ތިރީގައިވާ ފޮޓޯއިން އެ ފެންނަނީ ސްކިން ކެއަރ ރޫޓީންއެއްގައި ޕްރޮޑަކްޓްތައް ބޭނުންކުރާނެ ތަރުތީބެވެ. މިހާ ގިނަ ޕްރޮޑަކްޓްތައް ބޭނުންކުރާހިތް އޮތިއްޔާ ހަމަ ބޭނުންކުރަންވީއެވެ. އެކަމަކު ސްކިން ކެއަރ ރޫޓީންއަކަށް ދިހަ ބާރަ ޕްރޮޑަކްޓެއް ކޮންމެހެން މުހިންމެއް ނޫނެވެ. މިއަށް ވުރެ އާދައިގެ، ފަސޭހަ ރޫޓީންއެއް ބޭނުންވާނަމަ އަދި ފޮޓޯއަށްވުރެ ތިރިއަށް ސްކްރޯލްކޮށްލާށެވެ.

މަތީގައި އެފެންނަ ހުރިހާ ޕްރޮޑަކްޓެއް ނެތިއްޔާ ހަންގަނޑު ރީއްޗެއް ނުވާނެއޭ ބައެއް މީހުން ހީކުރެއެވެ. އެކަމަކު ހަޤީޤަތަކީ ދިރިއުޅުމުގެ ރަނގަޅު އާދަތަކާއެކު ތިން ހަތަރު ޕްރޮޑަކްޓަކުންވެސް ރަނގަޅު ސްކިން ކެއަރ ރޫޓީންއެއް ގެންގުޅެވިދާނެކަމެވެ. ހަމަގައިމުވެސް އަޅުގަނޑު ބޭނުންކުރަނީ އެންމެ 4 ޕްރޮޑަކްޓެވެ. ސިމްޕަލް އަދި ފަސޭހަ ސްކިން ކެއަރ ރޫޓިންއަކަށް، އަންހެނަކަށްވިޔަސް ފިރިހެނަކަށްވިޔަސް، ބޭނުންވާނެ ތަކެއްޗާއި ތަރުތީބު ތިރީގައި އެވަނީއެވެ.

ސަންސްކްރީނެއް ޚިޔާރުކުރާއިރު މިނެރަލް-ބޭސްޑް ނުވަތަ ކެމިކަލް-ބޭސްޑް، އެސްޕީއެފް ވީހާވެސް މަތި ސަންސްކްރީނެއް ޚިޔާރުކުރާށެވެ. ރާއްޖެއަކީ ހޫނުގަދަ އަވި ގަދަ ޤައުމެކެވެ. އިރުގެ ގަދަ އަތްވަކީ ހަނގަނޑު އެންމެ އަވަހަށް މުސްކުޅި ކޮށްލާ އެއް ފެކްޓަރއެވެ. އެހެންކަމުން ހަންގަނޑު ރައްކާތެރިކުރުމަށް ސަންސްކްރީން ވަރަށްވެސް މުހިއްމެވެ. ވިއްސާރަޔަސް ނުވަތަ އުޑުމަތި ކިތަންމެ ބަނަޔަސް ސަންސްކްރީން ނުލާ ދުވާލު ބޭރަށް ނުނިކުންނަށްޗެވެ.

ރޭގަނޑު ރެޓިނޯލް އެކުލެވޭ ނައިޓް ކްރީމެއް ޚިޔާރުކުރުމުގެ ބޭނުމަކީ ހަނގަނޑަށް ދުވާލު ލިބިފައި ހުންނަ ގެއްލުންތައް މަރާމާތުކޮށް ކޮލާޖެން އުފައްދާ ހަނގަނޑު ގިނަ ދުވަހަށް ޒުވާންކޮށް ބެހެއްޓުމަށް އެހީތެރިވެދިނުމެވެ. މީގެ އިތުރުން ރެޓިނޯލަކީ ހަނގަނޑުގައި ހުންނަ ލަތްތައް ފިލުވައިދިނުމަށާ ހަނގަނޑު އޮމާންކުރުމަށް އެހީތެރިވެދޭ މާއްދާއެކެވެ. އަދި ހަނގަނޑުގައި އާ ލޭނާރުތައް އުފެދުމަށް މަގުފަހިކޮށްދީ ނަތީޖާއެއްގެ ގޮތުން ލޭ ދައުރުވުން އިތުރުވެ ހަންގަނޑަށް އުޖާލާކަން ގެނެސްދޭނެވެސްމެއެވެ. އެހެންކަމުން ޚާއްސަކޮށް ތިރީހުން މަތީގެ މީހެއްނަމަ ރޭގަނޑު ނިދުމުގެ ކުރިން، ރެޓިނޯލް އެކުލެވޭ ޕްރޮޑަކްޓެއް ބޭނުންކުރުން ވަރަށްވެސް މުހިއްމެވެ.

މީގެ އިތުރުން ހަފްތާއަކު ދެ ފަހަރު ނިދުމުގެ ކުރިން ރަނގަޅު ސްކްރަބްއެއް ބޭނުންކޮށްގެން ހަންގަނޑު އެކްސްފޯލިއޭޓްކޮށް ހަންގަނޑު ސްޓީމްކުރުމަކީވެސް ސްކިން ކެއަރ ރޫޓިންގަ ހިމަނަން ވަރަށް މުހިއްމު ކަމެކެވެ. ތިރީގައިވާ ފޮޓޯއިން އެ ދައްކާހެން ގޭގައި ފަސޭހަކަމާއެކު މޫން ސްޓީމްކޮށްލެވިދާނެއެވެ. ބޭނުންވާނީ ބޮޑު ބޯތައްޓެއްގެ ހޫނު ފެނާއި ބޮޑު ތުވާއްޔެކެވެ.

މިގޮތް އުނދަގޫނަމަ ކުޑަ ތުވާއްޔެއް ހޫނު ފެނުނ ތެންމާލުމަށްފަހު މޫނުމަތީ އަޅައިގެން 5 ވަރަކަށް މިނެތް އޮވެލިޔަސް ރަނގަޅުވާނެއެވެ. ފޭސް ސްޓީމްކޮށް ނިމުމުން ކުރިންވެސް ދެންނެވިފަދައިން މޮއިސްޗަރައިޒަރ އަދި އެއަށްފަހު ރެޓިނޯލް އެކުލެވޭ ނައިޓްކްރީމެއް ބޭނުންކުރައްޗެވެ.

މިހުރިހާ ކަމެއްކުރިޔަސް، އަދި ހަނގަނޑު ރީތި ނުވެދާނެއެވެ. މި ކަންކަމުގެ އިތުރަށް ހަމަ ނިދި ލިބުމާ ބޭނުންވާވަރަށް ފެން ބުއިމަކީ މީހާގެ އާންމު ޞިއްޙަތުގެ އިތުރުން ހަންގަނޑުގެ ޞިއްޙަތަށްވެސް ވަރަށް މުހިއްމު ކަންކަމެވެ. އެހެންކަމުން ކޮންމެ ރެއަކުވެސް ބަރާބަރަށް ނިދި ހަމަކުރުމަށާއި ކޮންމެ ދުވަހަކުވެސް 2.5 ލީޓަރު ފެން ބޯން އާދަކުރާށެވެ.