ފައިން ހަންފޮޅުމަކީ ބައެއް މީހުންނަށް ވަރަށް އާއްމު ކަމެކެވެ. ފައިތިލާގެ ހަންގަނޑު ހިކި، ހަންގަނޑު ކުރަކިވެ ހަންފޮޅޭ ގޮތް ވެއެވެ. މިގޮތަށް ފައިން ހަންފޮޅޭއިރު، ފައިތިލާގެ ހަންގަނޑަށް އަނިޔާއެއް ވުމަކާއި ނުލާ ހަންފޮޅޭ ގޮތް ވެއެވެ. މިހެންވަނީ އެ ހަންތައް މަރުވާން ހެދީމައެވެ. ގިނައިން ބޮޑުކޮށް ފައިތިލައިން ހަންފޮޅިފައި ތިބޭ މީހުންނަށް އެއީ ވަރަށް އުނދަގޫ ކަމެކެވެ. ނަމަވެސް ފަސޭހަކަމާއި އެކު ގޭގައި މި ހަންތައް ފިލުވާލުމަށް ކުރެވިދާނޭ އާދައިގެ ކަމެއް އެބަ އޮތެވެ.

ލުނބޯ ހުތަކީ އޭގައި އެސިޑިޓީ މަތި އެއްޗެކެވެ. ލުނބޯ ހުތުގައި މި ހުންނަ އެސިޑިޓީގެ ސަބަބުން ވަރަށްގިނަ ކަންކަމަށް ފަހިވެގެން ދެއެވެ. އެގޮތުން ތާފަނާ ފެންފޮދަކަށް ލުނބޯ ހުތް ޖެހުމަށްފަހު އެ ފެން އެތީގެ ތެރެއަށް ފައިތިލަ ލައިގެން 15 ނުވަތަ 20 މިނެޓު ފައި ތެތްމާލާ، ފައިތިލާގެ ހަންގަނޑު ކުޑަކޮށް މަޑުކޮށްލާށެވެ. މިގޮތަށް ފެނުގެ ތެރެއަށް ލުނބޯ ހުތް ޖަހާއިރު، ހުތް ފެލި ލުނބޯތަށްވެސް ފެނުގެ ތެރެއަށް ދޫކޮށްލާށެވެ.

މިގޮތަށް ހެދުމަށްފަހު، ފެނުގެ ތެރެއިން ފައިތިލަ ނެގުމަށްފަހު، ފައި އުނގުޅާ ބުރުހަކުން ނުވަތަ ކަރުދާހަކުން ފައިތިލަ، މަޑުމަޑުން އުނގުޅާލާށެވެ. އޭރަށް ފައިތިލާގައި މަރުވެފައިވާ ހަމުގެ އެތިއެތިކޮޅުތަކާއި މަރުވެފައިވާ ހަމުގެ ހަތާ ތަކާއި ހަތާރުތައް ފަސޭހަކަމާއި އެކީ ނެއްޓިގެން ހިނގައިދާނެއެވެ. މިގޮތަށް އެ ހަންތައް ނައްޓާލާ ސާފުކޮށްލުމަށްފަހު އާދައިގެ ފެނުން ފައިތިލަ ދޮވެލާށެވެ. ދެން ތުވާއްޔެއް ފަދަ އެއްޗަކުން ފައިތިލަ މަޑުމަޑުން ހިއްކާލާށެވެ. ފައިފޮއްސެއްގައި ފައި ކޭތުމަށްވުރެ މިގޮތަށް މަޑުމަޑުން ސާފުކޮށްލުން ބުއްދިވެރިއެވެ. އަދި އޭގެ ފަހުގައި މޮއިސްޓްރައިޒިން ކްރީމެއް ނުވަތަ ކާށިތެޔޮފޮދެއް ކަހަލަ އެއްޗެއް ފައިތިލާގައި އުނގުޅާލާ ކުޑަކޮށް ހާނާލާށެވެ. މަޑުވެފައިވާ އެ ހަންގަނޑުގެ ތެރެއަށް އުނގުޅި އެއްޗެއްގެ ރާހަތު ކުރާނެ ވަރަށް މަޑުމަޑުން މަސާޖުކޮށްލާށެވެ.

މިއީ ފައިތިލައިން ހަންފޮޅޭނަމަ ގޭގައި ކުރެވިދާނެ ވަރަށް އާދައިގެ ކަމެކެވެ. ނަމަވެސް މިކަމުގައި ސަމާލުކަން ދޭން ޖެހޭނެ ކަންތައްތަކެއްވެސް ހުރެއެވެ. އެއީ ފައިތިލާގައި ފާރުކޮޅެއް ހުންނަ ނަމަ، މިގޮތަށް ކަންތައްކުރުން އެއްމެ އެދެވިގެނެއް ނުވެއެވެ. އަދި މިގޮތަށް ކަންކުރުމުން ފައިތިލަ ކަހާ ހިރުވާ ނުވަތަ ރަތްވެ އެފަދަ އުނދަގުލެއްވާނަމަވެސް މިކަން މިމަގުން ކުރުން ރައްކާތެރިއެއް ނޫނެވެ. މިހާލަތުގައި އޮތީ ސިއްހީ އެހީތެރިއެއްގެ ލަފާ ހޯދާ، އެ އިރުޝާދުގެ މަތިން އަމަލު ކުރުމެވެ.