100 މެރެތަން ހަމަކުރުމުގެ އަމާޒުގައި ރާއްޖޭގައި މިހާތަނަށް އެންމެ ގިނަ ފުލް މެރަތަން ދުވެފައިވާ ކާމިޔާބު އެތުލީޓް އަދި ކޯޗް، ނަސްރުﷲ އަޙުމަދު (ނަސްރު) ގެ 90 ވަނަ މެރެތަންއަށް ސިންގަޕޫރަށް ފުރައިފިއެވެ.

ނަސްރުގެ 90 ވަނަ މެރެތަންއަކީ އެ ގައުމުގައި އަންނަ ހޮނިހިރު ދުވަހު އޮންނަ އޯސިމް ސަންޑައުން މެރެތަންއެވެ. މިއީ ނަސްރު، ސިންގަޕޫރުގައި ދުވާ 10 ވަނަ މެރެތަން ވެސް މެއެވެ.

ނަސްރުގެ މިމެރެތަން ސްޕޮންސަރކޮށްފައި ވަނީ ހުސެން އާތިފްގެ މާސްޓަރ ޑިސްޓްރިބިއުޝަންގެ ކަބީސާ އެނަރޖީ ޑްރިންކް ގެ ފަރާތުންނެވެ.

ނަސްރު ބުނެފައިވަނީ ކޮންމެ މެރެތަންއަކީ ވެސް އޭނާއަށް ޚާއްޞަ މެރެތަންއެއް ކަމަށާއި ނަމަވެސް މިމެރެތަންއަކީ ފަހު 100 ހަމަކުރުމަށް ފަހު 10 ގުނަން ފަށާ މެރެތަންކަމަށް ވުމާ އެކު މި ދުވުން ވަރަށް ބޮޑަށް ޚާއްސަވެގެންދާ ކަމަށެވެ. އަދި ބައިނަލްއަޤުވާމީ 90 މެރެތަންއާ ހިސާބަށް ދެވުނީ އެކަމުގައި ވަރަށް ގިނަ ބައެއްގެ ހިތްވަރާއި ސަޕޯޓްގެ އިތުރުން މާލީ ގޮތުން ވެސް ވަރަށް ބޮޑު އެހީތެރިކަން ލިބިގެންކަމަށާއި މި ފުރުޞަތުގައި ވެސް އެ ފަރާތްތަކަށް ޝުކުރު އަދާކުރަން ބޭނުންވާކަން ނަސްރު ފާހަގަކުރިއެވެ.

"އެނގިލައްވާނެ، 90 މެރެތަންއަކީ ވަރަށް މަސައްކަތާއި ވަގުތު، އެއީކީ ފަސޭހަކަމެއް ނޫން، މި ހިސާބަށް މި އައީ ހަމަ ވަރަށް ގިނަ ބައެއްގެ ހިތްވަރާއި އެހީތެރިކަމާ އެކު، އަޅުގަނޑުގެ މި މެރެތަން ވެސް ޚާއްޞަކޮށްލަން ބޭނުން ވަނީ އެ ފަދަ ފަރާތަކަށް، އެއީ އަޅުގަނޑު މި ހިސާބަށް އައުމުގައި ވަރަށް ބޮޑު އެހީތެރިކަމެއް ވެދެއްވި." ނަސްރު ބުންޏެވެ.

ނަސްރު ކުރިން ބުނީ، އޭނާގެ 100 ވަނަ މެރަތަން މި އަހަރު ފުރިހަމަ ކުރުމަކީ އުންމީދެއް ކަމަށެވެ. އެ ޓާގެޓް ހާސިލު ކުރަން އިތުރު 11 މެރަތަންގައި އޭނާ ވާދަ ކުރަން ޖެހޭނެ އެވެ. ދެކުނު އޭޝިއާގައި ވެސް އެންމެ ގިނަ މެރަތަން ދުވި ދުވުންތެރިންގެ ތެރޭގައި ހިމެނޭ ނަސްރު ފުރަތަމަ މެރަތަންއެއްގައި ވާދަ ކުރީ މާލޭގައި 1999 ގައި ބޭއްވި އެމްޓީސީސީ މެރަތަން އެވެ.

ނަސްރުއަކީ މިހާރު ވެސް ރާއްޖޭގައި ހުރި އެންމެ ގިނަ ބައިނަލްއަޤުވާމީ މެރެތަން ފުރިހަމަކުރި އެތުލީޓެވެ. މީގެ އިތުރުން މި ސަރަހައްދުގައި ވެސް ހުރި އެންމެ ގިނަ މެރެތަން ދުވި، އެކްޓިވް އެތުލީޓަކީ އޭނާއެވެ. އޭނާ ވަނީ މި އަހަރުގައި ވެސް ދުބާއީ، ނިއުދިއްލީ އަދި އަނަޓޯލިއާގައި މެރެތަން ފުރިހަމަކޮށްފައެވެ.

ޕޮލެންޑްގެ މަޝްހޫރު ޓޮޕް އެނަރޖީ ޑްރިންކެއް ކަމުގައިވާ ކަބީސާ އެނަރޖީ ޑްރިންކަކީ ޔޫރަޕްގެ އެންމެ ރަނގަޅު އެނަރޖީ ޑްރިންކްތަކުގެ ތެރެއިން އެއް ޑްރިންކެވެ. ސަބަބަކީ އެހެން ބައެއް އެނަރޖީ ޑްރިންކުތަކާއި ޚިހިލާފަށް ކަބީސާ ގައި އާޓިފިޝަލް ސްވީޓެނަރސް ނުވަތަ އެޑިޓިވްސް އެކުލެވިގެންނުވެއެވެ. އެހެންކަމުން މިއީ ކުޅިވަރުކުޅޭ ފަރާތްތަކަށްވެސް އެންމެ އެކަށީގެންވާ އެނަރޖީ ޑްރިންކޭ ބުނެވިދާނެއެވެ. ބައެއް އެނަރޖީ ޑްރިންކުތައް ބުއިމުން ގޭސްޓްރިކް މައްސަލަތައް ކުރިމަތިވީނަމަވެސް ކަބީސާ އެނާރޖީ ޑްރިންކަކީ އެހެން މިފަދަ ބުއިންތަކަށް ވުރެން ގޭސްޓްރިކް މައްސަލަ ދިމާވުން ކުޑަ ބުއިމެކެވެ. މި ޑްރިންކް ރާއްޖެ އެތެރެކޮށް ޑިސްޓްރިބިއުޓްކުރަނީ މާސްޓަރ ޑިސްޓްރިބިއުޝަނުންނެވެ.

ކަބީސާ އެނަރޖީ ޑްރިންކް މިހާރު 5 ބައްރެއްގައި 100 އަށް ވުރެ ގިނަ ޤައުމުގައި ވިއްކަމުން ދެއެވެ.