ލޯ ކައިރި ކަޅުވުމަކީ ކޮންމެ މީހަކަށް ވެސް ހަޔާތުގެ ކޮންމެވެސް ހިސާބެއްގައި ދިމާވާ ކަމެކެވެ. މީގެ ސަބަބުތަކުގެ ތެރޭގައި ދުވަސްވުން، އާއިލީ ކަމަކަށްވުން، އަދި މާ ގިނައިން އަވީގައި އުޅުން ހިމެނެއެވެ.

އެހެންވީމާ ލޯ ކައިރި ކަޅުވުމުން ދެން ހަދާނީ ކިހިނެއް ހެއްޔެވެ؟ އެގޮތަށް ބަހައްޓަން ބޭނުން ނުވާ ނަމަ، ގޭގައި ކުރެވިދާނެ ފަސް ކަމަކަށް އަލިއަޅުވައިލާނަމެވެ.

1. ކިއުކަމްބާ

މިއީ އާއްމުކޮށް ފިލްމުތަކުން ފެންނަ މަންޒަރެކެވެ. އެހެންނަމަވެސް މިއީ ޙަޤީޤަތުގައިވެސް ލޯ ކައިރި ކަޅުވުމަށް ރަނގަޅު ފަރުވާއެއް ކަމަށް ތަޖުރިބާކާރުން ބުނެއެވެ. އެގޮތުން ތާޒާ ކިއުކަމްބާއެއްފޮތި ކޮށްލުމަށްފަހު 30 މިނެޓު ވަންދެން އައިސްއަލަމާރީގައި ބަހައްޓާށެވެ. އޭގެފަހުން އައިސްއަލަމާރިން ނެގުމަށްފަހު ދެލޮލުގައި ދެފޮތި ކިއުކަމްބާ ބާއްވާލާށެވެ. އަދި މިގޮތަށް 10 މިނެޓު އޮތުމަށްފަހު، ތާފަނާ ފެނުން މޫނު ދޮވެލާށެވެ. މިކަން ކޮންމެ ހަފްތާއަކު މަދުވެގެން ތިން ދުވަހު ކުރާށެވެ. ކިއުކްމަބާއަކީ ހަންގަނޑު އަލިކޮށްދޭ ސިފަތަކެއް ލިބިފައިވާ ޤުދުރަތީ އެއްޗެކެވެ. 

2. ކިއުކަމްބާ އާއި ލުނބޯ

ކިއުކަމްބާ ފޮތިން އެއްވެސް އަސަރެއް ނުކުރާނަމަ، މިފަހަރު މިއޮތީ އެހެން ގޮތެވެ. ކިއުކަމްބާގެ ފެނާއި ލުނބޯފެން އެއްކޮށްލުމަށްފަހު، ކަފަކޮޅަކުން ލޯކައިރީގައި ހާކާށެވެ. ނަމަވެސް ލުނބޯ ހުތް ލޯ ތެރެއަށް ނުދާ ގޮތަކަށް މިކަން ކުރަން ސަމާލުވައްޗެވެ. އެއަށްފަހު 15 މިނެޓު ވަންދެން ބެހެއްޓުމަށްފަހު ތާފަނާ ފެނުން ދޮވެލާށެވެ.

3. ޓޮމާޓޯ

ރޯ ޓޮމާޓޯގެ ޖޫސް ނެގުމަށްފަހު، އެއާ އެއްވަރަށް ލުނބޯ ހުތް ފިތާލާށެވެ. އެއަށްފަހު ކަފަކޮޅަކުން ލޯކައިރީގައި އުނގުޅުމަށްފަހު 10 މިނެޓު ވަންދެން ބަހައްޓާށެވެ. ދެން ތާފަނާ ފެނުން ދޮވެލާނީއެވެ. މީގެ ނަތީޖާ ފެންނާނީ ކޮންމެދުވަހަކު ދެފަހަރު ތަކުރާރު ކުރުމުންނެވެ. ޓޮމާޓޯއަކީ ހަށިގަނޑަށް ފައިދާހުރި ބާވަތެއް ކަމަށްވާ ލައިކޮޕީން އެކުލެވޭ އެއްޗެކެވެ. ލައިކޮޕީންއަކީ ހިތުގެ ބަލިތަކަށާއި، ލޮލުގެ ފެނުމަށް އަދި ހަންގަނޑަށް ވެސް ވަރަށް ރަނގަޅު އެއްޗެކެވެ. މީގެ ސަބަބުން ހަންގަނޑަށް މަޑުކަން ވެރިކޮށްދީ، ހަން އަލިކޮށްދެއެވެ. އަދި ލޯކައިރި ކަޅުކަން ފިލުވައިދިނުމަށް އެހީވެދެއެވެ.

4. ކާށިތެޔޮ

ކާށިތެލަކީ އޭގައި އެތައް ފައިދާތަކެއް އެކުލެވޭ އެއްޗެކެވެ. އެގޮތުން އިސްތަށިގަނޑުގެ ބޭނުންތަކަށާއި، ހަންގަނޑު ރީތި ކުރުމަށް ވެސް ބޭނުންކުރެވެއެވެ. އެއާއެކު، ކާށިތެލަކީ ލޯކައިރި ކަޅުކަން ފިލުވުމަށް ވެސް ވަރަށް ރަނގަޅު އެއްޗެކެވެ. އެހެންކަމުން ކޮންމެ ރެއަކު ނިދަން ދިޔުމުގެ ކުރިން ކާށިތެލުން ލޯ ކައިރި މަސާޖު ކޮށްލާށެވެ. އެއަށްފަހު ހެނދުނު ހޭލުމަށްފަހު ތާފަނާ ފެނުން ދޮވެލާނީއެވެ.

5. އަލުވި

އަލުތްވަކީ ވިޓަމިން ސީ ވަރަށް ގިނައިން ހިމެނޭ އެއްޗެކެވެ. ވިޓަމިން ސީ އަކީ ހަމުގެ ޒުވާންކަން އިތުރުކޮށްދީ، ދުވަސްވުމުގެ އަލާމަތްތަކުން ދުރުކޮށްދޭ އެއްޗެކެވެ. އަދި އޭގެތެރޭގައި ލޯ ކައިރި ކަޅުވުން ވެސް ހިމެނެއެވެ. އަލުވި ގޭނުމަށްފަހު އޭގެ ޖޫސް ނަގާށެވެ. އެއަށްފަހު އޭގެތެރެއަށް ކަފަކޮޅެއް ލުމަށްފަހު އެ ކަފަކޮޅު ލޯމަތީގައި ބާއްވާލާށެވެ. އަދި 10 މިނެޓު ފަހުން ތާފަނާ ފެނުން ދޮވެލާށެވެ.