މުޅި ދުނިޔޭގެ ހުރިހާ ހިސާބެއްގެ ހުރިހާ ނަޞްލަކަށް ބެލި ނަމަވެސް، ހަންގަނޑު އެންމެ ރީތިކަމަށް ބެލެވެނީ ޖުމްލަގޮތެއްގައި އޭޝިޔާގެ ގައުމުތަކުގެ މީހުންގެއެވެ. އޭގެ ތެރެއިން، އޮމާން ހަންގަނޑަކާއި އެކު ޒުވާންކަންމަތީގައި ގިނަ ދުވަހު ހުރުމުގެ އެންމެ ފުރިހަމަ މިސާލު ދައްކާފައިވަނީ ކޮރެޔާގެ މީހުންކަން މިއީ ފެންނަން އޮތް ހަގީގަތެކެވެ. މީހެއްގެ ރީތިކަމުގައި އެމީހާގެ ޖީން ވަރަށް މުހިންމު ދައުރެއް އަދާކުރެއެވެ. ނަމަވެސް ވައްޓަފާޅިއަކީވެސް ހަމަ އެހާމެ މުހިންމު ކަމެކެވެ. ހަންގަނޑަށް އަޅާލާ ފަރުވާތެރި ވުމުގައި ކޮރެޔާ މީހުން، ޚާއްސަކޮށް އަންހެނުން ބޭނުންކުރާ އުކުޅުތަކަށް މިއަދު ބަލާލާނަމެވެ.  

  1. ހަނޑޫ މާސްކް

ކޮރެޔާގެ އަންހެނުންގެ ތެރެއިން މަތީފަންތީގެ އަންހެނުން ފާހަގަ ކުރެވެނީ ހަމުގެ ކުލަ އަލި ބައެއްގެ ގޮތުގައެވެ. ދަށުފަންތީގެ މީހުންނަކީ ގަދަ އަވީގައި ބުރަމަސައްކަތްކުރަން އުޅޭ ބައެކެވެ. އެމީހުންގެ ހަމުގެ ކުލަ އަލިކޮށް އޮމާންކުރުމަށްޓަކައި ކުރާ އެންމެ މުހިންމު ކަމަކީ ހިމުންކޮށް މުގުރާފައިވާ ހަނޑުލާއި ތެޔޮ އެއްކޮށްގެން ގައިގައި އުނގުޅަނީއެވެ. މިއީ ހަމަ އެކަނި މޫނަށް ޚާއްސަ މާސްކެއް ނޫނެވެ. މުޅި ހަށިގަނޑުގައިވެސް މި އުނގުޅުމަކީ ކޮރެޔާގެ މީހުން ވަރަށް އާންމުކޮށް ކުރާ ކަމެކެވެ.

  1. މޫނުގެ ކަސްރަތު

މޫނުގައި އުފެދޭ ކުދި ރޫތައް ފިލުވާލާ، މޫނުގެ ލޭގެ ހިނގުން ރަގަޅުކޮށް ހަމުގެ ކުލަ އަލިކުރުމަށް ފަސޭހަކޮށްދިނުމަށް މޫނުގެ ކަސްރަތަކީ ވަރަށް މުހިންމު ކަމެކެވެ. ކޮރެޔާ މީހުން މިކަން ކުރާ ގޮތަކީ، އަނގަ އެންމެ ފުޅާ ކުރެވޭ ވަރަކަށް ފުޅާ ކޮށްގެން، އިނގިރޭސި އަކުރުގެ ވަވްލްސް ތައް އަޑުހަރުކޮށް ކިޔަނީ އެވެ. 10 ވަރަށް މިނިޓެއް ކުރެވޭ މި ކަސްރަތު ދުވާލަކު 3 ފަހަރު ކުރެއެވެ.

  1. މޭކަޕް ސާމާނު ބޭނުންކުރުމުގެ ކުރިން ފިނިކުރުން

ހަމުގައި ރޫޖެހުން ދުރުކޮށް ހަންގަނޑު ފިނިކުރުމަށް، ހަމުގައި ބޭނުންކުރާ މާސްކް އަދި ކްރީމް ފަދަ ތަކެތި  ބޭނުން ކުރުމުގެ ކުރިން ފްރިޖަށްލައިގެން ފިނިކުރެއެވެ. މި ފަދަ ސާމާނު ލުމަށް ޚާއްސަކޮށް ކުދި ފްރިޖްވެސް ހަދާފައި ހުރެއެވެ.

  1. ހަނޑޫ ކެއްކި ފެނުން މޫނުދޮވުން

ބަތްކައްކާ ފެންގަނޑު، ހަނޑޫ މަޑުވުމުން އުކާލުމުގެ ބަދަލުގައި ކޮރެޔާ މީހުން ބޭނުން ކުރަނީ މޫނު ދޮވުމަށެވެ. މިއީ ހަންގަނޑު ސާފުކޮށް، ސޯލާ ރޭޑިއޭޝަނުން ލިބޭ ގެއްލުން ކުޑަކުރުމަށް އެހީތެރިވެދޭ އެއްޗެއް ކަމަށް ވެއެވެ.

  1. ފިނިހަކައިގެ ލޮނދި

ވަރަށް ގިނަ ބަޔަކަށް ފިނިހަކައަކީ ވަރަށް ފަކުރު އެއްޗެކެވެ. ނަމަވެސް ކޮރެޔާގެ އަންހެނުންގެ ހަންގަނޑު ރީތިކުރުމަށް ފިނިހަކައިގެ ލޮނދި ހިމަނައިގެން ތައްޔާރުކޮށްފައިވާ ބާވަތްތައް ބޭނުން ކުރެއެވެ. ފިނިހަކަ ބޭނުންކުރާ ސްޕާތަކަކީ ވެސް އެހާމެ މަޤްބޫލު ތަންތަނެވެ. ފިނިހަކަ ލޮންޖަކީ ހަމުގެ ކުލަ އަލިކޮށް، ވާންކޮށް ގިނަ ދުވަހު ބަހައްޓާ، ހަމުގައި ހުންނަ ލަށްތައް ފިލުވާ ލުމަށް ބޭނުން ކުރެވޭ އެއްޗެކެވެ.

  1. ސަން ސްކްރީން

ކޮރެޔާ އަންހެނުންގެ ދަބަހުން ފެންނާނެ އެންމެ އާންމު އެކައްޗަކީ ސަން ސްކްރީން ލޯޝަން ނުވަތަ ސްޕްރޭއެވެ. މިއީ ކޮރެޔާ އަންހެނުންގެ އުމުރުގެ ވަރަށް ޅަ އިރުން ފެށިގެން ހަރުލައްވާފައި ހުންނަ އާދައެކެވެ. އިރުގެ އަތްވަށް ނިކުންނަ ނަމަ ކޮންމެހެންވެސް ސަންސްކްރީން ބޭނުން ކުރުމަކީ މުހިންމު ކަމެއް ކަމަށް މި މީހުން ދެކެއެވެ.

  1. މޫނު ދޮވުމަށް 424 ނިޒާމް

ކޮރެޔާ އަންހެނުންގެ މޫނު ދޮވުމަކީވެސް ވަރަށް ގިނަ ވަގުތު ހޭދަކޮށް ވަރަށް ތަރުތީބަކުން ކުރާ ކަމެކެވެ. މިމީހުންގެ ރީތިކަމުގެ އަސްލު ސިއްރަކީ މިއީ ކަމުގައިވެސް ބުނެވެއެވެ. މޫނު ދޮވުމަށް ހޭދަކުރާ 10 މިނިޓް ގެ ތެރެއިން ފުރަތަމަ 4 މިނެޓަކީ  މޫނުގައި ކުރިން ހުރި ހަޑިއާއި ތެޔޮތައް ފިލުވާލުމަށް ދޮވެވޭ 4 މިނިޓެވެ. އޭގެ ފަހުން ފޯމް ބޭނުންކޮށްގެން 2 މިނިޓްވަންދެން މޫނު ދޮވެއެވެ. އެންމެ ފަހު 4 މިނެޓަކީ އެއްފަހަރު ފިނިފެނުން އަނެއް ފަހަރު ތާފަނާ ފެނުން މޫނު ދޮވުމަށް ހޭދަކުރާ 4 މިނެޓެވެ. މިހެން ފިނިފެނާއި ތާފަނާ ފެނުން މޫނާއި ކަރާއި ކޮނޑު ހިމެނޭހެން ދޮވުމުން މިހިސާބުގެ ހިމަ ނާރުތަކުގެ ލޭގެ ހިނގުން ހަމައަކަށް އެޅި، ހަންގަނޑު ޒުވާންކަންމަތީގައި ބެހެއްޓުމަށް އެހީތެރިވެދޭނެއެވެ.