ފޫހިވީމާ ކުރާނެކަމެއް ނޭނގިގެން ބައެއް މީހުން އުޅެއެވެ. އެވަގުތުތަކުގައި ކުރާނެކަމެއް އިޚްތިޔާރު ނުކުރެވިގެން އުޅޭތަން ފެނެއެެވެ. އެކިކަހަލަ ކުޅިވަރުތައް ކުޅުމާއި، މޫދަށް ދިއުމާއި، އަދަބިއްޔާތުގެ ލިޔުންތައް ލިޔުމުގެ އިތުރުން ވާހަކަތައް ކިޔުމަކީ ހުސްވަގުތުތަކުގައި އެކި މީހުންކުރާ އެކި ކަންތައްތަކެވެ. އެގޮތުން ހުސް ވަގުތުތަކުގައި ކުރަން ކަމުދާ އެއްކަމަކީ މަސްބާނަން ދިއުމެވެ. ސަބަބުތަކެއް ނެތިއެއް ނޫނެވެ.  

މަސްބާނަން ދެވޭނެ އެކި ގޮތްތައް ވެސް އެބަހުއްޓެވެ. ދޯނީގައި ކަނޑު މައްޗަށް ނުކުމެގެން މަސްބާނަން ދިއުމަށް އެއްބަޔަކު އިޚްތިޔާރުކުރާއިރު، އަނެއްބަޔަކަށް ކަމުދަނީ ގާގަނޑުމަތީ ނުވަތަ މޫދުގައި ތިބެގެން މަސްބޭނުމެވެ. ރީލު ދޮށިތައް އެއްބަޔަކު ބޭނުންކުރާއިރު އަނެއް ބަޔަކު ބޭނުންކުރަނީ ހުސްފުޅިތަކުގައި ކަންވާރުލައިގެންނެވެ. އެމީހަކަށް ކަމުދާ، އެމީހަކު ބޭނުން ގޮތަކަށެވެ. ހުސްވަގުތުގައި ކުރުން 'ސަޅި'ކަމެއް ގޮތުގައި މަސްބާނަންދިއުން ވެފައިވަނީ އެތަކެއް ސަބަބުތަކާއި ލައިގެންނެވެ. އެންމެ ފުރަތަމަ ސަބަބަކީ މަސްބާނަން ދިއުމުގެ ސަބަބުން 'ސްޓްރެސް' ފިލާ، ހިތްހަމަޖެހުމާއި ހަމަޖެހުން ލިބުމެވެ. މަސްބާނަން ގޮސް، ގުދުރަތުގެ ފުރިހަމަ ނިޒާމު ފާޅުވާ މާހައުލުގައި ވަގުތު ހޭދަކުރެވުމުގެ ސަބަބުންނެވެ. ސާފު ނަލަ މޫދާއި ރާޅުތަކުގެ ތެރޭގައި، ޖެހޭ ފިނި ވައިރޯޅިތަކުގެ އިޙުސާސުންނެވެ. ގިނަ މީހުން އެކަން ސިފަކުރަނީ 'ތެރަޕީ'އެއް ގޮތުގައެވެ. ދިރިއުޅުމުގައި އާއްމުކޮށް ނުފެންނަ ތާޒާ މާހައުލެއް ފެނުމުން އެ ލިބޭ ހިތްހަމަޖެހުމެވެ. މޫދަށް އެރިގެން މަސްބާނާ ފަހަރުތަކުގައި މޫދުގައި އެ ހޭދަވާ ވަގުތުތަކާއި، ރާޅުތަކުގެ ތެރޭގައި ކުރެވޭ މަޖާ ތަޖުރިބާގެ ސަބަބުން ސިކުނޑިއަށް އަރާމާއި ހަމަޖެހުން ލިބެއެވެ. މީގެ އިތުރުން، ޞިއްޙަތަށް އެދެވޭ ފައިދާތައް ލިބުމަކީވެސް މަސްބާނަން ދިއުން ރަނގަޅު ކަމަކަށްވާ ސަބަބެކެވެ. ހެލިފެލިވެ އުޅުން މަދު މީހުންނަށްވެސް މަސްބާނަންގޮސް އުޅޭއިރު ކަސްރަތު ލިބެއެވެ. ހިނގާބިނގާވެ އުޅުމުންނާއި، މަސްބާނަން ހަރަކާތްތެރިވާ ވަގުތުތަކުގައި ހަށިގަނޑަށް ކަސްރަތު ލިބެއެވެ. 

މަސްބާނަން ދިއުމުން އިޖުތިމާޢީ ގުޅުންތައް ވެސް ބަދަހިވެއެވެެ. އެ މާހައުލުން މީހުންނާ ދިމާވުމުން ވާހަކަދައްކާ، އަމިއްލަ ތަޖުރިބާ ހިއްސާކޮށް، ސަލާންގަލާން ކުރުމުން ގުޅުންތައް ބަދަހިވެއެވެ. އާއިލާ އެންމެން އެކީ، މަސްދަތުރުތައް ގޮސް އުޅުމުން އާއިލީ ގުޅުންތައްވެސް އިތުރަށް ބަދަހިވެ، އަލުން އިޔާދަވާނެއެވެ. ހަމަމިއާއެކު، އަމިއްލަ ނަފުސަށް 'ޗެލެންޖިންގ' ކަމަކަށްވާތީ އެފަދަ ވާދަވެރިކަމެއްގައި ބައިވެރިވުމަށްވެސް މީހުން މަސްބާނަން ދެއެވެ. އަމިއްލަ ނަފުސަށް ގޮންޖެހުމަށެވެ. އަމިއްލަ ނަފުސަށް 'ޗެލެންޖް' ކުރުމަށެވެ. އެއީ އަމިއްލަ ނަފުސުގެ ޤާބިލިއްޔަތާއި ހުނަރު އިތުރުކުރުމަށެވެ. މަހެއް ބޭނުމުން އެކަމުގެ ހިތްހަމަޖެހުމާއި އުފާ ލިބެއެވެ. އަމިއްލަ ނަފުސަށް ކުރި ޗެލެންޖުން އަރައިގަތުމަށް މަސައްކަތް ކުރެވުނީމައެވެ. މަހެއް ނުބޭނި ކިތަންމެ ވަގުތެއް ހުންނަން ޖެހުނަސް، ކެތްތެރިކަމާއެކު މަސް ބޭނެން ދެން އިންތިޒާރުކޮށް، މަސްބޭނުމަށް މޮޅެތި އުކުޅުތައް ދަސްކުރުމުން އަމިއްލަ ނަފުސާމެދު ފަޚުރުވެރިވެ އަމިއްލަ ނަފުސާމެދު ހިތްހަމަޖެހެވެއެވެ. މަސްބާނަން ދިއުމަކީ މިފަދަ އެތައް ކަމެއް ތަޖުރިބާ ކޮށްލެވޭ ކަމެކެވެ. 

ރަށުގެ މޫދަށް ނުވަތަ ގާގަނޑުތައް މައްޗަށް ފަރުމަސް ބާނަން ދިއުންކަމުގައި ވިޔަސް، ލައްޓި ފަދަ ކަނޑުމަސް ބޭނުމަށް ކަނޑުމައްޗަށް ނުކުތުން ކަމުގައިވިޔަސްހެވެ. އެއީ ހިތަށް ހަމަޖެހުމާއި އުފާވެރިކަން ގެނުވާ ކަމެކެވެ. ގުދުރަތީ ނިޒާމުގެ ޗާލުކަން ހާމަވާ މާހައުލެއްގެ ފުރިހަމަކަން ތަސައްވަރު ކޮށްލެވޭ ތަޖުރިބާއެކެވެ. ހުސްވަގުތުތަކުގައި ނުވަތަ ފޫހިވާ ވަގުތުތަކުގައިވެސް މަސްބާނަން ދިއުމަކީ ހަމަ އެއްވަނައިގެ ކަމެކެވެ.