ބޮލުން އިސްތަށި ފޭބުމާއި، ކިފުޅި ވުމާއި، އިސްތަށިތައް ދެކަފިވުން އަދި މެދުން ބުރިވުން ފަދަ މައްސަލަތަކާ ކުރިމަތިވާނަމަ، އެއީ ސީދާ ކޮން ސަބަބަކާހެދި ދިމާވާ ކަމެއް ކަން ނޭނގިދާނެއެވެ.

ނަމަވެސް އިސްތަށިގަނޑަށް އެފަދަ ގެއްލުން ލިބުމަކީ، ގިނަ ބަޔަކަށް ބޮޑު ހިތާމައެކެވެ. އަދި ރީތި އިސްތަށިގަނޑެއް ހާސިލްކުރުމުގެ ހުވަފެނަކީ ކޮންމެ އަންހެނަކު ވެސް ދެކޭނެ ހުވަފެނެކެވެ. 

ގެންގުޅެވޭ އާދަތަކެއްގެ ސަބަބުން އިސްތަށިގަނޑަށް ގެއްލުންވާކަން އެނގޭ ހެއްޔެވެ؟ ނޭނގޭނަމަ، މި ޙިއްސާ ކޮށްލަނީ ނޭނގި އިސްތަށިގަނޑަށް ދެވޭ ގެއްލުންތަކެވެ. މި ކަންތައްތަކަށް ކިޔާލުމަށްފަހު، މި އާދަތަކާ ދުރުވެލާށެވެ.

1. ކޮންމެ ދުވަހަކު ބޯ ދޮވުން

ކޮންމެދުވަހަކު ބޮލަށް ފެން އަޅައިގެން، ޝޭމްޕޫ ލައިގެން ދޮންނަ ނަމަ، އިސްތަށިގަނޑުގައި ހުންނަ ޤުދުރަތީ ތެޔޮކަން ކެނޑި، އިސްތަށިގަނޑުގެ އޮމާންކަން ގެއްލޭނެއެވެ. އަދި މިއީ ބޮލުން އިސްތަށި ފޭބުން ވެސް އިތުރުކޮށްދޭ އާދައެކެވެ. ތަޖުރިބާކާރުން ބުނާ ގޮތުގައި، އާއްމުކޮށް އިސްތަށިގަނޑު ދޮންނަން ޖެހޭނީ ހަފްތާއަކު ތިން ފަހަރު ކަމަށެވެ. ނަމަވެސް އެމީހެއްގެ އިސްތަށިގަނޑުގެ ގޮތުން މި އަދަދު ތަފާތު ވެދާނެއެވެ. އެހެނަސް ހަފްތާއަކު ކޮންމެ ދުވަހަކު ބޯދޮވުމަކީ ގޯސް އާދައެކެވެ.

2. މާގިނައިން ކޮންޑިޝަނާ އުނގުޅުން

ބޯ ދޮންނަ ކޮންމެފަހަރަކު ކޮންޑިޝަނާ އުނގުޅަން ޖެހޭނެއެވެ. އޭރުން އިސްތަށިގަނޑު މަޑުކޮށްދީ، އޮމާންކޮށް ބާއްވަދޭނެއެވެ. ނަމަވެސް ކޮންޑިޝަނާ އުނގުޅުމުގައި ހެދޭ ގޯހަކީ، މާގިނައިން އުނގުޅުމެވެ. ކޮންޑިޝަނާއަކީ ޝޭމްޕޫހެން އުނގުޅާ އެއްޗެއް ނޫންކަން ހަނދާން ބަހައްޓަން ވާނެއެވެ. ކޮންޑިޝަނާ ހާކަން ޖެހޭނީ އިސްތަށިތަކުގައެވެ. ތަލައިގައި އުނގުޅާނީ ޝޭމްޕޫއެވެ. 

3. ހޫނުފެން/ތާފަނާ ފެނުން ބޯދޮވުން

ހެނދުނު ހޭލާ ގޮތަށް ފިނި ފެނުގައި ޖެހެން ބޭނުންނުވާ މީހުން، ހޫނުފެނުން ނުވަތަ ތާފަނާ ފެނުން ފެންވަރައެވެ. ނަމަވެސް، ހޫނުފެނުން އިސްތަށިގަނޑު ދޮވުމަކީ، އިސްތަށިގަނޑުގައި ޤުދުރަތުން ހުންނަ ތެޔޮކަމާއި، ކެރަޓިން ކިޔާ މާއްދާއެއް ދަށްކޮށްދޭ ކަމެކެވެ. ކެރަޓިން އަކީ އިސްތަށިގަނޑުގެ އޮމާންކަމާއި ވިދުން އިތުރު ކޮށްދޭ ޤުދުރަތީ މާއްދާއެކެވެ. 

4. ތެތްކޮށް އޮތްވައި އެއްސުން

އިސްތަށިގަނޑު އެންމެ ނާޒުކު ވާނީ ތެތްކޮށް އޮންނަ ވަގުތުގައެވެ. އެހެން އޮތްވައި ފުނާ އަޅައި، އެއްސުމުން އިސްތަށިތައް މެދުން ބުރިވެ، ހަލާކުވެއެވެ. އަދި ތެތްކޮށް އޮތްވައި އެއްސުމަކީ ބޮލުން ނުބައިވަސް ދުވައި، ބޮލުން ހަންފޮޅެން ވެސް މެދުވެރިވާ ކަމެކެވެ. ތެތްކޮށް އޮތްވައި ފުނާއަޅަން ބޭނުންވާނަމަ، ދަތްދުރު ބޮޑު ފުނަލަކުން އަޅާށެވެ. އޭރުން އިސްތަށިގަނޑަށް ލިބޭ ގެއްލުން މަދުވާނެއެވެ. އަދި ރަނގަޅަށް ހިކެންދެން ނާއްސައި ދޫކޮށްލާފައި ބާއްވާށެވެ.

5. މާ ގިނައިން ފުނާއެޅުން

މާ ގިނަގިނައިން ފުނާ އެޅުމަކީ، އިސްތަށިތަކުގައި ފްރިކްޝަން އުފެދޭ ކަމެކެވެ. އޭގެ ސަބަބުން ދެކަފިވުން، އަދި އިސްތަށިތަކުގެ ބުޑަށް ވެސް ގެއްލުންވެއެވެ