މިހާރު ކުރިއަށްދާ ކޮޕާ އެމެރިކާ ފުޓްބޯޅަ މުބާރާތުގެ ކުއާޓާ ފައިނަލްގައި އެއް ކުޅުންތެރިއަކު މަދުކޮށް ކުޅެ ބްރެޒިލުން 1-0 އިން ޗިލީ ބަލިކޮށް އެ މުބާރާތުގެ ސެމީ ފައިނަލަށް ދަތުރުކޮށްފިއެވެ.

ރޭގެ މޮޅާއެކު ބްރެޒިލުން ވަނީ ޗިލީއާ ދެކޮޅަށް އެންމެ ފަހުން ކުޅުނު ފަސް މެޗު ވެސް ކާމިޔާބުކޮށްފައެވެ. މީގެއިތުރުން، ބްރެޒިލްގެ ކޯޗު ޓީޓޭގެ އިރުޝާދުގެ ދަށުން ކުޅުނު 59 މެޗުގެ ތެރެއިން 41 މެޗުގައި އެ ޓީމު ކޮޅަށް ގޯލެއް ވަދެފައެއްނުވެއެވެ.

ރިއޯ ޑީ ޖެނެއިރޯގައި ހުންނަ އެސްޓާޑިއޯ އޮލިމްޕިކޯ ނިލްޓަން ސަންޓޯސްގައި މިއަދު ކުޅުނު މި މެޗުގައި ބްރެޒިލުން ޖެހި ހަމައެކަނި ލަނޑު، ދެވަނަ ހާފުގެ ކުޅުން ފެށިތާ މިނެޓެއްގެ ތެރޭގައި ކާމިޔާބުކޮށްދިނީ ލޫކަސް ޕަކޭޓާ އެވެ.

ބްރެޒިލުން ލީޑްނެގިތާ ދެ މިނެޓުގެ ތެރޭގައި މެންޗެސްޓާ ސިޓީގެ ފޯވާޑް ގެބްރިއެލް ޖެސޫސް އަށް ރަތް ކާޑު ދައްކާ ދަނޑުން ފޮނުވާލުމުން އެ ޓީމުން މެޗުގެ ބާކީ ބައި ކުޅުނީ 10 ކުޅުންތެރިންނާއެކު އެވެ. ބްރެޒިލްގެ ކުޅުންތެރިއަކު މަދުވުމުން ޗިލީ އިން އޭގެ ފައިދާނަގައި ގޯލެއް ޖެހުމަށް ކުރި މަސައްކަތް ކާމިޔާބުވާގޮތެއްނުވިއެވެ. ޗިލީގެ އެޓޭކްތައް ނާކާމިޔާބުކޮށްލުމުގައި ބްރެޒިލްގެ ޑިފެންޑަރުންނާ އެ ޓީމުގެ ގޯލްކީޕަރު އެޑަސަން މޮރައެސް ވަނީ ރަނގަޅު ކުޅުމެއް ދައްކާފައެވެ.

މި މުބާރާތުގެ ކުއާޓާ ފައިނަލްގައި ރޭ ކުޅުނު އަނެއް މެޗުގައި ޕެރޫ އިން ވަނީ ޕެނަލްޓީ ޖަހައިގެން 4-3 އިން ޕެރަގުއޭ ބަލިކޮށްފައެވެ. މި މެޗުގެ ފުރިހަމަވަގުތު ހަމަވިއިރު ދެ ޓީމު 3-3 އިން އެއްވަރުވިއިރު، ދެ ޓީމުން ވެސް 90 މިނެޓު ނިންމާލީ 10 ކުޅުންތެރިންނާއެކު އެވެ. މި މެޗުގައި ޕެރަގުއޭގެ ލަނޑުތައް ޖަހައިދިނީ ގުސްޓާވޯ ގޯމޭޒް، ޖޫނިއާ އަލޮންސޯ އަދި ގެބްރިއެލް އަވަލޯސް އެވެ. ޕެރޫގެ ތިން ލަނޑުގެ ތެރެއިން އެއް ގޯލަކީ ޕެރަގުއޭގެ ގުސްޓާވޯ ގޯމޭޒް އަތުން ބައިކޮޅަށް ވަތް ގޯލެކެވެ. އެ ޓީމުގެ އަނެއް ދެލަނޑުޖަހައިދިނީ ޖިއަންލޫކާ ލަޕަޑިއުލާ އާއި ޔޮޝިމަރް ޔޯޓުން އެވެ.

ނަތީޖާ ނެރުމަށް ޕެނަލްޓީ ޝޫޓްއައުޓް އަށް ދާން ޖެހުނުއިރު ޕެރޫ އިން ފޮނުވާލި ހަ ޕެނަލްޓީގެ ތެރެއިން ހަތަރު ޕެނަލްޓީ ކާމިޔާބުކުރިއެވެ. ޕެރޫގެ ޕެނަލްޓީތައް ޖަހައިދިނީ ލަޕަޑިއުލާ، ޔޮޓުން އާއި ރެނާޓޯ ޓާޕިއާ އަދި މިގުއެލް ޓްރައުކޯ އެވެ. އެ ޓީމަށް ނާކާމިޔާބުވީ ސަންޓިއާގޯ އޮރްމެންޔޯ އާއި ކްރިސްޓިއަން ކުއެވާ ފޮނުވާލި ޕެނަލްޓީއެވެ. ޕެރަގުއޭ އިން ޖެހި ހަ ޕެނަލްޓީގެ ތެރެއިން ކާމިޔާބުކުރެވުނީ ތިން ޕެނަލްޓީއެވެ. އެ ޓީމުގެ އެންހެލް ރޮމޭރޯ އާއި ޖޫނިއާ އަލޮންސޯ އަދި ރޮބަޓް ޕިރިސް ޑަ މޮޓާ ޕެނަލްޓީ ކާމިޔާބުކުރިއިރު، ޑޭވިޑް މާޓިނޭޒް، ބްރައިން ސަމުޑިއޯ އަދި އަލްބާޓް އެސްޕިނޯޒާގެ ޕެނަލްޓީ ކާމިޔާބެއްނުކުރެވުނެވެ.

ސެމީގައި ބްރެޒިލް ނިކުންނާނީ މި ފަހަރުގެ ގްރޫޕް ސްޓޭޖުގައި އެ ޓީމާ އެއް ގްރޫޕެއްގައި ހިމެނުނު ޕެރޫއާ ދެކޮޅަށެވެ. ގްރޫޕް ބީ ގައި މި ދެ ޓީމު ކުޅުނު މެޗު ބްރެޒިލުން ކާމިޔާބުކުރީ 4-0 އިންނެވެ. ބްރެޒިލުން ރޭގެ މެޗު ކުޅުނު ދަނޑުގައި މި ދެ ޓީމު ކުޅޭ މެޗު އޮންނާނީ މި މަހުގެ 6 ވާ ބުދަ ދުވަހުގެ ދަންވަރު 1 ޖަހާއިރު އެވެ.