ދިވެހި އަދަބީ ބަސްތަކުގެ ތެރެއިން "މޭހޫނާހަރުދަނޑިޔާ" އަކީ މަޖާޒު ބަހެކެވެ. މިއީ ވަރަށް ތަފާތުވެސް ބަހެކެވެ. ކުރިއަށް ހިންދީ ލަފުޒަކާއެކު ކިޔާ މި ދިވެހި މަޖާޒުބަހަކީ މިހާރަކަށް އައިސް އެއްގޮތަކަށްވެސް ބޭނުން ނުކުރާ ބަހެކޭ ބުނެވިދާނެއެވެ.

މިބަހުގެ ބަހަވީ މާނައަށް ބަލައިލާނަމަ މޭހޫނާ އަކީ ހިންދީ ބަހެކެވެ. އެބަހުގެ މާނައަކީ "އަހަރެއް އެބަހުރީމޭ" ނުވަތަ "އަހަރެއް މިހުރީ" މިފަދައިންނެވެ. ހަރިދަނޔާއަކީ ދިވެހި ބަހެކެވެ. ދިވެހި ބަހުގައި ހަރުދަނޑި ނުވަތަ ހަރުދަނޑިވުން ބޭނުން ކުރަނީ ދެހާލަތެއްގައެވެ. އެއީ މީހަކު ގަދަ ނިންޖަކުން ނިދާފައިވާ ހާލަތެއްގަޔާއި މީހެއް ނުވަތަ ދިރޭ އެއްޗެއް މަރުވުމަށްފަހު އޭގެ ފުރާނަ ނެތް މަސްގަނޑު ހަރުވުމުންނެވެ. މިބަހުގައި ހަރުދަނޑިޔާ ބޭނުން ކޮށްފައި އެއޮތީ މިދެންނެވި ފަހު ގޮތަށެވެ. އާދޭހެވެ! އަހަރެން މިހުރީ މަރުވެ ހަރުވެފައެވެ. މިފަދަ އިބާރާތަކުންނެވެ.

މި ބަހުގެ ހަގީގީ މާނައަށް ބަލައިލާނަމަ މި ބަހުގައި މި ބުނަނީ ކާނެ އެއްވެސް އެއްޗެއް ނެތް ވާހަކައެވެ. ކާނޭ އެއްޗެއް ނުލިބި މީހާ މަރުވެ، މަސްގަނޑު ހަރުވުމުގެ ފުރުސަތު އޮވެއެވެ. އެހެންކަމުން ކާނޭ އެއްޗެއް ނެތްމީހާ، މަޖާޒީ ގޮތެއްގައި "މޭހޫނާހަރުދަނޑިޔާ" އޭ ބުނެއުޅެއެވެ.