ދިވެހިންނަކީ ޒަމާނުއްސުރެ އަޚުންތަކެއް ގޮތުގައި އުޅުނު އަޚުވަންތަ ބައެކެވެ. އެއްބަނޑުއެއްބަފާ ބައެއްގެ ގޮތުގައި އުޅުނު ބައެކެވެ. ނަމަވެސް އެ ޒަމާން ބަދަލުވެ ހިނގަށްޖެއެވެ. އަޚުވަންތަކަމާއި އުޚުއްވަތްތެރިކަން ގެއްލިގެން ގޮސް، ރުޅިވެރިކަމާއި ނަފުރަތު އާއްމު ވެއްޖެއެވެ. ސިޔާސީ ހިޔާލު ތަފާތުވުންތަކާއި، ބޮޑާކަމާއި ކިބުރުވެރިކަމާއި ހަސަދަވެރިކަމުގެ އިތުރުން ނޭދެވޭ ގޮތުގައި ޓެކްނޮލޮޖީ ބޭނުންކުރުން ފަދަ ސަބަބުތަކުގެ ނަތީޖާއެއްގެ ގޮތުންނެވެ. 

ސިޔާސީ ޙިޔާލު ތަފާތުވުންތަކުގެ ސަބަބުން ގުޅުންތައް ހީނަރުވަމުން އަންނަކަމީ ސާފުކޮށް ފެންނަން އޮތް މަންޒަރެކެވެ. އެއްބަނޑުއެއްބަފާ މީހުންވެސް އެކަކު އަނެކަކާ ގުޅުން ކަނޑާ، އަނގައިން ނުބުނެ އުޅޭކަމީ އަދުގެ ހިތި ހަޤީޤަތެވެ. ތާއީދުކުރާ ސިޔާސީ ޕާޓީތައް ތަފާތުވީމައެވެ. ވިސްނުމާއި ޚިޔާލު ތަފާތުވީމައެވެ. އެކަކު އަނެކެއްގެ ޚިޔާލަށް އިޙްތިރާމް ކުރުމުގެ ސިފަ ނެތީމައެވެ. ރަހިމުގެ ގުޅުމަށް ވުރެ މުހިންމުވެފައި އޮންނަނީ ސިޔާސީ ޕާޓީތަކާއި، އެ ޕާޓީތަކުގެ ފަލްސަފާތަކެވެ. އާއިލީ ގުޅުމަށްވުރެ އިސްކުރަނީ ސިޔާސީ ގުޅުންތަކެވެ. ހަމަމިއާއެކު، ދެ ޕާޓީއެއްގެ މީހުން އެއްބަޔަކު އަނެއްބަޔަކާ ތަޅާފޮޅާ، ހަމަނުޖެހުންތައް ހިންގަމުން ގޮސް، ޕާޓީ ޖަގަހަތަކަށް ގެއްލުންދިނުން ފަދަ ކަންކަން ކުރުމުން އިޖުތިމާޢީ ގުޅުންތައް އިތުރަށް ހީނަރުވެ އަނަރޫފުވަނީއެވެ. އެއްތަށިން ކައި އުޅުނު ޒަމާން ނެތިގޮސް، ސިޔާސީ އަވާގައި ޖެހި، ގުޅުންތައްވެސް މިވަނީ ކުލަކުލަޔަށް ބަދަލުވެފައެވެ. މީގެ އިތުރުން ބޮޑާކަމާއި، ކިބުރުވެރިކަމާއި ހަސަދަވެރިކަމުގެ ސަބަބުންވެސް އިޖުތިމާޢީ ގުޅުންތަކަށް ކުރަނީ ނޭދެވޭ އަސަރެވެ. ލިބިފައިވާ އާރާއި ބާރާމެދު ފަޚުރުވެރިވެ، އަނެކާއަކީ ދަށް މީހެއްކަމަށް ދެކި، މީހުންގެ ފެންވަރު ގިންތި ކުރުމުން ގެއްލިގެން ދަނީ އަޚުވަންތަކަމެވެ. އުފަންވަނީ ރުޅިވެރިކަމާ ނަފުރަތެވެ. ހަމައެހެންމެ، އެހެން މީހުންނަށް ލިބޭ ނިޢުމަތްތަކާމެދު ހަސަދަވެރިވުމުގެ ސަބަބުން، މީހަކާ އަގައިން ބުނެ އޯގާތެރި ލަފުޒެއް ބަދަލުކުރުންވެސް ވަނީ ބޮޑުކަމަކަށެވެ. ހަސަދައިގެ ސަބަބުން މީހުންގެ ދިރިއުޅުން ހަލާކުކޮށްލާ ހިސާބަށް ކަންތައްތައް ދާ ފަހަރުވެސް އެބަ އާދެއެވެ. މި ކޮންމެ ކަމަކުންވެސް ނެތެމުންދަނީ އިޖުތިމާޢީ އެއްބައިވަންތަކަމާއި އަމާންކަމެވެ.

ނޭދެވޭ ގޮތުގައި ޓެކްނޮލޮޖީ ބޭނުންކުރުމުގެ ސަބަބުންވެސް އިޖުތިމާޢީ ގުޅުންތައް ހީނަރުވަމުންދެއެވެ. މީހުންގެ ޕޯސްޓުތަކުގައި ނުރުހުމުގެ ކޮމެންޓުތައް ކުރުމާއި، މީހުންގެ އަބުރަށް އަރައިގަތުމާއެކު، ކޮމެންޓު ސެކްޝަންގައި ޒުވާބުކޮށް ކަންތައް ކުރުމުގެ ތެރެއިން އެތައް ބައެއްގެ ގުޅުންތައް ނެތިގެންދެއެވެ. މީގެ އިތުރުން، ކުޑަކުދިންގެ އަތަށް ފޯނާއި ޓެބްލެޓް ފަދަ، ޓެކްނޮލޮޖީގެ ވަސީލަތްތައް ދިނުމުގެ ސަބަބުން އެ ތަކެއްޗަށް އެކުދިން ދެވިހިފައެވެ. ގިނަ ވަގުތުތައް ހޭދަކުރެވެނީ އެތަކެތި ބޭނުން ކުރުމުގައެވެ. ނަތީޖާއެއްގެ ގޮތުން، މީހުން ތެރެއަށް ނުކުމެ އުޅެ، މީހުންނާ ގުޅުން ބަދަހި ކުރާކަށް އެކުދިންނަކަށް ނޭނގެއެވެ. އިޖުތިމާޢީ ގުޅުންތައް ޤާއިމުކުރާކަށް އެކުދިންނަކަށް ދަހެއް ނުވެއެވެ. އާޚިރުގައި، އިތުރަށް ހީނަރުވެގެން ދަނީ މުޖުތަމަޢުގައި އޮންނަން ޖެހޭ ގުޅުންތަކެވެ. ނަހަމަ ގޮތުގައި ޓެކްނޮލޮޖީގެ ވަސީލަތްތައް ބޭނުން ކުރުމުގެ ސަބަބުންނެވެ. 

ނެތެމުން މިދާ އިޖުތިމާޢީ ގުޅުންތައް އަލުން އިޔާދަކުރަން ޖެހެއެވެ. އެއްބައިވަންތަކަމާއި އަޚުވަންތަކަން ދިރުވަން ޖެހެއެވެ. ސިޔާސީ ޚިޔާލު ތަފާތުވުންތަކާއި، އިޖުތިމާޢީ ގުޅުންތައް ވަކި ކަމެއް ގޮތުގައި ބާއްވައިގެންނެވެ. ބޮޑާކަމާއި، ކިބުރުވެރިކަމުގެ އިތުރުން ހަސަދަވެރިކަމުން ދުރުވެގެންނެވެ. ނަހަމަ ގޮތުގައި ޓެކްނޮލޮޖީގެ ބޭނުންކުރުން ހުއްޓާލައިގެންނެވެ. މި މައްސަލަތަކަށް އެދެވޭ ޙައްލުތައް ގެނައުމުން ހީނަރުވެފައިވާ އިޖުތިމާޢީ ގުޅުންތަކަށް އައު ދިރުމެއް ލިބޭނެއެވެ. ފެންފަށަލައިގައިވާ އުޚުއްވަތްތެރިކަން ހަމަމަގަށް އަޅުވަން ޖެހެއެވެ. ނޭވާހޮޅިއަށް އެޅިފައިވާ އަޚުވަންތަކަން، އަލުން އަނބުރާ ގެންނަން ޖެހެއެވެ. އެކަން ކުރެވޭނީ ފަރުދީ ގޮތުންނާއި އިޖުތިމާޢީ ފެންވަރުގައި މަސައްކަތް ކޮށްގެންނެވެ.