ގަދަ ނިދި މިހެން ނިދޭ އިރު، ފަތިހަށް ގޮވާނެ މަންމާ

     ގަދަޔަށް ނިދާފަ އޮތުމުން، ތަކުރާރުކޮށް ގޮވާނޭ

ފޮނުވަން ނަމާދު ފަޖުރަށް، ކުރުމަށް ޖަމާއަތެއްގާ

     ފޮނުވަން ކިތަށް އެދޭ މިސް، އިރުއިރުކޮޅާ ގޮވާނޭ

ގޭދޮށް މަގާ އެކީ ކުނި، އިރު ނާރަނީސް ކެހޭތޯ

     ގޭދޮށު އެތައް ކަމެއްގާ، ވެދިނުން އެހީ ގޮވާނޭ

ރޮށިފިހެފަ ބޯނެ ސައިވެސް، ތައްޔާރު ވާންއެދޭތީ

     ރޮށި ރީތިކޮށް ދަމައިދޭން، އެދިގެން ނިކަން ގޮވާނޭ

އިސްކޫލަށާ ވަޒީފާ، ގަޑި ނުޖެހި ދާން އެދޭތީ

     އިސްކޮށް އެހާމެ ފަތިހާ، އަބަދާ އަބަދު ގޮވާނޭ

އިރުނާރަނީސް ކުރާހާ، ކަންތައް ތަކޭމިއީ ވެސް

     ދިރުމެއްހިތެއްގަ ވާނަމަ، ވިސްނާ ހަދަން ޖެހޭނޭ

މަންމަޔަކު ވާއެގުރުބާން، ކިހިނެއް ބަޔާން ކުރާނީ

     ކަންތައްތަކެއް އެހާގިނަ، ކޮށްފާ ހެވަށް އެދޭނޭ