ސްޓައިލިންގ ޓޫލްތައް މާގިނައިން ބޭނުންކުރުމާއި، އިސްތަށިގަނޑުގަ ކުލަ ޖެއްސުމާ ރިލެކްސިން ހެއްދުންފަދަ ކެމިކަލް ޓްރީޓްމަންޓްތަކަކީ އިސްތަށިގަނޑަށް ގެއްލުންވާ ކަންކަމެވެ. އެހެންކަމުން މިފަދަ ކަންކަން ކުރަންޔާ އިސްތަށިގަނޑަށް އެކަށީގެންވާ ފަރުވާތައް ދިނުމަކީ ލިބޭ ގެއްލުން ކުޑަވާނެ ކަމެކެވެ. އެގޮތުން އެވޮކާޑޯ އާއި ޒައިތޫނި ތެލުގެ ހެއާ މާސްކަކީ ވަރަށް ރަނގަޅު ފަރުވާއަކަށް ވާނެއެވެ.

ބޭނުންވާނީ:

ތޮށިމަށާފައިވާ އެވޮކާޑޯއެއްގެ އެއްބައި

1 މޭޒުމަތީ ސަމުސާ ޒައިތޫނި ތެޔޮ

1 މޭޒުމަތީ ސަމުސާ މާމުއި

(ބޭނުމިއްޔާ) ލެވެންޑަރ އެސެންޝިއަލް އޮއިލްގެ ދެތިކި

މި ތަކެތި އެއްކޮށް މިކްސްކޮށް ޕޭސްޓަކަށްވުމުން، އިނގިލިތަކުން ތެތް އިސްތަށިގަނޑުގައި، އިސްތަށިގަނޑުގެ ތިރިން ފެށިގެން މައްޗަށް ވާ ގޮތަށް، ހާކާލާށެވެ. އެއަށްފަހު އިސްތަށިގަނޑު އޮޅާލުމަށްފަހު، އިސްތަށީގެ ބުޑަށް އެހާ ބާރު ނުވާނެހެން ހުޅިއެއްޖަހާށެވެ. ދެން ޝަވަރ ކެޕަކުން އިސްތަށިގަނޑު ކަވަރކޮށްލާށެވެ. އަދި 10 މިނެޓް ވަންދެން ޝަވަރ ކެޕްމަތިން ބްލޯ ޑްރައި ކޮށްލާށެވެ. އެއަށްފަހު އިތުރު 20 މިނެޓް ވަންދެން ބެހެއްޓުމަށްފަހު ދޮވެލާށެވެ.

މާސްކަށް ބޭނުންވާ ތަކެތީގެ މިންވަރު ލިޔެފައިއެވަނީ ކޮނޑުން ތަންކޮޅެއް ތިރިއަށް އޮންނަވަރު އިސްތަށިގަނޑަކަށެވެ. އެއަށްވުރެ އިސްތަށިގަނޑު ދިގުނަމަ އިތުރަށް ބޭނުންވާނެއެވެ. އަދި އެއަށްވުރެ ކުރުނަމަ ބޭނުންވާވަރު މަދުވާނެއެވެ.

ލެވެންޑަރ އޮއިލް ދެ ތިކި ބޭނުންކުރަން ލިޔެފައިވަނީ ހަމައެކަނި އިސްތަށިނގަނޑުގައި މީރު ވަހެއް ހަރުލެއްވުމަށެވެ. ލެވެންޑަރ އޮއިލްއާ ނުލާވެސް މި މާސްކުން ހެއަރ ޑެމޭޖަށް ފަރުވާކުރެވޭނެއެވެ. މިއީ ވަރަށް ބޮޑަށް އިސްތަށިގަނޑު ކޮންޑިޝަންކޮށްދޭ (ޑީޕް ކޮންޑިޝަނިން) މާސްކެކެވެ.

ރިލެކްސިން ހައްދައިގެން ނުވަތަ ކުލަ ޖައްސައިގެންވިޔަސް އިސްތަށިގަނޑު ޑްރައިވެ، ޑެމޭޖްވެ، އެކަމާ ދެރަވެގެން އެވާހަކަ ދައްކާ ރައްޓެއްސަކު ހުރިނަމަ، އަވަހަށް މި އާޓިކަލްގެ ލިންކު އެ މީހަކަށް ފޮނުވާލާށެވެ.