ދިވެހި އަދަބީބަސްތަކުގެ ތެރެއިން ގިނިދުށްމީހާ ރަތް މަލަށް ބިރުގަންނާނޭ ބުނެ އުޅޭ ބަހަކީ މުސްކުޅިބަހެކެވެ. މިއީ ކަންކަމުން އިބުރަތް ހާސިލްކުރެވޭ ބައެއް ހާލަތްތަކަށް ބޭނުންކޮށް އުޅޭ ރީތި ބަހެކެވެ.

މިބަހުގެ ބަހަވީ މާނައަށް ބަލައިލާނަމަ، މި ބަހުގައި މި ބުނެވެނީ ގިނިދުށް މީހެއްގެ ވާހަކައެވެ. ގިންޏަކީ އަލިފާނުގެ ހުޅެވެ. މިއީ ގަދަ އޮރެންޖު ނުވަތަ ރަތްކުލައިގެ އެއްޗެކެވެ. އަލިފާނުގެ ގިނީގެ ހޫނަކީ އެއިން އިންސާނާ ސަލާމާތްވާ މަސައްކަތް ކުރާނޭ އެއްޗެކެވެ. އެހެނީ އެ ހޫނު ދެކެ ބިރުގަންނާތީއެވެ. އެހެންކަމުން ގިނި ދެކެފައިވާ މީހާ، ރަތް މަލެއް ފެނުމުންވެސް އެއީ އަލިފާނު ގިންޏެއްކަމަށް ހީކުރެވި އެ ރަތް މާ ދެކެވެސް ބިރުގަންނާނެއެވެ.

މި ބަހުގެ "މުސްކުޅި" މާނައަށް ބަލައިލާއިރު، މި ބަހުގައި މި ބުނެވެނީ ކަމެއްގެ އަދަބު ލިބިފައިވާ މީހާ، އެފަދަކަމެއް ދެވަނަ ފަހަރަށް ނުވަތަ ތަކުރާރުކޮށް ކުރުމަށް ޖެހިލުންވާނޭ ނުވަތަ ބިރުގަންނާނޭ ވާހަކައެވެ. މިސާލަކަށް ބަލާލާނަމަ، ވައްކަމެއް ކުރި މީހެއްގެ މައްޗަށް އެކަން ސާބިތުވެ، އަތްކެނޑުމުގެ ހުކުމް ގާއިމުކުރެވޭ ވަރަށް އިޖުރާއަތްތައް ފުރިހަމަވުފައިވާނަމަ، އަދަބެއްގެ ގޮތުން އޭނާގެ އަތް ކަނޑާލައިފިނަމަ، ދެވަނަ ފަހަރަށް އޭނާ ވައްކަން ކުރަން ބިރުގަންނާނެއެވެ. އެހެނީ އަދަބު ދިނުމުން އޭނާއަށް "ގިނި" ދައްކާލެވުނީއެވެ. ދެން "ރަތްމަލެއް" ފެނުނަސް އޭނާ އެކަމަކާ ގާތެއް ނުވާނެއެވެ.