ދިވެހި އަދަބީބަސްތަކުގެ ތެރެއިން ވަޅެއް ނުތެޅޭނެއެވެ، ތެޅޭނީ ދާންޏޭ ބުނާ މުސްކުޅި ބަހަކީ މިސާލު ބަހެކެވެ.

މިއީ އިހުގެ ސިޔާސީ މައިދާނުގައި ވަރަށް އާއްމުކޮށް ބޭނުން ކުރަމުން އައި އަދަބީބަހެކެވެ. އަދުގެ ސިޔާސީ ހަލަބޮލިކަމުގައިވެސް މިއީ ބޭނުންކުރަން ރަނގަޅު މިސާލު ބަހެކެވެ.

މިބަހުގެ ބަހަވީ މާނައަށް ބަލާލާއިރު، މި ބަހުގައި މި ބުނަނީ ވަޅަކާއި ދާންޏެއްގެ ވާހަކައެވެ. ވަޅަކީ މިތަނުގައި ބޮޑު، އަދި މައި ތަނަކީ ވަޅެވެ. ދާންޏަކީ އެ ވަޅުގެ ބޭނުން ކުރުމަށް ނުވަތަ އެ ވަޅުގައި ހުންނަ ފެން ނެގުމަށް ގެންގުޅޭ އާލާތެކެވެ.

ދެން އެ ބުނެވެނީ ވަޅު ބެޑުފައި އެތަނުގެ މައި ތަނަކީ ވަޅު ކަމުގައި ވުމުން، ވަޅު ނުތެޅޭނެ ވާހަކައެވެ. ނަމަވެސް ދާންޏަކީ ވަޅަށްވުރެ ކުޑަ އެއްޗެއް ކަމުން، ތެޅޭނީ ދާނި ކަމަށެވެ.

މި ބަހުގެ މިސާލު ރައްދުވަނީ، މޮޅު މީހަކު ކުޅަ ވިޔާނުވާ ކަމެއްގެ ވާހަކަ ދެރަމީހަކު ދައްކައިގެން ނުވަތަ މޮޅު މީހަކު ކުރާ ވިޔާނުވާ ކަމެއްގައި ދެރަ މީހަކު ބައިވެރިވެގެން މޮޅު މީހާއަށް ގެއްލުމެއް ނުލިބި ނުވަތަ މާބޮޑު ދެރައެއް ނުލިބި ދެރަމީހާއަށް ދެރަލިބޭ ހާލަތަށެވެ. މިއީ އާއްމުކޮށް ސިޔާސީ މައިދާނުގައި ފެންނަ ކަމެކެވެ. އޭރުވެސް މިހާރުވެސް މިއީ އާއްމުކޮށް ފެންނަ ކަމެކެވެ. އެހެންކަމުން މި ބަސް މިއަދުވެސް ބޭނުން ކުރެވިދާނެއެވެ.