މޫނު ތެޔޮވުމަކީ ވަރަށްގިނަ މީހުންނަށް ދިމައިވާ ކަމެކެވެ. މިކަމުގައި އަންހެނެއް ފިރިހެނެއް ކިޔާނަ ކަމެއް ނެތެވެ. މޫނު ތެޔޮވާ މީހުން ތަފާތު އެކި ވައްތަރުގެ މޫނު ދޮންނަ އެއްޗެހިން މޫނު ދޮވެ ހަދައެވެ. އަދި މޫނުގައި އުނގުޅާ ކިތައްމެ އެއްޗެއް ވެސް އުނގުޅައެވެ. ދާއިމީ ހައްލެއް ލިބޭތީ ނުފެނެއެވެ. ވަގުތުކޮޅަކަށް ވަގުތީ ހައްލެއް ލިބިދާނެއެވެ. މި ލިޔުމުގައި މި ބަލާލަނީ މޫނު ތެޔޮވާ ތެޔޮވުން ފިލުވާލަން ކުރެވިދާނޭ ވަރަށް އާދައިގެ ދެ ކަމެއްގެ ވާހަކައެވެ.

ގުދުރަތީ ނިޒާމުގައި އުފެދި ފައްކާވެފައިވާ ތަކެއްޗަކީ އިންސާނުންގެ އަތްތަކުން އުފައްދާ އެއްޗެއްސަށްވުރެ، މާ ފުރިމަ ތަކެެއްޗެވެ. މޫނުގައި އުނގުޅަން އެކިކަހަލަ ބާރު ކުޑަ ކެމިކަލް ބޭނުން ކުރުމުގެ ބަދަލުގައި ގުދުރަތީ ވަސީލަތްތަކުގެ ބޭނުން ހިފަމާތޯއެވެ.

ދިރާސާތަކުން ދައްކާ ގޮތުގައި ލުނބޮއެ ހުތަކީ މޫނު ތެޔޮވާ ތެޔޮވުން ހުއްޓުވައިދޭ އެއްޗެކެވެ. ލުނބޮއެ ހުތް ބޭނުން ކުރަނީ ކުޑަކޮށް ހޫނު ކޮށްލައިގެންނެވެ. މުޅި މޫނުގައި ހާކާލެވޭ ވަރުގެ ކުޑަ ހުތްކޮޅަކުން ފުދޭނެއެވެ. ލުނބޯ ހުތް ފެލާލުމަށްފަހު ފެންފޮދަކަށް އަޅާލާ ހޫނުކޮށްލާށެވެ. ހޫނު ކުރާއިރު، ކުޑަ މާމުއިކޮޅެއްވެސް ބޭނުން ކުރެވިދާމެއެވެ. އެއަށްފަހު ތާފަނާކަންމަތީ ހުއްޓާ އެ ފެނުން މޫނު ދޮވެލާށެވެ. ރަނގަޅީ މޫނު ދޮވެލުމަށްފަހު، މީގެ ތައްޓެއްގެ ފެންވެސް ބޯލިއްޔާއެވެ. ހަންގަނޑުގައި އުނގުޅުމާއި އެކު ބޮއުމުން ކުރާ ފައިދާ އިތުރުވެދެއެވެ. ދުވާލަކު އެއްފަހަރު ނުވަތަ ދެފަހަރު މިކަން ކުރާނަމަ މޫނު ތެޔޮވާ ތެޔޮވުން ކުޑަވެގެން ހިނގައިދާނެއެވެ.

އާފަލަކީވެސް މިކަމުގައި ބޭނުން ކުރެވިދާނެ އެއްޗެކެވެ. ފެހި އާފަލަކަސް ރަތް އަދި ރީނދޫ އާފަލަކަށް ވިޔަސް މެއެވެ. އާފަލު ފޮތިކުރުމަށްފަހު މޫނުގައި ހާކާށެވެ. މިހެން ހޭކުމުގެ ކުރިން ފިނި ފެންފޮދަކުން މޫނު ދޮވެލާށެވެ. އެއަށްފަހު މިގޮތަށް މުޅި މޫނުގައި އެ އާފަލު ފޮތި ހާކާލާށެވެ. ހުދުކުލައިގެ މަޑު، މަދު ފޮނުކޮޅެއް އުފެދެންދެން މިގޮތަށް ހާކާލާށެވެ. އެއަށްފަހު އިރުކޮޅަކު މަޑުކޮށްލުމަށްފަހު ފިނި ފެންފޮދަކުން މޫނު ދޮވެލާށެވެ. 

އެއްވެސް އިރަމު މޫނު ދޮވުމަށްފަހު، މޫނު ހިއްކާނަމަ މޫމުގައި ތުވާލި ކާތާ ނުހަދާށެވެ. މަޑުމަޑުން މޫނުގައި ތުވާލި ޖައްސާ އޮބާލާށެވެ. ގަދައަށް މޫނުގައި ތުވާލި ކާތާނަމަ މޫނުގައި ހުންނަ އޮއިލް ޑަކްޓް ތައް ބޮޑަށް ހުޅުވި، ތެޔޮ ބޭރުވުމުގެ ފުތުސަތު އިތުރުވާކަމަށަވެސް ދިރާސާތަކުން ދައްކައެވެ. މިއީ މޫނު ތެޔޮވާ މީހުން ތަޖުރިބާ ކޮށްލަން ރަނގަޅު ކަންކަމެވެ. މާތް ﷲ ގެ ވާގިފުޅާއި އެކު ނަތީޖާ ފެންނާނެއެވެ.

 

ހަވާލާ: ސުޗާރިތާ.ވީ، ދިވާލައިކްސް 2016