އިންސާނާއަކީ އިޙްސާސްތަކާއި ޖަޒުބާތުތަކުގެ މައްޗަށް އުފެދިފައިވާ މަޚްލޫޤެކެވެ. މި އިޙްސާސްތަކުގެ ތެރެއިން އެންމެ ވަރުގަދަ އަދި ނުރައްކާތެރި އެއް އިޙްސާސަކީ ރުޅިވެރިކަމެވެ. ރުޅިވެރިކަމަކީ ނުވަތަ ރުޅި އަކީ އިންސާނާގެ ފިޠުރަތުގައި ވާ ކަމެކެވެ. އެހެންކަމުން، ކޮންމެ އިންސާނަކަށްވެސް ރުޅި އަންނާނެއެވެ. ނަމަވެސް، މި ރުޅި ކޮންޓްރޯލް ކުރުމަކީ ވަރަށް މުހިންމު ކަމެކެވެ.

ރުޅި އައުމަކީ އާންމު ކަމެއް ނަމަވެސް، އެ ރުޅި ކޮންޓްރޯލް ނުކުރެވުމުގެ ސަބަބުން ވަރަށް ގިނަ މައްސަލަތަކާ ކުރިމަތިލާން ޖެހެއެވެ. ރުޅި ކޮންޓްރޯލް ނުކުރެވޭ މީހުން އެ މީހުންގެ އަމިއްލަ ނަފްސަށާއި، އާއިލާއަށާއި، މުޖުތަމަޢުއަށް ގެއްލުން ދެއެވެ. މިފަދަ މީހުން އެހެން މީހުންނާ މެދު އަނިޔާވެރިވެ، ހަޑިހުތުރު ބަހުން މުޢާމަލާތްކޮށް، އަދި ބައެއް ފަހަރު ޤާނޫނާ ޚިލާފު ޢަމަލުތައް ހިންގައެވެ. މިއީ އިންސާނިއްޔަތުކަމާ ދުރު، "ޖަނަވާރުންގެ" ސިފަތަކެވެ.

އިސްލާމްދީނުގައި ރުޅި ކޮންޓްރޯލް ކުރުމަށް ވަރަށް ބޮޑު އަހައްމިއްޔަތުކަމެއް ދީފައިވެއެވެ. އިސްލާމްދީނުގައި ވަރުގަދަ މީހަކީ (ގަދަފަދަ) މީހުން ބަލިކުރާ މީހާއެއް ނޫނެވެ. އެހެނެއްކަމަކު، މި ދީނުގައި ވަރުގަދަ މީހަކީ ރުޅި އައިސްގެން އުޅޭއިރު، އޭނާގެ ނަފްސު ކޮންޓްރޯލް ކުރާ މީހާއެވެ. މި ކަމުން އެނގެނީ ރުޅި ކޮންޓްރޯލް ކުރުމަކީ ވަރުގަދަކަމުގެ ސިފައެއްކަމެވެ. އަދި މިއީ އިންސާނާގެ ޖާހާ، ހައިބަތު ދައްކުވައިދޭ ސިފައެއްވެސް މެއެވެ.

ރުޅި ކޮންޓްރޯލް ކުރުމަށްޓަކައި އަޅުގަނޑުމެންނަށް ކުރެވިދާނެ ބައެއް ކަންތައްތައް ވެއެވެ. އޭގެ ތެރޭގައި:

. ރުޅި އަންނަ ވަގުތު އަޢޫޒު ކިޔުން

. ކޮޅަށް ހުރިނަމަ އިށީނދުން، އިށީނދެ އިންނަމަ އޮށޯތުން

. ވުޟޫކުރުން ނުވަތަ ފެންވެރުން

. ދެ ރަކުޢަތް ނަމާދެއް ކުރުން

. ރުޅި އަންނަ ވަގުތު އެ ތަނުން ދުރަށް ދިއުން

. ޢާއިލާއާއި ރަޙްމަތްތެރިންގެ އެހީތެރިކަން ހޯދުން

ޚުލާޞާކޮށް ބުނާނަމަ، ރުޅި އައުމަކީ އިންސާނާގެ ޠަބީއީ ސިފައެކެވެ. ނަމަވެސް، އެ ރުޅި ކޮންޓްރޯލް ނުކުރެވޭނަމަ، އިންސާނާ ޖަނަވާރެއްގެ ދަރަޖައަށް ވެއްޓިދާނެއެވެ. އެހެންކަމުން، އަޅުގަނޑުމެން އެންމެން ވެސް މަސައްކަތް ކުރަންވާނީ އަޅުގަނޑުމެންގެ ރުޅި ކޮންޓްރޯލް ކުރުމަށެވެ. އޭރުން އަޅުގަނޑުމެންނަށް ތިމާގެ އަމިއްލަ ނަފްސަށާއި، އާއިލާއަށާއި، މުޖުތަމަޢުއަށް ފައިދާހުރި ބަޔަކަށް ވުމުގެ ފުރުޞަތު ލިބޭނެއެވެ.