ދުނިޔޭގެ ގައުމުތަކުގައި ކަންހިނގާ ގޮތަށް ބަލާއިރު ނުވަތަ ނޫސްތަކުގެ ސުރުޚީތަކަށް ބަލާލުމުންވެސް ހާމަވާ އެއް ކަމަކީ އިންސާނީ ދިރިއުޅުމުގައި ހުރި ގޮންޖެހުން ތަކުގެ ގިނަ ކަމެވެ. ތަފާތު އެކި މައްސަލަތަކުގެ ތެރޭގައި އެންމެ ކުރިން ފާހަގަކުރަން ޖެހެނީ ދުނިޔޭގެ އެކި ހިސާބުގައި ހިނގަމުންދާ ދީނީ އަދި ސިޔާސީ ކޯޅުންތަކެވެ. އެކަމުގެ ސަބަބުން ހިނގާ ހަމަނުޖެހުންތަކާއި ލޭއޮހޮރުވުން ތަކެވެ. ބިކަވަމުންދާ އާއިލާތަކާއި ބަނގުރޫޓުވަމުންދާ ވިޔަފާރިތަކެވެ. ނަމަވެސް މިހުރިހާ ކަމަކުން ދުރުގައި ހަމަ އެކަނި އިންސާނީ ގުޅުން ގާއިމްކޮށްގެން ދިރިއުޅެވޭނެ އަވަށެއް އެބައޮތޭ ބުނެފިއްޔާ ގަބޫލު ކުރާނަން ހެއްޔެވެ؟

ދެކުނު އިންޑިޔާގެ ޓަމިލްނާޑޫ އަށް ބޮޑުބައި ނިސްބަތްވާ ގޮތަށް ތަރައްގީ ކުރެވެމުންދާ އޮރޮވިލްއަކީ އެއްބައިވަންތަކަމާއި އެކު އިންސާނުންނަށް ދިރިއުޅެވޭނެ ތަނެއް ގާއިމްކުރުމަށް 1930 ވަނަ އަހަރު ޚިޔާލަށް ގެނެވުނު ކަމެކެވެ. 1960 ގެ މެދުތެރޭގެ އަހަރުތަކުގައި މިތަނުގެ ތަޞައްވުރު ކުރެހި އިންޑިޔާ ސަރުކާރަށާއި ޔުނެސްކޯގެ ޖެނެރަލް އެސެމްބްލީއަށް ހުށައެޅުނެވެ. 1966 ވަނަ އަހަރު ޔުނެސްކޯއިން މިކަން ކުރުމަށް ފާސްކުރީ، މުސްތަގްބަލުގައި އިންސާނިއްޔަތުކަން ގާއިމްކޮށް ދަމަހައްޓައިގެން ދިރިއުޅެވޭނެ މުޖުތަމަޢުއެއް އުފެއްދުމަކީ ކުރެވިދާނެ ކަމެއްތޯ ބެލުމަށެވެ. މިއީ ތަޖުރިބާ ކުރުމަށް ހިންގުނު ޕްރޮޖެކްޓެކެވެ. މިތަން ތަރައްގީ ކުރަނީ ދުނިޔޭގެ ހުރިހާ ގައުމަކަށް ހުޅުވާލައިގެން 50 ހާސް މީހުން ދިރިއުޅުމަށެވެ. މިޕްރޮޖެކްޓްގެ މައިގަނޑު ބޭނުމަކީ އިންސާނީ ގުޅުމުގެ އަގުވަޒަންކޮށް އެހެން ތަފާތުތައް ނައްތާލައިގެން އެކީގައި އުޅުމެވެ.

1968 ވަނަ އަހަރުގެ ފެބްރުއަރީމަހުގެ 28 ވަނަ ދުވަހު އޮރޮވިލްގެ މަސައްކަތް ފެށުނު އިރު އަލިފު ދާލުގެ 124 ގައުމެއްގެ ތަމްސީލުކުރުމަށް އެގައުމުތަކުން މީހުން އައެވެ. އިންޑިޔާގެ ހުރިހާ ސްޓޭޓެއް ތަމްސީލްކުރާ މީހުނާއެކު ޖުމްލަ 5000 މީހުން ބައިވެރިވި މި ރަސްމިއްޔާތު އޮތީ ނިކަ ގަހެއްގެ ދަށުގައެވެ. ގައުމުތަކުން އައި މީހުންގެ ތެރެއިން ކޮންމެ މީހަކުވެސް އައީ ބިންގާއެޅުމަށް އެގައުމަކުން ވެލި ކޮޅެއް ހިފައިގެނެވެ.

މިވަގުތު އޮރޮވިލްގައި ދިރިއުޅޭ މީހުންގެ ތެރޭގައި 59 ގައުމަކަށް ނިސްބަތްވާ ތަފާތު އެކި ގިންތިއާއި ފަންތީގެ، އެކި ސަގާފަތްތަކުގެ 2500 މީހުން ދިރިއުޅެއެވެ. މީގެ ތެރެއިން ތިންބައިކުޅައެއްބައި ނިސްބަތްވަނީ އިންޑިޔާއަށެވެ. 6 އޭރިޔާއަކަށް ބެހިފައިވާ މި އަވަށުގައި މީހުން ދިރިއުޅުމަށާއި، ސިނާޢީ މަސައްކަތްތައް ކުރުމަށާއި، ހަމަހިމޭން ކަމާއެކު ވަގުތު ހޭދަކުރުމަށް ވަކި ހިސާބުތަކެއް ކަނޑައެޅިފައިވެއެވެ.

މިއަވަށުގެ ކަންކަމަށް ފައިސާ ޚަރަދު ކުރަނީ އިންޑިޔާ ސަރުކާރާއި ހިލޭސާބަހަށް މަސައްކަތްކުރާ ޖަމްޢިއްޔާތަކާއި، ހެޔޮއެދޭ މީހުނާއި މިތަނަށް ޒިޔާރަތްކުރާ މީހުނާއި އަމިއްލަ ފަރުދުންނެވެ. މިތަނުގައި ދިރިއުޅޭމީހުން މިތަނުގައި މަސައްކަތްކޮށްގެންވެސް ފައިސާ ހޯދޭނެއެވެ. އަދި މިތަނުގެ ދިރިއުޅެވޭނެ ވަރުގެ އެލަވަންސެއް މިތަނުން ދޭނެއެވެ. މިތަނުގެ އަމާޒަކީ އަވަށުގައި ދިރިއުޅޭ އެންމެނަށް ބޭނުންވާ ވަރަށް ކާބޯތަކެތި އުފެއްދުމެވެ. ނަމަވެސް އަދި މިތަނުގައި ބޭރުން ނުގެނެސް ތަނުގެ ވަޒަން ވެރިންނަށް ލިބެން ހުރީ ކިރު އެކަންޏެވެ.