ރީތި އިސްތަށިގަނޑެއް ހޯދުމަށް އެކިއެކި ޓްރީޓްމެންޓުތައް ނުނަގާ ގޭގައި ވެސް ކުރެވިދާނެ ކަންކަން ހުރެއެވެ. އެގޮތުން އިންޑިއާގެ މަޝްހޫރު ފިލްމީތަރި ޕްރިޔަންކާ ޗޯޕްރާ މީގެ ކުރިން ވަނީ އޭނާގެ އިސްތަށިގަނޑު ރީތިކޮށް ބޭއްވުމަށް އާދައިގެ މަތިން ގޭގައި ތައްޔާރުކުރާ މާސްކުގެ ރެސިޕީ ފޭނުންނާ ހިއްސާކޮށްފައެވެ.

އިންސްޓަގުރާމުގައި ޕްރިޔަންކާ ޗޯޕްރާ ހިއްސާކުރީ ވަރަށް އާދައިގެ، ފަސޭހަ މާސްކެއް ތައްޔާރު ކުރާނެ ގޮތެވެ. އެގޮތުން އެންމެ ފުރަތަމަ ޔޯގަޓާއި މާމުއި އަދި ކުކުޅު ބިސް ހޯދާށެވެ. ބޮޑަށް ރަނގަޅީ ފުލް ފެޓް ޔޯގަޓު ކަމަށް ވީޑިއޯގައި ޕްރިޔަންކާ ބުނެއެވެ. އަދި ޔޯގަޓު ބޯތަށްޓަކަށް އެޅުމަށްފަހު، އޭގެތެރެއަށް އެއް ސައިސަމުސާ މާމުއި އަޅާށެވެ. އެއަށްފަހު ކުކުޅުބިހެއް އޭގެތެރެއަށް ތަޅައިލާށެވެ. ދެން ހުރިހާ އެއްޗެއް ރަނގަޅަށް އެއްކޮށްލުމުން ހުންނާނީ ބޮލުގައި ހާކަން ތައްޔާރަށެވެ. އަދި 30 މިނިޓު ވަންދެން ބެހެއްޓުމަށްފަހު ތާފަނާ ފެނުން ދޮވެލާށެވެ.

ޕްރިޔަންކާ ބުނަނީ މި މާސްކަކީ ބޮލުގައި ހަންފޮޅޭ މީހުންނަށާއި، ބޮލުގެ ހަންގަނޑު ހިކިފައި ހުންނަ މީހުންނަށް ޙާއްސަ މާސްކެއް ކަމަށެވެ. ނަމަވެސް އޭގެން ދުވާ ވަސް ގިނައިރުތަކެއް ވަންދެން އިސްތަށިގަނޑުގައި ހިފާފައި ހުރެދާނެ ކަމަށާއި، ވީމާ ދެތިން ފަހަރު ޝޭމްޕޫ ލައިގެން ބޯ ދޮވެލުމަށް ޕްރިޔަންކާ ނަސޭހަތްދެއެވެ. މިހާރު ހޮލީވުޑުގައި ވެސް މަސައްކަތް ކުރާ ޕްރިޔަންކާ ބުނި ގޮތުގައި އެއީ އޭނާގެ މަންމަ ދަސްކޮށްދިން ހެއާ މާސްކެކެވެ.

ޕްރިޔަންކާ ޗޯޕްރާ އަކީ 2000 ވަނަ އަހަރުގެ މިސް ވޯލްޑްގެ ތާޖު ހާސިލްކޮށްފައިވާ، ރީތި ބަތަލާއެކެވެ.