ޔުއެފާ 21 އަހަރުން ދަށުގެ ޔޫރަޕިއަން ޗެމްޕިއަންސިޕްގެ ފައިނަލްގައި ޕޯޗުގަލް ބަލިކޮށް ޖަރުމަނުން އެ މުބާރާތް ކާމިޔާބުކޮށްފިއެވެ. މި މެޗުން ޖަރުމަނު މޮޅުވީ 1-0 އިންނެވެ.

މިއީ ޖަރުމަނުން މި މުބާރާތް ކާމިޔާބުކުރި ތިންވަނަ ފަހަރެވެ. އެ ޓީމު އެންމެ ފަހުން ފައިނަލްގައި ކުޅުނީ 2019 ވަނަ އަހަރު އެވެ. އެފަހަރުގެ ފައިނަލްގައި ޖަރުމަނު ބަލިކޮށް ޗެމްޕިއަންކަން ހޯދީ ސްޕެއިނުންނެވެ. މި މުބާރާތް މިހާތަނަށް އެންމެ ގިނަ ފަހަރު ކާމިޔާބުކޮށްފައިވަނީ ވެސް ސްޕެއިނާއި އިޓަލީންނެވެ. މި ދެ ޓީމު ވެސް މި މުބާރާތުގެ ޗެމްޕިއަންކަން ފަސް ފަހަރު ހޯދާފައިވެއެވެ.

ސްލޮވީނިއާގެ ސްޓޮޒިޗް ސްޕޯޓްސް ޕާކްގައި ރޭ ކުޅުނު މި މެޗުގެ ފުރަތަމަ ހާފު ނިމުނީ ދެ ޓީމަށް ލަނޑެއްނުޖެހި އެއްވަރުވެގެންނެވެ. މި މެޗުގައި ފެނިގެންދިޔަ ހަމައެކަނި ލަނޑު، ދެވަނަ ހާފުގެ ކުރީކޮޅު ޖަރުމަނަށް ކާމިޔާބުކޮށްދިނީ ލޫކަސް ނިމެޗާ އެވެ. މިއީ އެ ޓީމުގެ ފުލްބެކް ރިޑްލީ ބަކޫ ދިން ބޯޅައަކުން ނިމެޗާ ކާމިޔާބުކުރި ގޯލެކެވެ. މިއީ މިފަހަރުގެ މުބާރާތުގައި އޭނާ ޖެހި ހަތަރުވަނަ ލަނޑެވެ.

އޭގެކުރީން، އެ ޓީމުގެ ފްލޮރިއަން ވާޓްޒް ފޮނުވާލި ހަމަލާއެއް ގޯލްގެ ހުރަސްދަނޑިއަށް އަމާޒުވެފައިވާއިރު އާން މައިއާ ފޮނުވާލި ބޯޅަ ޕޯޗުގަލްގެ ކީޕަރު ޑިއޯގޯ ކޮސްޓާ މަތަކުރިއެވެ. ޕޯޗުގަލް ޓީމުގެ ޑިއޯގޯ ޑަލޮޓް އާއި ތިއާގޯ ތޯމަސް އަށް ލިބުނު ފުރުޞަތުތަކުގެ ބޭނުންހިފޭގޮތެއްނުވިއެވެ. މެޗު ނިމެންދަނިކޮށް ޖަރުމަނުގެ ލީޑް ފުޅާކުރުމަށް ކަރީމް އަޑެޔެމީ އާއި ނިމެޗާ ފޮނުވާލި ހަމަލާތަކުގެ ހުރަހަކަށްވީ ޕޯޗުގަލްގެ ކީޕަރު ކޮސްޓާ އެވެ.

ރޭގެ މެޗާއެކު މި މުބާރާތުގައި ޕޯޗުގަލް ކުޅުނު ތިން ފައިނަލްގައި ވެސް ވަނީ ނާކާމިޔާބީއާ ކުރިމަތިލާންޖެހިފައެވެ.

މިފަހަރުގެ މުބާރާތުގެ އެންމެ މޮޅު ކުޅުުންތެރިއަކަށް ހޮވުނީ ރަނަރަޕް ޓީމު ޕޯޗުގަލްގެ ފަބިއޯ ވިއޭރާ އެވެ. މުޅި މުބާރާތުގައި އެންމެ ގިނަ ލަނޑުޖަހާ ކުޅުންތެރިޔާއަށްދޭ ރަންބޫޓް ހާސިލްކުރީ ޖަރުމަނުގެ ފޯވާޑް ނިމޭޗާ އެވެ. ކޮލިފައިން އާއެކު މި މުބާރާތުގައި އެންމެ ގިނަ ލަނޑުޖެހި ދެ ކުޅުންތެރިންނަކީ ފްރާންސްގެ އޮޑްސަން އެޑޮއާޑް އާއި އިންގްލެންޑްގެ އެޑީ އެންކީޓިއާ އެވެ. މި ދެ ކުޅުންތެރިންވެސް ޖަހާފައިވަނީ 13 ގޯލެވެ.