ބޮޑާ ކަމަކީ ނުބައި ކަމެކޭ، އެއިން ދުރުވުން އެދޭ ކަމެކޭ

   ބޮޑާ މީހުން އެއީ ބައެކޭ، އަގެއް އަމުދުން ނުވާ ބައެކޭ

 

ކޮބާ ފައިދާ ބޮޑާ ވުމުގާ، އެއިން ލިބިދޭ ހެވެއް އޭގާ

  ކޮބާ މީހުން ބޮޑާ މީހުން، މޮޅެއް އޭގާ ނުވާ ބައެކޭ

 

ހިތުން މަށަކީ ވަރަށް މޮޅުކޮށް، އެކަންކަމުގާ އުޅޭ މީހެއް

  ނިތުން ކަމަކާ ލުމުން ކުރިމަތި، ކަމެއް އަމުދުން ނުވާ ބައެކޭ

 

ބޮޑާ ކަމުގާ އެހެން ހުއްޓާ، ބޮޑާ ވެވިދާ ސަބަބު އަތަކުން

   ބޮޑާހާކާ އަތުން ދިއުމުން، ވެގެން ނިކަމެތި ވެދާ ބައެކޭ

 

ލިބޭ އިރުގާ ތަކަށް ނިޢުމަތް، ޝުކުރު ނުކުރާ ބައެއް އެއަކީ

   ތިބޭ އެވެރިން ބޮޑާ ކަމުގާ، އިލާހު ހަނދާން ނުވާ ބައެކޭ

 

ފަހުމު ވުމުގާ ނުވިސްނާނޭ، ލިބުނު ނިޢުމަތް ލިބުނު ގޮތަކާ

   ފަހުން ދެރައާއި ނިކަމެތިކަން، ލިބުން އަދުވާ އެއީ ބައެކޭ