ދިވެހި އަދަބީ ބަސްތަކުގެ ތެރެއިން ތެތްބާލާނެ ފަދަވެސްނެތުމޭ ބުނާ ބަހަކީ މަޖާޒީ ބަހެކެވެ. މިއީ އިހުގައި އާއްމުކޮށް ބޭނުންކޮށް އުޅުނު ބަހެކެވެ. ނަމަވެސް މި ޒަމާނުގައި މި ބަސް ބޭނުން ކުރެވޭ ހާލަތްތައްވެސް މަދެވެ. އެހެނަސް ބައެއް ހާލަތްތަކުގައި ބޭނުން ކުރެވިދާނެއެވެ.  

މިބަހުގެ ބަހަވީ މާނައަށް ބަލާލާއިރު، މި ބަހުގައި މި ބުނަނީ ތެތްވެފައިވާ ތަނަކުން ނުވަތަ އެއްޗަކުން އޭގެ ތެތްކަން ފިލުވާލާނެ މިންވަރެއް ނުވަތަ އެއްޗެއް ނެތިގެން އުޅޭ ވާހަކައެވެ. 

މިބަހުގެ މަޖާޒީ މާނައަކީ ލައިގެންހުރި ހެދުން ނުވަތަ އަނދެގެން ހުރިއެތިގަނޑު ފިޔަވައި އެހެންފޭރާމެއްނެތުމޭ ބުނުމުގެ މާނައެވެ. ފަގީރުކަމުން ވެސް ބައެއް މީހުންނަށް މިހާލު ކުރިމަތިވެއެވެ. އަނެއްބައި މީހުން އެމީހުންގެ މުޑުދާރުކަމުންވެސް މިހެން އުޅެއެވެ. އަދި ބައެއް ހާލަތްތަކުގައި އަބަދު އެކައްޗެއް ލައިގެން އުޅޭތީވެ، އެކަމާ މަލާމާތްކުރުމުގެ ގޮތުންވެސް މި ބަސް ބުނެއުޅެއެވެ.

އާއްމުކޮށް މި ބަސް ބޭނުން ކޮށް އުޅެނީ ސަމާސާކޮށް މަޖާކުރުމުގެ ގޮތުންނެވެ. ނުވަތަ މަލާމާތްކުރުމުގެ ގޮތުންނެވެ.