އަލުވިން ލިބޭ ތަފާތު ފައިދާތަކުގެ ތެރޭގައި މޫނުގައި ހުންނަ ލަކުނު ފިލުވާ، ކުލަ އަނދިރިކޮށް ހުންނަ ބައެއް ތަންތަނުގެ ކުލަ އެއްވަރުކޮށް، ހަލާކުވެގެން ދުޅަވާ ދުޅަ ތިރިކޮށް، ފުއްޕާފައި ހުންނަ ލޮލަށް ފަރުވާ ދީ، ދުވަސް ވުމުގެ ސަބަބަބުން މޫނުގައި އުފެދޭ ކުދި ރޫ ފޮރުވާލަދީ ތިމާވެށިން ލިބޭ ގެއްލުން ފިލުވާދިނުމަށް އެހީތެރިވެދެއެވެ. އަލުވި އަކީ ވަރަށް ފަސޭހައިން ހަމަ ކޮންމެ ގެއެއްގެ ބަދިގެއިން ވެސް ލިބެން ހުންނަ އެއްޗެކެވެ. އަގެއް ވެސް ބޮޑެއް ނޫނެވެ. އެހެންކަމުން މިއަދު މި ގެނެސްދެނީ އަލުވި ބޭނުންކޮށްގެން، ލަކުނު ފިިލުވާލާ އަދި ހަންގަނޑު ސާފުކޮށްލުމަށް އެޅިދާނެ ބައެއް މާސްކްތަކަށެވެ.

  1. ހަމުގެ ކުލަ އަލިކޮށްލުމަށް

3 ސަމުސާ އަލުވި ދިޔަ، 2 ސަމުސާ މާމުއިގެ ތެރޭގައި ރަގަޅަށް އެއްކޮށްލާށެވެ. ކަރާއި މޫނުގައި އުނގުޅުމަށް ފަހު 15 މިނިޓް ބަހައްޓާފައި ދޮވެލާށެވެ. އެންމެ ރަގަޅު ނަތީޖާ ހޯދުމަށް ކޮންމެ ދުވަހަކު ތަކުރާރު ކުރާށެވެ. މާމުއިގެ ސަބަބުން ހަމުގެ ތެތްކަން ދަމަހައްޓާނެއެވެ. އަދި އަލުވީގެ ސަބަބުން ހަމުގެ ކުލަ އަލިކޮށްދޭނެއެވެ.

  1. އޮފް އަރާ ހަންގަނޑަކަށް

2 ސަމުސާ އަލުވި ދިޔަ، 2 ސަމުސާ ލުނބޯހުތް އަދި ބޭނުމިއްޔާ ބައި ސަމުސާ މާމުއި ރަގަޅަށް އެއްކުރުމަށްފަހު ކަރާއި މޫނުގައި އުނގުޅާފައި 15 މިނިޓް ބެހެއްޓުމަށްފަހު ނުވަތަ ހިކުމުން ފިނިފެނުން ދޮވެލާށެވެ. ދެ ދުވަހުން އެއްދުވަހު ތަކުރާރު ކުރަމުން ގެންދާށެވެ. ލުނބޮއާއި އަލުވި، ހަމުގައި ހުންނަ ތެޔޮކަން ކުޑަކުރުމަށް އެހީތެރިވެދޭނެއެވެ. އަދި ހަމުގެ ވަޅުތަކުގައި ހުންނަ ހަޑި ސާފުކޮށް ހަމުގެ ކުލަ އެއްވަރު ކޮށްދޭނެއެވެ. އަދި މާމުއި، ހަމަށް ތެތްކަން ގެނެސްދޭނެއެވެ. ލުނބޯހުތުގެ ސަބަބުން ހަންގަނޑު ހިރުވާ ހެން ހީވާނަމަ ވަރަށް ބޮޑަށް ގިރާލާށެވެ.

  1. މޫނުގައި ހުންނަ ލައްތައް ފިލުވުމަށް

1 ސަމުސާ ޗިސްކޮށްފައި ހުރި ޓޮމާޓޯ އަދި 1 ސަމުސާ އަލުވި ދިޔަ، 1 ސަމުސާ މާމުއިގެ ތެރޭގައި ރީތިކޮށް ގަށާލާށެވެ. ބޮޑަށް ލައް ހުރި ތަންތަނަށް އިސްކަންދީގެން މުޅި މޫނުގައި އުނގުޅާށެވެ. 20 މިނިޓް ބެހެއްޓުމަށްފަހު ދޮވެލާށެވެ. ހަމުގައި ހުރި ލައްތައް ފިލަންދެން ކޮންމެ ދުވަހަކު ތަކުރާރު ކުރަމުން ގެންދާށެވެ. ޓޮމާޓޯ އަދި އަލުވި އަކީ އެންޓިއޮކްސިޑެންޓުން މުއްސަނދިވެފައިވާ ދެ އެއްޗެއް ކަމުން ހަމުގައި ހުންނަ ބައެއް ޖަރާސީމު އަދި ބެކްޓީރިޔާ މަރާލުމަށް އެހީތެރިވާނެއެވެ. ޓޮމާޓޯ އަކީ ވަރަށް ބޮޑަށް އެސިޑިކް އެއްޗެއްކަމުން ހަންގަނޑު ހިކުމުގެ މައްސަަލަ ބައެއް ފަރާތްތަކަށް ދިމާވެދާނެއެވެ. މިހެން ވާ ނަމަ މީގެ ތެރެއަށް އަދި އިތުރު އެއް ސަމުސާ މާމުއި އިތުރުކޮށްލާށެވެ.

  1. ހަންގަނޑު ވާންކޮށްލުމަށް

ރީތިކޮށް ފުނޑާ ހިމުން ކޮށްފައިވާ، ބައި އަލުވި ނުވަތަ ބައި އަލުވި ދިޔަ، 1 ބިހުގެ ލޮނދީގައި ރަގަޅަށް އެއްކޮށްލާށެވެ. ރީތިކޮށް އެއްވުމުން ކަރާއި މޫނުގައި އުނގުޅާށެވެ. އެއްކޮށް ހިކުމުން ފިނިފެނުން ދޮވެލާށެވެ. އެދެވޭ ނަތީޖާ ހޯދުމަށް ހަފްތާއަކު 2 ފަހަރު ނުވަތަ 3 ފަހަރު ތަކުރާރު ކުރާށެވެ. ބިހާއި އަލުވީގައިވާ ޕްރޮޓީންގެ ސަބަބުން ހަންގަނޑު ވާންކޮށް ދޭނެއެވެ.

  1. ތެޔޮކަން ކަނޑުވާލާ އޮމާންކޮށްލުމަށް

2 ސަމުސާ އަލުވި ދިޔަ، 2 ސަމުސާ ކިއުކަމްބަރ ދިޔަ، 1 ސަމުސާ ލުނބޯހުތް، ދެ އިނގިލިން ހިފޭވަރުގެ ރީނދޫ ކޮޅެއް އަޅައިގެން އެއްކޮށްލާށެވެ. ރަގަޅަށް އެއްވުމުން މޫނުގައި އުނގުޅާފައި 20 މިނިޓް ވަންދެން ބަހައްޓާށެވެ. އެންމެ ރަގަޅު ނަތީޖާ ފެންނާނީ ހަފްތާއަކު ދެ ފަހަރު ބޭނުން ކުރުމުންނެވެ. އަވިން ހަންގަނޑަށް ލިބޭގެއްލުން ކިއުކަމްބަރ އިން އިޔާދަ ކޮށްދޭނެއެވެ. ލުނބޯ އަދި އަލުވީގެ ސަބަބުން ހަމުގައި ހުންނަ ހަޑިތައް ސާފުވެ، ހަމުގައިވާ ތެޔޮކަން ކަނޑުވާދޭނެއެވެ. ރީނދުލަކީ ހަމުގެ ކުލަ އަލިކޮށްދިނުމުގެ އިތުރުން ހަމުގައި ހުންނަ ޖަރާސީމު ނައްތާލާ އެއްޗެކެވެ.