ގުދުރަތީގޮތުން ފައިގެ ނިޔަފަތި ހުންނާނީ ހުދުކުލައިގައެވެ. ނަމަވެސް ޒަޚަމެއްގެ ސަބަބުން، އިންފެކްޝަނެއް ޖެހިގެން، ކެއުމުގައި ހުންނަން ޖެހޭބައިތައް ފުރިހަމައަށް ހިމަނާފައި ނުވާތީ ނުވަތަ ނިޔަފަތީގައި ޖައްސާ ކުލައިގެ ސަބަބުންވެސް ނިޔަފަތި ކަޅުވާން މެދުވެރިވެއެވެ. މީގެތެރެއިން ބައެއް ކަންކަމަކީ އެއްވެސް ފަރުވާ އަކާނުލާ އަމިއްލައަށް ރަގަޅުވާ ކަންކަމެވެ. ނަމަވެސް މިކަން ރަގަޅު ނުވެ ގިނަ ދުވަސްވާނަމަ ޑޮކްޓަރެއްގެ ކައިރިއަށް ޒިޔާރަތްކޮށްގެން ނުރައްކަލެއްނެތްކަން ޔަގީން ކުރަންވާނެއެވެ.

މިއީ ކިހިނެތް ދިމާވާ މައްސަލައެއް؟

ޞިއްޙީ މައްސަލައެއްގެ ސަބަބުން: ލޭމަދުވުން، ހަކުރުބަލި، ހިތުގެ ބަލި އަދި ކިޑްނީގެ ބައްޔެއްގެ ސަބަބުން މިހެން މެދުވެރިވެދާނެއެވެ.

ފަންގަލް އިންފެކްޝަން: ފަންގަލް އިންފެކްޝަންގެ ސަބަބުން އާންމުގޮތެއްގައި ނިޔަފަތި ހުދުވެ ނުވަތަ ރީނދޫކުލަ އަރައެވެ. ނަމަވެސް މިގޮތަށް ކަޅުކުލަ އަރަންވެސް މެދުވެރިވެއެވެ.

މެލަނޯމާ: މިއީ އެންމެ ނުރައްކާތެރި ވައްތަރުގެ ހަމުގެ ކެންސަރެވެ. މި ކެންސަރު ޖެހުމުން ހަމުގެ އެކި ހިސާބުކަޅުވާނެއެވެ. މިހެން ވާއިރު ނިޔަފަތީގެ ދަށުން ހަންގަނޑު ކަޅުވެއްޖެ ނަމަ ނިޔަފަތިވެސް އިންނާނީ ކަޅުވެފައެވެ.

ޒަޚަމެއްވުން: އިނގިއްޔަށް ގެއްލުމެއްވެ ޒަޚަމެއް ލިބިއްޖެނަމަ ނިޔަފަތީގެ ދަށުގައިވާ ކުދިކުދި ލޭނާރުތައް ހަލާކުވެ ނިޔަފަތީގެ ދަށަށް ލޭ އެޅޭގޮތްވެއެވެ. މިހެން ވިޔަސް ނިޔަފަތި އިންނާނީ ކަޅުވެފައެވެ.

ޑޮކްޓަރެއްގެ ލަފާ ހޯދަންވީ ކޮން އިރަކުން؟

ނިޔަފަތި ކަޅުވާއިރަށް ޑޮކްޓަރެއްގެ ކައިރިއަށް ދާކަށް ނުޖެހެއެވެ. ޚާއްސަކޮށް މިހެންވީ ސަބަބު އެނގޭނަމަ ޑޮކްޓަރެއް ކައިރިއަށް ދިއުން މުހިންމެއް ނޫނެވެ. ނަމަވެސް އެކަން ނޭނގޭނަމަ ޑޮކްޓަރެއްގެ ލަފާ ހޯދަން ޖެހޭނެއެވެ. ސަބަބަކީ މިއީ ވަރަށް ނުރައްކާތެރިކަމެއްގެ ސަބަބުން ދިމާވާ މައްސަލައަކަށް ވުމުގެ ފުރުސަތުވެސް އޮތުމެވެ. ހަކުރުބަލި ހުންނަނަމަ އެކަމަށް ފަރުވާ ކުރަންވާނެއެވެ. ޒަޚަމެއްގެ ސަބަބުން ނިފަތި ކަޅުވެއްޖެނަމަ އެބައި ދިއުމުން ދެން ފަޅާ ނިޔަފަތި ހުންނަންވާނީ ރީތިކޮށެވެ. އެހެން ނުވާނަމަ ޑޮކްޓަރެއްގެ އެހީ ހޯދަން ވާނެއެވެ. ޚާއްސަކޮށް މެލަނޯމާއަށް ޝައްކުވާނަމަ އަވަހަށް ޑޮކްޓަރެއްގެ ކާރިއަށް ދާންވާނެއެވެ. ފަންގަލް އިންފެކްޝަންގެ ސަބަބުން ނިޔަފަތި ކަޅުވާނަމަ ޑޮކްޓަރުގެ އެހީ ނުހޯދާވެސް އެކަމަށް ޙައްލު ލިބިދާނެއެވެ.

ފަންގަލް އިންފެކްޝަނަށް ގޭގައި ދެވޭނެފަރުވާ

  • ނިޔަފަތީގައި ހުންނަ ފަންގަސް ވަރަށް ފަސޭހައިން ހައިޑްރޮޖެން ޕެރޮކްސައިޑް އިން މަރާލެވޭނެއެވެ. ސާފު ފޮތިކޮޅެއް ނުވަތަ ކަފަކޮޅެއްގައި ހައިޑްރޮޖެން ޕެރޮކްސައިޑް ލުމަށްފަހު ނިޔަފަތިތަކުގައި އުނގުޅާށެވެ. ނުވަތަ 4 ތަށި ފެނުގެ ތެރެއަށް ތައްޓެއްގެ 8 ބައިކުޅަ އެއްބައި ހައިޑްރޮޖެން ޕެރޮކްސައިޑް އެޅުމަށްފަހު އެ ފެނުގެ ތެރެއަށް ފައިލައިގެން 20 މިނިޓް އިންނާށެވެ. ދެން ފައި ދޮވެލުމަށްފަހު ހިއްކާލާށެވެ.

  • ސައިފަތްކުލަ ގަދަވާވަރަށް ސައިފަތުގެ ފެން ކެއްކުމަށްފަހު ތާފަނާކޮށް ހުއްޓާ އޭގެތެރެއަށް ފައިލާށެވެ. ފެން އެތި ފިނިވުމުން ފައިނަގާ ދޮވެލުމަށްފަހު ހިއްކާލާށެވެ. ހަފްތާއެއްވަންދެން ކޮންމެ ދުވަހަކު މިގޮތަށް މިކަން ތަކުރާރު ކުރާށެވެ.

  • ބޮޑު ތައްޓަކަށް ފެނާއި އެއްވަރަށް އެޕަލް ސައިޑަރ ވިނެގަރ އެޅުމަށްފަހު އޭގެ ތެރެއަށް ފައިލައިގެން 20 މިނިޓް އިންނާށެވެ. ކޮންމެ ދެދުވަހަކުން އެއްދުވަހު މިކަން ތަކުރާރު ކުރާށެވެ.

  • ބޭކިން ސޮޑާގެ ތެރެއަށް ކުޑަ ފެންފޮދެއް ޖަހައިގެން އޮލަކޮށް ގަށާލާށެވެ. ދެން ނިޔަފަތީގެ މަތީގައި އުނގުޅުމަށްފަހު 20 މިނިޓްވަންދެން ބަހައްޓާށެވެ. އޭގެފަހުން ރީތިފެނުން ދޮވެލާށެވެ. 5 ތަށި ފެނުގެ ތެރެއަށް 5 ސަމުސާ ބޭކިން ސޮޑާ އަޅާ ގިރާލުމަށްފަހު އޭގެ ތެރެއަށް ފައި ލައިގެން 20 މިނިޓް ވަންދެން އިންނާށެވެ. ދެން ފިނިފެނުން ދޮވެ ހިއްކާލާށެވެ.