ސިފަތައް ކުއްޖާއަށް ތަކުރާރުކޮށް އަޑުއިއްވައި ކުއްޖާ ބާކީ ކުރުމުންވެސް އެ ކުރެވެނީ ހަނގާއެވެ.

އަނގައިން ބުނާ ބަސްތަކުންނާ އިޙްސާސް ކުރުވާ ގޮތްތަކުން ކުރިމަތިވާ ހަނގާގެ ސަބަބުން ކުއްޖާއަށް ކުރާ އަސަރުތައް ފުނެވެ. އަމިއްލަ ނަފްސަށް އޮންނަ އިތުބާރު ގެއްލި އަމިއްލަ ޤާބިލިއްޔަތުކަމާމެދު ޝައްކު އުފެދެއެވެ. ކީއްވެ ހެއްޔެވެ؟ ތަކުރާރުކޮށް ކުއްޖާގެ ޢައިބުތައް ކުއްްޖާ ކައިރީގައި ކިޔާ، ކުއްޖާއަށް މަލާމާތް ކުރާތިއެވެ. އެވެނި މިވެނިކަމެއް ނުވާނޭ ބުނެ ހަޖޫ ޖަހާތީއެވެ. އެންމެން ކުރިމަތީ ކުއްޖާ ފަޟީހަތްކޮށް ލަދުގަންނަވާތީއެވެ. އެ ހުރިހާ ކަމެއްގެ ސަބަބުން ކުއްޖާގެ 'ސެލްފް ކޮންފިޑެންސް' ގެއްލި، ކަންކަމާ ކުރިމަތިލާން ޖެހިލުންވެއެވެ. އިމްތިޙާނުތަކާއި އެކިއެކި މުބާރާތްތަކުގައި ބައިވެރިވެ އަމިއްލަ ހުނަރު ސާބިތުކުރަން ފަސްޖެހެވެނީ ކުއްޖާގެ ޤާބިލިއްޔަތާމެދު ޝައްކު އުފެދޭ އެތައް ލަފްޒެއް އަޑުއަހަން ޖެހުނީތީއެވެ. ހަމަމިއާއެކު، އަމިއްލަ ނަފްސުދެކެ ފޫހިވުމަކީވެސް ހަނގާގެ ސަބަބުން ނުކުންނަ ހިތި ނަތީޖާއެކެވެ. ކުއްޖާގެ ސިފަޔަށް ބަދުބަސް ބުނެ ފާޑު ކިޔުމުގެ ސަބަބުން އަމިއްލަ ނަފްސުދެކެ ލޯބިވާން ދަސްވުމުގެ ކުރިން އަމިއްލަ ނަފްސަށް ނަފްރަތުކުރަން އޮންނަނީ ހޭނިފައެވެ. ކިތައްމެ ފުރިހަމައަށް ކަންކަން ކުރި ކަމުގައިވިޔަސް، ހަމައެކަނި ރަނގަޅަށް ނުކުރެވޭ ކަންތައް ފާހަގަކޮށް، އެކަމަށް އެއްޗެހި ބުނާތީއެވެ. ތިމާ މީހާއަށް ކިތައްމެ ބޮޑު ކާމިޔާބެއް ލިބުނަސް އެކަމުގެ 'ކްރެޑިޓް' ހައްޤުނޫން ކަމަށް ޤަބޫލުކުރެވެއެވެ. މީހަކު ތަޢުރީފެއް ކުރުމުން އެކަން ބަލައިގަންނަން ވަރަށް އުނދަގޫވެއެވެ. ވިސްނިފައި އޮންނަނީ އެއީ އެ މީހަކު ޖެއްސުމަށް ނުވަތަ ވައްބަހުން ބުނާ އެއްޗެއްކަމުގައެވެ. 

މީހުންގެ ތެރެއަށް ނުކުމެ އުޅުމަށް ފޫހިވުމަކީ ހަނގާގެ ސަބަބުން ފެންމަތިވާ ގެއްލުމެކެވެ. ގިނަ ވަގުތު އެކަނި ހޭދަކުރަން ބޭނުންވެ، މީހާގެ އަމިއްލަ އުފަލާއި ހިތްހަމަޖެހުމަކީ އެކަހެރިވުންކަމުގައި ޤަބޫލުކުރެވެއެވެ. އެއީ މީހުންގެ ތެރެއިން ދެކެން ޖެހުނު މަންޒަރުތަކާއި އަޑުއަހަން ޖެހުނު ޖުމްލަތައް އިތުރަށް ތަޖްރިބާކުރަން ބޭނުންނުވާތީއެވެ. މީހުންގެ ތެރޭގައި ބާކީ ކޮށްލާ، ތިމާއަކީ އެއްވެސް އަގެއްނެތް މީހެއްކަން އިޙްސާސްކުރުވުމުން މީހުންގެ ތެރެއަށް ނުކުމެ އުޅެން ބޭނުންވާނީ ކާކު ހެއްޔެވެ؟ ހިތުގައި ބިންވަޅު ނެގިފައި ހުންނާނީ މީހުން ތިމާދެކެ ރުޅި އަންނަކަމެވެ. ނަފްރަތުކުރާކަމެވެ. ތިމާއާާ ހެދި އުނދަގޫވާކަމެވެ. ތިމާގެ ވަށައިގެން އެތައް ބަޔަކު ތިބިކަމުގައިވިޔަސް އިޙްސާސްވާނީ މީހާ ބާކީވެ ހުންނަކަމެއެވެ. އެކަނިވެރިކަމެއެވެ. އެއީ އެއް ޒަމާނެއްގައި ބަޔަކު ކުރުވި އިޙްސާސްތަކެއްގެ ލޭ ނުހިކި ހުރި ފާރުގަނޑެވެ.

ހަނގާގެ ސަބަބުން ލިބޭ ނަފްސާނީ ގެއްލުންތަކަކީ ހިތުން ފޮހެލަން އުނދަގޫ ޒަޙަމްތަކެކެވެ. އަމިއްލަ ނަފްސަށް ކުރާ އިތުބާރު ގެއްލި އަމިއްލަ ޤާބިލިއްޔަތާމެދު ޝައްކު އުފެދެނީއެވެ. ހަމަމިއާއެކު، އަމިއްލަ ނަފްސުދެކެ ފޫހިވެ، ތިމާއަކީ އެއްވެސް މީހެއް ނޫންކަމުގައި ހިތާއި ސިކުނޑިން ޤަބޫލުކުރެވެނީއެވެ. އަދި މީހުންތެރެއަށް ނުކުމެ އުޅުމަށް ފޫހިވެ، އަމިއްލަ ނަފްސު އެކަހެރި ކުރެވެނީއެވެ. މިއީ ހަނގާކުރުން ނިމޭ ހިސާބުން ނިމޭ އަސަރުތަކެއް ނޫނެވެ. މުޅި އުމުރުދުވަހު އޭގެ ތަކްލީފް ކުއްޖާއަށް އުފުލަން ޖެހޭ އަޑިގުޑަންތަކެކެވެ. މަޢާފްކުރިޔަސް ހަނދާނުން ފޮހެލުން ނާދިރުކަމެކެވެ. ހަނގާކުރުމުން ދުރުހެލިވާންވީ މިފަދަ އެތައް ސަބަބުތަކަށްޓަކައެވެ. ނަފްސާނީގޮތުން ކުއްޖާ ވެއްޓޭ އަނދަވަޅު ކޮންނަ މީހެއްކަމުގައި ތިބާ ނުވާށެވެ.