ކުކުޅަށްވުރެ ބިސް ދޮށި ނުވާށޭ ބުނާ މި ބަހަކީ ދިވެހި އަދަބީ ބަސްތަކުގެ ތެރެއިން ހަރުބަހެކެވެ. މި ބުނުމަކީ އިބުރަތްތެރި ހިކުމަތްތެރި ބުނުމެކެވެ.

މިބަހުގެ ބަހަވީ މާނައަަށް ބަލައިލާނަމަ، މި ބަހުގައި މި ބުނަނީ ކުކުޅަށް ވުރެ ކުކުޅު އަޅާ ބިހުގެ ތޮށި ބޮޑު ނުވާނެކަމެވެ. އެހެނީ ދުނިޔޭގައި ގިނަ ވަގުތު ހޭދަކޮށްފައިވާ އެއްޗެއްގެ ގޮތުން ކުކުޅު މާ ގިނަދުވަސްވާނެއެވެ. ނުވަތަ ދޮށި ވާނެއެވެ.

މިބަހުގެ ހަގީގީ މާނައަށް ބަލައިލާނަމަ މި ބަސް ބުނެ އުޅެނީ އުމުރުން ޅަ، ތަޖުރިބާ މަދު ކުދިން ތަޖުރިބާހުރި މުސްކުޅިންގެ މައްޗަށް ބަސްކިޔައި އުޅޭ ފަހަރުފަހަރުއެވެ. ނުވަތަ ތަންދޮރު ދަންނަ މީހުން ކަންކަމަށް ރަނގަޅުގޮތް ބުނެދީ ގޮތްކިޔައި އުޅޭވަގުތު ތަނެއްދޮރެއް ނުދަންނަ މީހުން އެގޮތަށް ގޮތްކިޔައިއުޅޭ ވަގުތުވަގުތަށެވެ.

މިސާލަކަށް ބަލައިލާނަމަ، މަސްވެރިކަމުގައި ގޮތް ކިޔަން ކެޔޮޅުމީހާ ހުއްޓާ، އޭނާގެ މައްޗަށް، މިއަދު އަލަށް މަހަށް ދިޔަ މީހަކު ބަސްކިޔަން ފަށައިފި ކަމުގައި ވަނީނަމަ، އެ މީހަކާއި ދިމާލަށް، ކުކުޅަށްވުރެ ބިސް ދޮށި ނުވާށޭ ބުނެވިދާނެއެވެ.