ނެތޭ އިހުލާސްތެރިން އަދުގާ، ކުރާ ކަންކަން މަސައްކަތުގާ

   ފެތޭ މިންގަޑު ޝަރުތު ހަމަވާ، ނެތޭ މީހެއް މަގާމެއްގާ

 

ނުފޫޒާ ބާރު ދައްކައިގެން، މަގާމު ތަކަށް އައުން މިއަކީ

   ކުފޫހަމާ ކަމެއް ނޫންކަން، ދަތީ ކާކުހެ މި ޢާލަމުގާ

 

ހަވާލުވެގެން ތިބޭ ކަންކަން، ކުރަން އަމުދުން ނުވެސް އެނގެއޭ

   ހަވާލުވަނީ ކަމެެއް ކުރުމުގެ، ޝައުގު ނެތަކަސް މުޅިން ހިތުގާ

 

ތިބޭ މީހުން މިފަދަ މީހުން، ނެތީ ތެރިކަން ހިތުގެ އިހުލާސް

   ލިބޭ ފައިސާ މުސާރަކޮޅަށް، އެކަނި ބަލަނީ މަސައްކަތުގާ

 

ދެވޭ ހިދުމަތް ދެކޮޅު ނުޖެހޭ، ކުރާ ކަންތައް ކަމަކު ނުދެއޭ

   "ހެވޭ" ވަރިހަމަ ވެގެން ތިބެނީ، ނުފޫޒެއް އޮތް ކަމުން އަތުގާ

 

ބަޔަކު ޝަކުވާ ތަކެއް ކުރިޔަސް، ހެވެއް މިކަމުގަ ލިބޭތޯއޭ؟

   ބަޔަކު މިކަމުގެ އަޑީގަ ވުމުން، ހަލާކުވެގެން ދަނީ "ސަމުގާ"

 

ކަމާ ކަންކަމުގެ މިސްރާބާ، މުޅިން އޮޅި ގެއްލި އުންމީދާ

   ވަމާ އެންމެން ދެކޮޅު މިކަމާ، ތެދުވެ އެކުގާ މިކަންކަމުގާ